是咁的，我嘅職業係動物傳心師: 34.我眼訓喇

喵喵冷哼一聲，跳落地面，弓起背接近三色妹，兩隻貓即刻用貓貓拳對打。

三色妹縮得更加入，喵喵就走到我腳邊。

「你都見啦，我哋個個過親去都會被佢打。」

「佢一直都係咁？」

「係呀，我哋過去就打，見到人行近都起晒螯，都唔知佢咁燥做乜。」喵喵悠然咁舐自己前腳。





我轉身望向發叔：「你又話佢之前好乖嘅？」

發叔皺晒眉：「吓？係好乖喎，做咩？」

「大佬灰話三色妹見其他貓同人都起晒螯㗎喎。」

「有啲咁嘅事咩？」發叔個樣好驚訝，如果係咁，結合喵喵同發叔講過嘅嘢嚟推測⋯⋯三色妹對其他人同貓都惡，但對發叔唔惡，跟住又惡返，點解會出現咁嘅變化？

咁嘅情況，應該要以發叔嘅獨特性作為切入點。





我估係發叔具備某啲特質，所以三色妹會黐佢，後來嗰樣特質消失，三色妹就當返發叔係普通人咁對待。

我望向發叔⋯⋯白背心短褲人字拖，唔⋯⋯睇嚟唔係睇中佢靚仔。

「喵喵，除咗發叔仲有無人餵你哋食嘢？」

喵喵呆望我一陣，再答：「另外有兩個嘅，做喵？」

「三色妹會唔會出嚟食嘢？」





喵喵打喊露：「嗚啊～無呀，淨係依個人類嚟餵嘢食先會過嚟。我眼瞓喇。」

喵喵合埋眼，喺我面前攤屍：「快啲摸我。」

「答埋我先，今個星期發生咩事之後三色妹變成咁？」

喵喵好似條蟲咁喺地下捵嚟捵去：「鬼記得咩。」貓嘅大腦大約等同一個兩三歲嘅小朋友，唔記得發生咩事都無辦法。

我一下一下掃喵喵背脊，佢舒服到嚕嚕嚕咁叫。

線索斷咗。我轉身望向嗰幾隻食緊嘢嘅流浪貓，隻隻傻更更喺度𡁻𡁻𡁻，望下我又繼續食。