是咁的，我嘅職業係動物傳心師: 39.普通人嘅傳心術

由於發叔好長氣，所以我決定講個簡單版。

其實唔係啲咩傳心能力，只不過係講佢同娥姐一齊嘅時候發生嘅小趣事。

發叔行過一檔賣蔗汁嘅舖頭，唔知點解覺得娥姐應該想飲，於是就買咗一支返屋企。買到返去，娥姐就好驚訝：「你點知我想飲㗎？」

「吓，咁都算傳心呀？」聽到我滴晒汗。

「咁仲唔係傳心？心靈相通添啦直情係。」個情況同阿媽煮午餐肉畀我食，咁啱我又好耐無食好想食一樣。





發叔又講咗幾個神奇經歷。

「嗰日我就咁啱有個第六感話我知，佢想去燭光晚餐鋸扒，我又真係帶佢去。你知唔知佢嗰晚同我講咩？」

你點知我想嚟鋸扒㗎？

「你話係傳心就傳心啦。」我翻白眼，無發叔咁好氣。

「後生仔，你即係唔信阿叔咁話咯喎？」





「咁依種情況只不過係巧合啫。」

發叔拎出佢把摺扇，「發」咁打開，上面有個「發」嘅毛筆字，好霸氣。

「阿叔講過你知吖，依啲情況只有你同一個重要嘅人相處咗好長時間先會有機會發生。因為你愛嗰個人，先可以完全企喺佢嘅角度考慮佢需要啲乜、想要啲乜，依啲就係我哋普通人嘅傳心術喇，哈哈哈。」