是咁的，我嘅職業係動物傳心師: 47.若你成了

「真係好多謝你！」發叔抱住三色妹向我鞠躬。

「喵！」

老人家向我鞠躬真係受唔起，我即刻上前阻止佢：「唔使咁誇張，得㗎喇得㗎喇，收咗你錢㗎嘛。」

「阿叔我真係搵啱人，唔係你我都未必可以同娥妹再續前緣。」

「你記住咪再食煙喇。」





發叔即刻笑出嚟，搖搖頭：「唔食喇唔食喇，以後都唔食。」

三色妹舐去發叔臉上嘅淚痕，發叔笑到見牙唔見眼，但淚水仍然唔受控制咁流落嚟。

「我哋返屋企喇。」

貓嘅平均壽命大約十年左右，如果無估錯，正常情況下佢哋兩個嘅生命都會喺差唔多時期終結。

娥姐投胎轉世，只係為咗陪埋發叔最後一程。





「發叔。」

佢好奇問我做咩。

「如果你又有下一世投胎，你想變成咩？」

發叔用膊頭擦乾眼淚，諗咗一諗，答：「變咩都好，只要可以繼續同娥妹喺埋一齊就夠。」

若你成了魚，我便是會海，讓你暢游；





若你成了鳥，我便會是風，助你翱翔；

若你成了樹熊，我便是樹，為你遮蔭。