是咁的，我嘅職業係動物傳心師: 35.我嘅信念

即管碰運氣去問下。「唔該，我想問下你哋⋯⋯」

幾隻流浪貓懶得理我，我好似嚟到香港因爲講普通話而無人理嘅台灣人。

發叔見我無晒辦法，笑笑口：「佢哋掛住食係咁㗎喇，你有咩可以問我吖。」

「你知咩事就唔使搵我嚟啦，不過都無法喇，大佬灰又話要瞓覺⋯⋯」

發叔望向大佬灰，見佢真係瞓咗，好佩服咁同我講：「真係英雄出少年。」





「唔好咁講啦，其實動物傳心都好多人識。」好幾年前我已經見過日本嘅傳心師上節目，當然實際上真定假就唔知啦，但當故仔睇係幾感人嘅。

「好多人識？阿叔成日以為係超能力嚟。」我依種其實真係超能力嚟，不過其他人係點我就真係唔知。世界咁大，連我依家嘅超能力都可以存在，咁有另外流派嘅動物傳心術一啲都唔出奇。

而自從有咗能力之後，我都比較相信啲怪力亂神嘢；既然可以有超能力，咁妖魔鬼怪神仙精靈外星人未來人依啲，會存在都唔出奇。

「嗱我自己就真係超能力嚟嘅，但唔排除其他傳心師有非超能力類型嘅傳心方法。」

發叔對依個話題好有興趣：「睇你同大佬灰講嘢都似係超能力。咁你點睇近排新聞報導嗰堆神棍？」





「無咩點睇，我嘅信念好簡單。」

真係有能力，就去幫人；但無能力，唔可以扮有，去呃人。