是咁的，我嘅職業係動物傳心師: 33.奴才

「咁佢實在係嬲緊乜？係喎，你點知佢係女仔？你都無行過去睇⋯⋯佢話你知？定聽聲？」發叔對我點知三色妹嘅性別有啲好奇。

「三色妹話唔想同我傾。仲有我傳心係聽唔出係男定女㗎⋯⋯係依隻貓話我知。」

「哇，大佬灰都同你講嘢呀？真心有料到喎後生仔。」

大佬灰望住我，眼神精靈。

「大佬灰，你話佢一路都咁奇怪，點奇怪法？」





大佬灰用後腳搲痕。

「邊個大佬灰？」

「你咯。」

「吓？邊個改㗎？」我又指一指發叔。

「你叫佢咪亂改名啦。」





「咁我要點叫你呀？」

「佢哋叫我做喵喵。」

「咁呀喵喵，你可唔可以話我知佢點怪法呀？」

「係喵喵！唔係呀喵喵！」

我伸出拳頭，手指喺佢下巴有節奏咁郁郁下。





「呀哈哈⋯⋯唔好停～唔好停呀～」喵喵好舒服咁合埋眼。

「話～我～知～啦～」

喵喵好舒服，個樣就嚟高潮咁款，我突然停手。

「喂！奴才，繼續呀！」

「你就奴才，快啲講啦。」