從前有個校長，佢禁錮左全校學生【更新至第二十一章】: 第八章

14:15
喺我地下定決心要落去睇下後，我地就展開將實驗室反轉再反轉嘅行動，咩咩手術刀、火槍甚至滅火筒全部都被我地一掃而空。

「喂！部電腦仲用到㗎！仲要上到網添！」Joey語氣帶D興咁講，無他，一般災難性小說都會話手機無信號上唔到網，甚至連任何電子用品都開唔到，但現實終歸現實，而家部電腦又真係上到網呀嘛！

「但係呢度嘅時間顯示明顯有D問題，會唔會係中左毒㗎？」Joey開始有少少紀人憂天，微微皺眉頭，有一種淡淡嘅西施感覺。電腦右下角顯示住一堆亂碼，各種符號轉換不停，令人眼花撩亂。

「而家咪下午兩點三囉，唔好理咁多啦，上下Facebook 高登求救啦！」咸魚望一望手錶再焦躁咁講。

雖然電腦上到網係好事，但係又點會咁順利俾你揾到救兵？如果咁易就走得甩咁仲邊有故講？同埋個校長都唔會咁樣低估我地啦，話曬呢間都係全港頭五十嘅中學，入面嘅學生都唔會咁智障㗎。





「妖，load到未呀？！」咸魚再次爆粗。

望向螢幕，見到佢地已經用咸魚嘅帳戶login左入Facebook，停留喺《建立帖子》嘅介面，上面寫左《我地被困喺董中，求救！》。畫面濛濛糊糊，彷彿有一層濃霧覆蓋，睇黎佢地已經㩒左《分享》嘅按鈕，但畫面就係持續有一個圓圈不停咁轉，如我所料，呢D嘢又點會咁易啊～

求其叫佢地放棄之後我就拉住蕭永同moon入去助理室。助理室比我想像之嘅大，起碼可以幾個同佛祖一樣嘅“重量級人物”，助理室有各種化學氣體同液體，亦有不少大型嘅工具同示範模型，見到入面嘅物資，我地不禁倒抽一口氣，諗到一陣可以創作危險嘅生化武器，就忍唔住偷笑。根據我地之前上科學堂所學到知識，就淨係知氫係超級易燃，咁既然部電腦用唔到黎求救咁就用黎“自救”啦！

維基百科真心唔係路，一查易燃嘅氣體就揾到大量資訊，到而家我先知原來烷都分左四種（甲乙丙丁），以前真係井底之蛙，到底呢兩年我上堂做過D乜嘢？係Man Sir無講過定我地無聽書？我諗應該係前者。 助理室入面只有常見嘅甲烷、硫化氫同為數不少嘅氫氣，所有氣體都存放左喺玻璃試管中。我突然心生一計，如果將試管嘅瓶塞改為一D易燃又高密度嘅物件，咁見到怪物就用火槍喺瓶蓋點火，咁咪高效率D囉～我將我嘅想法話俾佢地聽，之後就開始揾合符標準嘅物品。

15:14




足足一個鐘，我地先揾齊架餐整裝待發。我地最後決定用毛巾同A4紙狠狠咁塞住個瓶口，此外，我地仲揾左D苯同汽油，再小心翼翼咁將液體倒入試管再用毛巾塞住，而家全部武器放曬喺moon個袋入面（佢有個習慣就係帶個袋黎裝住所有書，雖然佢D書俾我地抌曬，但呢個時候個袋就有一定嘅重要性），而我地每人都分別拎住一瓶氣體同一瓶液體，仲有一枝火槍。

15:16
由於我地足足有成六個人，所以行動必須有組織，我地以每個人嘅攻擊力作為分配位置，攻擊力最強嘅就分別企喺隊頭同隊尾，中間嘅就係弱雞D嘅隊友，即係我同moon，希望我地唔會雷到家黑到底。

15:18
原本由五樓落到去二樓都無事㗎，點知一到一樓就奶嘢，行喺隊頭嘅蕭永不幸同一隻好似曾經俾人踩爆左個頭但個頭又無甩，以致一D壞疑係曱甴血嘅白色液體敞喺一張不似曱甴形嘅臉嘅巨型曱甴對視。

隻曱甴就喺art room門外，而我地就喺遙遠嘅前梯，原本應河水不氾井水，但一下對視，隻嘢就好似發癲咁衝過黎，眼見隻嘢愈來愈近，我唔想再做齋食花生同無鞋揾屐走嗰個，所以我決定今次小試牛刀，抱住不成功便成仁嘅心態將身上其中一枝化學品點火再抌出去。





結果超乎我想像，熊熊烈火配合令人振奮嘅劇烈爆炸喺1D班房門口發生，唔知2A班嘅人喺入面會有咩反應。其實我都幾肯定全部F1都走曬，佢地D課室都熄曬燈，就算遠距離都感覺到入面一片死寂。

呢埸爆為我地拖延不少時間，所以我地只好連滾帶跑咁碌落樓梯，連隊形都無埋。

（2A：「哇！做乜爆炸呀」下刪粗口）

15:19
「真係連前門都鎖埋，洗唔洗咁呀？」Chloe惱羞了。

睇書睇得多嘅好處就係可以喺呢種情況做個預言家，對現況更易理解同接受。

「Chloe！！！」突然我地身後傳黎一把女聲。

拎轉就見到舊年嘅女班長maggie同財政企喺校務處門口佢地而家係2D精英班嘅人而佢地喺度對我地招手。此時，我地上方傳一聲令人毛骨悚然嘅低鳴，同時原本燒得霹靂啪喇作響嘅烈火，似乎開始慢慢變得細聲（全部人入面好似得我一個係聽力正常），難保隻怪唔會突破火場不顧一切咁落黎揾我地。佢地都意識都而家我地身處喺一個危險死角位，一但隻怪落到黎，我地都好難可以全身而退，最多用盡身上武器黎個玉石俱焚攬炒，所以二話不說過左去maggie佢地嗰度。





15:20
財政喺度不停用力踢門，意圖將門踢爛。

「智障呀？做乜9呀？」咸魚同財政喺小學同學，自然出言不遜。

「我地諗住入去攞部電話睇下發生咩事啫……」財政有D尷尬咁掃下佢個頭。

蕭永一把將佢地推開，利用喺實驗室拎到嘅滅火筒用盡飲奶力敲落門鎖度，敲左兩下之後就大叫：「yo你呀？都無鎖！度門拉㗎！」

而家連maggie都有D尷尬，呢兩個“精英”到底做乜嘢呀，智商直線下降。與此同時，前門傳黎砰嘅一聲，原來隻曱甴已經脫離火海，仲成隻盲頭烏蠅咁撞左落校門嘅鐵閘，但佢一見到我呢個縱火狂徒，就起勢咁跑過黎。

所謂橋唔怕舊，最怕用唔著啫。我將淨返嗰支化學炸彈點著再抌向佢面前，然後就即刻入左去校務處嗰間房，使勁閂埋門，再同maggie 合力將最近嗰張木枱推去門口，但由於度門係喺出門拉，所以都起唔到D咩作用。

與此同時我聽外面傳來異常大聲嘅嚎叫





話唔定佢連門都唔使用就可以入到嚟……