是咁的，我嘅職業係動物傳心師: 44.相認

「依個世界⋯⋯真係有？」

「我都識動物傳心啦，人死之後會輪迴轉生有咩咁出奇？」

我踎低同三色妹解釋：「發叔係破壞咗同你嘅承諾，但只係因為太掛住你啫。」

喺三色妹嘅角度，佢係聞到發叔身上嘅煙味，以為佢反口又開始食煙。

「發叔其實除咗你前一世死忌嗰日食咗一支，其餘日子都無再食過。」





動物雖然感知到時間流動，但佢哋無得睇月曆，唔會確切知道年月日時分秒，所以三色妹以為發叔無緣無故重拾壞習慣，無口齒又走去食煙。

如果佢知前一晚係自己死忌，如果佢哋語言相通，或者三色妹會覺得發叔情有可原。

「做咩食煙呀你？」

尋晚你死忌，我好掛住你。

「你話我死忌嗰晚⋯⋯？」三色妹終於試探性咁踏出一步。





斷開嘅線，重新連起。

「娥妹⋯⋯係咪真係你呀⋯⋯？」發叔跪低，表情複雜，我都唔識形容，好似驚喜之中又摻雜啲感動，介乎笑同喊之間，淚水喺佢眼眶中徘徊。

「喵。」三色妹好似回應發叔咁，叫咗一聲。

「係你⋯⋯真係你⋯⋯」