是咁的，我嘅職業係動物傳心師: 57.煙、酒、性、毒

第二日我重新聯絡發叔，我哋又去返荷李活道公園。

「哇，你見點呀？嗰日你流好多鼻血喎。」

「應該無事，都慣㗎喇。自從有傳心能力之後久唔久就會咁。」

無記錯的話，今次係我自有能力以嚟，唔識控制搞到暈低之後，第一次用用下傳心術會噴鼻血仲昏迷。

發叔帶埋三色妹落嚟，佢喺我腳邊廝磨。





發叔面有難色，叮囑我要小心：「個天係無可能突然賜啲特異功能畀人，如果真係有，佢都實會收啲嘢作為代價㗎。」

發叔嘅講法我好同意，就正如一個人突然行好運之後無耐，就一定會有啲衰嘢發生。

「我諗你以後都係少用傳心術為妙。」

我點頭話好，但其實發叔講嘅代價，我一早就了然於心。恐怕能力嘅代價，就係壽命。

由擁有能力嗰日開始，我已經深知個天一定會收走我一啲嘢，但就算係明知有代價，我都係要去做。





食煙會導致肺癌、飲酒會導致肝癌，一樣有代價，咪又係人人去做？啲人話食煙減壓、飲酒可以忘記唔開心，歸根究底，無壓又使乜減，無唔開心又使乜忘記？

煙、酒、性、毒，全部都無一例外令人有快感。得唔到幸福嘅人，靠依啲嘢嚟呃自己，一時之間忘記自己嘅壓力、悲傷同寂寞，同時削減自己冗長無為嘅壽命。