是咁的，我嘅職業係動物傳心師: 56.直到

Dada一路有睇網絡小說嘅習慣，佢話近排有三個網絡小說嘅主角都叫金仔，問係咪我作，我話好心佢幾廿歲人咪咁多幻想，ff得多會傷身；跟住佢又好串咁話應該都無可能係我，事關嗰三個故事入面嘅主角唔係死老豆死老母就係冚家剷，我依種家庭完好嘅人實寫唔出。

雖然唔甘心，但我始終唔係寫嘢嘅人，亦無辦法憑空幻想死老豆老母會係咩景況，所以就無再同佢傾依個話題。

畀我寫小說，我屋企都一定係無穿無爛嘅。

村上春樹講過，悲傷係寫作嘅動力，屋企死啲人又的確係比較易寫嘢。

幸福永遠都無咩好講，亦唔會有人得閒去寫，因為佢哋沉浸於幸福嘅海中心，享受緊溫度適中嘅海水浴；只有不幸嘅人先需要抒發情緒嘅渠道，因為佢哋根本唔想處於隨時浸死自己嘅驚濤駭浪之中。





講真，面對重要之物嘅離開，一次都嫌多，淨係餐肉嘅死我都一直無辦法完全接受，更遑論要面對全家死剩我一個。

問題係人生在世就係要不停眼白白睇住自己重要嘅人同物離開自己，一次又一次，直到我哋認命，學識放下為止。直到我哋都離開為止。