是咁的，我嘅職業係動物傳心師: 40.細貓

佢咁樣解釋又真係駁唔到嘅。依個時候，大佬灰打喊露，半夢半醒咁伸懶腰。

「咁快瞓醒，問多佢少少嘢先。」我行過去，同時發現三色妹眼金金咁望住我同發叔。

「喵喵，我仲有嘢問你。」

「唔？大膽奴才，我唔想被你問喎。」大佬灰醒咗之後就「咻」一聲跑走咗，喺樹林左穿右插，不見蹤影，而其他流浪貓食完嘢，都一隻隻散開。發叔就過去回收個鐵盆。

點搞呀大佬⋯⋯





「喂，哥哥。」我低頭一望，見到有隻體型比較細小嘅貓。

「你係咪有嘢想問？或者我可以幫你喎，我好好記性㗎。」佢成個身挨埋我腳肚，頭喺我腳上磨磨下。

「你記得三色妹點解搞成咁？」

「有啲印象呀，同依個成日餵我哋嘅人類有關㗎嘛。」

「咁係咩事？」





「我啱啱食唔飽，你買啲嘢我食我先話你知。」細貓得戚咁向我「喵」聲，喺我兩隻腳之間「S」字型走嚟走去。

「你咪郁。」我抱起細貓，同佢四目相對，細貓舐一舐個嘴，眼仔碌碌咁望住我。

「肚餓。」

「你平時都食唔飽喎。」抱起細貓就知其實佢無乜肉地。

「梗係啦，我細粒吖嘛，咪成日唔夠佢哋爭囉。」





「嗱，有嘢食就講我知呀，有口齒呀要。」

細貓現出佢啲牙：「梗係有。」

「咦？佢唔夠飽呀？我返上樓再拎。」發叔聽到我嘅說話，就即刻離開公園，返上屋企再拎嘢食。

「發叔依家去拎，不如你講住我知先，之前發生過咩事咁呀？」

「你係咪話佢發癲嗰日呀？」細貓望向三色妹嗰邊。

「係呀，大約一個星期之前。」

「我有印象㗎，成日嚟餵我哋嗰個人當日又嚟咗，之後佢就發癲喇！走去抓咗個人一下，就匿入石凳下面。」

「依啲我知啦，我想知多啲其他嘢。譬如嗰日發叔有無做過乜嘢？有無咩異樣咁呀？」





「都係好平常咁餵嘢食囉，我又例牌被佢哋逼咗出嚟，食唔飽囉。」

無做過咩特別嘢，但三色妹就無啦啦發癲？