是咁的，我嘅職業係動物傳心師: 38.娥姐

我都愛你呀餐肉⋯⋯唔好死⋯⋯

我諗最後，佢已經聽唔到我講乜。
 
「我明㗎，後生仔。」

見我一時陷入沉思，眼濕濕咁，發叔拍拍我膊頭。

「哇發叔，你又識傳心咩？」我見自己失態，即刻抹一抹眼角，擺返個無事嘅樣出嚟。





「阿叔就唔識喇，但好似你見到有個人喊，都會知佢係唔開心，只係咁簡單啫。」

「以為你知我個心諗乜添。」

「你我就唔知喇，但以前呢，阿叔後生嗰時，我諗都有一排係識得傳心。」我哋坐喺旁邊嘅石凳度吹水。

「咪玩啦五寶。」

「真㗎，阿叔講過你聽吖。係喎，你唔使再睇下三色仔咩事？」





「係三色妹⋯⋯我諗住等大佬灰起身再問，所以依家可以聽下你講故仔嘅。」大佬灰懶洋洋咁喺樹下瞓覺。

「故咩仔，真人真事嚟㗎。」

我半信半疑：「係咪咁巴閉呀？」

「哈！同你啲超能力梗係無得比啦，但嗰種體驗都好特別，阿叔講過你聽吖。」

主角係發叔，同埋佢已經去世嘅老婆──娥姐。