是咁的，我嘅職業係動物傳心師: 32.三色妹

「發叔，三色仔叫你吔屎喎。」

發叔傻眼：「咁真係幾大鑊喎。」

「三色仔，你要唔要同我傾下呀？」

「唔傾呀！你再埋嚟我咬你㗎！」三色仔露出尖牙，實在好難想像佢之前可以有幾乖。

佢家陣咁具攻擊性，被受獲動物協會同漁農署啲人見到實捉佢去人道毀滅。





「哎呀，你咪理佢啦，佢向來都係怪貓嚟㗎。」一隻灰貓跳到我旁邊嘅草地，向我喵喵叫。

「你又乜水？」

「我？我咪依度嘅貓囉，佢哋都係我啲𡃁，唯獨依條女唔係。」

「哦佢係女嚟咩？」

「女嚟。」





唔怪得聽到我叫佢三色仔，佢會咁大反應。

我拍一拍發叔：「大佬，三色仔係女嚟喎。」

發叔一個晴天霹靂：「有啲咁嘅事咩？佢嬲我叫錯佢做仔呀？」

我諗一諗，語言唔互通，睇個款，三色妹係啱啱我叫佢嗰陣，先知自己被發叔當咗係男仔，咁三色仔⋯⋯三色妹性情大變自然唔關個名事。

「我諗就唔關你點叫佢事。」