是咁的，我嘅職業係動物傳心師: 53.阿媽

我醒返嘅時候，慢慢擘大眼，見到天花板嘅白光燈。我喺醫院。

我阿媽喺旁邊瞌眼瞓，手一滑，醒咗，見到我擘大眼。

「醒喇？仲有無邊度唔舒服呀？」佢嘅反應好冷靜，我仲以為佢實打鑼打鼓叫醫生。

「無咩事⋯⋯我估。」

「你之前咪話去驗腦嘅，份報告出咗未？」





「邊有咁快吖。」

阿媽個樣有啲擔心，但都無再問，幫我撳鐘叫醫生。醫生嚟到後，幫我約略檢查咗一陣，再同我哋交代暈嘅原因，就係未確定係咩原因，被佢吹脹。

「咁即係點呀？」

「我會建議病人留院做個全身檢查，穩陣啲。」

我即刻皺眉頭：「唔使咁麻煩喇，我已經照咗個腦，兩三個星期之後就有結果。」





「醫生建議你都係聽下好喎。」阿媽嘀咕。