是咁的，我嘅職業係動物傳心師: 52.黑暗吞噬

本來流浪貓狗出世之後可以存活落嚟嘅機率都比較低。

再問清楚，我先知細貓出世嗰日，係咁啱撞正落雨嘅嚴冬，雖然香港凍極有個譜，但初生嘅貓，連毛都未生，就算細貓媽咪已經盡力幫所有仔女又舐又用自己身體幫佢地保暖，可惜結果六胎入面都有五胎凍死咗。

動物又好，人又好，生仔本來就係危險又搵命搏嘅一場賭局。

「過咗無耐有班人類嚟捉走咗佢，之後拎返嚟。我都試過被人帶走，我諗佢應該同我一樣被人切咗啩。」大佬灰嘅情報同細貓講嘅都吻合。

「之後佢已經癲癲喪喪咁㗎喇，成日匿埋唔見人，你可以問埋餵我哋食嘢嗰個奴才吖。」



係喎，發叔喺度餵咗咁多年，佢一定畀到線索我。

我追返出去應該仲搵到佢。

「發叔！」發叔轉身，佢手抱嘅娥姐都向我喵一聲。

「我有啲嘢想問你。除咗娥姐之外，仲有一隻成日匿埋嘅貓，你有無印象？」

發叔諗一諗，點頭：「有見過，但佢匿埋咗幾日之後就唔見咗影，我唔知佢去咗邊。」



「我諗我對佢印象深啲。」娥姐搭話：我估佢精神有啲問題。」

「呀⋯⋯你⋯⋯」發叔無啦啦指住我一臉驚嚇。

「我？」我又指住自己，忽然感覺一陣腥味徘徊鼻腔，大腦就好似熄咗總掣咁，視線被黑暗呑噬。