是咁的，我嘅職業係動物傳心師: 54.第一個知道的女人

「唔使啦，本身照咗啦嘛，費事又照。」

醫生幫我哋兩母子打圓場：「如果已經檢查咗，咁又真係唔使再特別檢查嘅。」

公立醫院再同你排個期都已經等到2046，到時我本身份報告都出咗啦。

「唔係喎，係咪驗多次穩陣啲呀？」但天下阿媽都係一樣（除咗無人性嗰啲），可以確保仔女安全同身體健康嘅行動永遠唔會嫌多，事關阿媽就係由仔女出世開始就擔心佢哋會行先一步同死於非命嘅生物，而做老豆都一樣，只要成為父母之後，直到死之前都會被恐懼籠罩，依種恐懼只會喺自己離開嗰陣先會消失。

「放心，我無事嘅。」做仔女，只可以稍為緩和佢哋嘅恐懼。





醫生話我已經出得院，於是阿媽幫我辦出院手續，返屋企路上佢都久唔久都偷望我，又會伸手背掂我額頭，我就同佢講：「我唔係發燒呀媽。」佢就好唔忿氣咁「嘖」我一聲，之後隔一陣又望過。

「你隻眼無X光點望都望唔到我咩事㗎。等巴膠份report出好過啦。」

「你記得第一時間話我知喎。」

梗係，我向來有乜都係第一個講你知。

發生天大的事，媽媽永遠是第一個知道的女人。