是咁的，我嘅職業係動物傳心師: 51.痴線

老實講，喺人類社會有一個人失蹤都已經難搵，何況一隻貓？又無相又無片又唔知佢會去邊，點搵？如果不幸試過走失咗寵物嘅人就知，面對失蹤嘅煎熬仲可怕過面對隻寵物死咗，因為死亡係答案，但失蹤係你永遠唔知答案。

佢係生係死？依家做緊咩？佢幾時返嚟？我應唔應該放棄搵佢？每日都會被依堆問題困擾，痛苦相比起要面對同接受生命永遠離開更強烈同持久。

細個唔見咗玩具，我哋去搵，搵唔到，就喊，冷靜完再搵，仍然搵唔到，又喊⋯⋯無限輪迴，萬劫不復。

「我會幫你搵，但你要有心理準備，未必搵得返。」細貓放口，耷低頭，表情失落。

我踎低，輕力摸佢頭頂。「我唔敢應承你乜嘢，我只能夠答應你，我會幫你。」





講係咁講，但唔見咗隻流浪貓，應該邊度搵？

我走埋大佬灰度：「喵喵，起身吖，你會唔會知細貓媽咪去咗邊？」

大佬灰張開一隻眼睥一睥我。

「乜你問親都同啲痴線貓有關㗎？」

「又痴線？」





「唔痴線就假啦，生六個仔女死剩一個。」死剩一個，就係我旁邊嘅細貓，佢聽到之後呆咗咁企喺原地。