從前有個校長，佢禁錮左全校學生【更新至第二十一章】: 第十四章

8:30
「D字真係抹唔甩！」歪兒副主席用濕毛巾喺黑板上面來回擦拭，但漸漸因為鐵質鏽蝕而變色嘅血字就一絲不改咁留喺黑板，就好似要時刻提醒我地呢個遊戲嘅規則同呢個真係現實。

「咁財政同曾凱澄係咪要返去2D？呢度寫話以班別為伍。」樂基指住黑板第六行話

呢句話某程度上就係暗示，佢地兩個由規則宣布開始，就已經係我地嘅對手。

「咁我地而家走囉。」maggie唔咸唔淡咁講

無記錯maggie 嘅技能就係亞馬遜族，係一個一流嘅女戰士，好彩嘅係所有15個亞馬遜族係唔可以互相廝殺同傷害，反而要協助對方，may嘅存在可以幫我哋避免受到亞馬遜族嘅攻擊，增加勝算。





就好似我之前所講，消滅怪物要用非常手段，呢件事容後再想。

Maggie拉開走廊嘅窗，不費吹灰之力就輕易跳咗出去，然後以閃電般嘅速度跑走。平時體育攞A嘅財政，因不幸抽中「烏龜」，所以身手不如以往，但防禦力則大增，根本就係刀槍不入。受到婉如侮辱嘅行為，財政淡淡一笑置之，然後徐徐推門離開。

8:32
「ok，咁我地係時候傾下點樣先可以成為勝利者之一。」Kitty喺2D兩個人走左之後提議

「我地而家就即刻去揾隻怪物然後殺死佢！」抽中筋肉人嘅陳伯立即顯示出佢個腦少左條筋。





「如果而家出去，就極有可能見到其他好似你一樣都係行事魯莽嘅班別去揾怪物，但係如果怪物係咁易對付，咁我地仲要企喺度咩？」kyla話

「如果遊戲係由我地被困嗰一刻開始，咁我地就已經有勝利嘅籌碼，頭先我哋幾個已經對怪物造成少少傷害」Joey認真咁講

言下之意，我地好食懶非幾日都唔會輸，因為我地試過火燒曱甴，又用我部手機仆濕佢個死人頭，傷害值唔多唔少都有5%呱？只要扣多佢少少血就可以肯定入到勝者行列，除非……

應該無事嘅，我仍然堅持消滅佢地要用不正常嘅手段，遊戲係唔會咁簡單。

「但係我哋面對嘅係唔止一隻怪物，目前已知嘅有兩隻，但可能有更多，我地唔可以肯定我地已經勝券在握」「智者」mandy快速反駁





全班再次陷入僵局

「鈴鈴鈴鈴鈴……」

熟悉嘅鐘聲準時喺8:40響起，平時我地知係上堂嘅鐘聲，平時總有人會偷偷地扮去廁所黎開locker，平時亦有人趁班主任節完咗就繼續馬不停蹄咁抄功課……

「早晨各位同學，煩請每一班嘅電腦管理員開電腦」呢把聲係屬於一個好多年前喺度讀嘅師姐所錄低，兩年黎，上堂落堂定要去禮堂周會，都會聽到呢把悅耳嘅聲音。

呢一刻，我地全班無奈一笑，因為電腦管理員就正正係死去嘅胡基言同失蹤嘅邱淳。

「若無電腦管理員，請班長代勞」

8:41
男班順利將電腦開啟並根據指示，登入左校長嘅帳戶，其實我哋係咪已經算犯法？





一登入成功，桌面就自動轉為被老師操控嘅畫面，並投射到黑板上。但係黑板太過模糊所以靠近嗰邊嘅同學就將投影幕拉低。

噢賣尷!之前我所講嘅好食懶非計劃已經唔可行，更危險嘅係我哋班已經招來殺機……