是咁的，我嘅職業係動物傳心師: 45.下一世

「發叔唔係無啦啦得閒無嘢做走去食煙。我要講嘅講完。你之前唔知原因，依家知啦，係咪仲要繼續嬲落去，由你自己決定啦，娥姐。」

三色妹行到跪低嘅發叔面前，抬頭，望住上一世嘅伴侶。

「死蠢⋯⋯一早帶我返屋企咪無事咯⋯⋯」

三色妹一直好黐發叔，每次發叔走都幾乎要跟佢返屋企咁滯，不過發叔又無咁做。

「發叔，點解你見到三色妹咁黐你，都唔帶佢返去養？」





發叔擦一擦眼淚，：「娥妹以前⋯⋯鼻敏感，所以我幾鍾意貓都唔會帶佢哋返屋企⋯⋯」

「咁娥姐走咗之後，點解唔養？」

發叔唔係幾好意思咁答：「你唔好笑阿叔迷信⋯⋯阿叔覺得人去咗，但靈魂會留喺間屋個神主牌度，帶貓返去，我驚娥妹唔鍾意。」

我將依段說話翻譯畀三色妹聽。

「傻仔發⋯⋯我個靈魂去咗隻貓度呀⋯⋯」





娥姐死嗰日，發叔守喺病床邊，捉住佢隻手，感受伴侶微弱嘅脈搏。

「老公⋯⋯對唔住喇⋯⋯你咁鍾意貓，但因為我⋯⋯搞到成世都無得養⋯⋯」

「唔緊要，我鍾意你多啲⋯⋯」

「嘻嘻⋯⋯如果有下一世⋯⋯我想投胎做隻貓⋯⋯到時，就靠你養我喇⋯⋯」

一對人嘅眼，一對貓嘅眼，同時流出眼淚。





搞到我都鼻酸酸，唔知餐肉下世變咗做咩呢？