是咁的，我嘅職業係動物傳心師: 46.唔使食煙喇

發叔伸出手，三色妹聞下，就黐個頭埋去要摸摸。

「對唔住呀⋯⋯我應承過你唔食⋯⋯但又食咗⋯⋯⋯⋯我真係忍唔住⋯⋯好掛住你⋯⋯」眼淚總係隨年齡增加而減少，當人嘅經歷愈嚟愈多，淚腺就唔會再咁敏感，話流就流；但今日，眼前依個年齡大我幾倍嘅老人家，竟然好似個小朋友咁喊，搞到附近嘅阿伯都向我哋投以好奇嘅目光，就可以知道佢到底有幾掛住自己老婆。

我成為咗佢哋嘅翻譯員。係時候，互相理解。

「要講對唔住嘅係我⋯⋯我根本唔知⋯⋯你因爲咁而食返⋯⋯隻腳仲痛唔痛呀？」三色妹兜到發叔旁邊，舐佢腳上結焦嘅抓痕。

「喵。」





「娥姐話，跟住落嚟每一年嘅死忌，你都唔使食煙喇。」

發叔抱起三色妹，摟實佢；有一瞬間，我好似見到半透明嘅人形光暈，摟住發叔。

「喵。」

因為，我會陪住你㗎喇。