從前有個校長，佢禁錮左全校學生【更新至第二十一章】: 第七章

【李佑年視覺】
14:12
Science lab係一個正方形嘅空間，大約有10米×10米左右，如果由鳥視嘅角度就會見到防火門位於右上角，隔離係兩塊旋轉式黑板同教師桌仲有投影幕。左上角係實驗室助理同擺放各種工具嘅房間，從來都無人入過去，所以都無人知佢嘅面積。實驗室中心擺放左八張長枱，每張長枱有有開放式嘅櫃桶，以防上堂有學生做其他嘢。實驗室嘅其中三面都有長枱同洗手盆，用黎做實驗，其中兩張長枱上方有一排窗，可以望到對面嘅小保良。平時上堂我同咸魚就坐喺第四組（左下角位置），以前Man sir成日有意無意咁針對我地嗰組同蕭永嗰組（第二組），但又較少針對我。可惜，而家唔係平時，而家係似真又帶點虛幻嘅情況。

頭先我推左蕭永上半層之後，佢就爆發出running test頭三嘅本事，一口氣跑左上science lab，而我只好用盡追巴士嘅力量去跑，畢竟我running test係攞尾三。上到去幾秒後就見到Chloe推開防火門入黎，緊貼在後嘅係Joey，然後就係moon同長跑好渣但短幾好嘅咸魚。所有人都心有餘悸，氣喘吁吁，對於頭先嘅事感到好奇又恐懼。
「而家應該要點？」moon率先打破可怕嘅沉默，問出一條重要嘅問題。
「應該會有老師黎㗎可？」Chloe都唔太肯定
「算啦，無人會黎。」咸魚坐喺望到小保良嗰邊嘅長枱則邊，伸出半個頭往窗外面睇。喺好奇心驅使下我都行左過去睇，突然心內一股無名火升起，因為我見到我地個副校長企喺校園外跪喺度搞緊個後門，就喺佢企返起身嗰一刻，有一陣不尋常嘅風吹上黎，有一種令人心寒嘅感覺……奇怪嘅係怪風過望返過去，佢竟然成個人消失左，就算跑得幾快都無可能會瞬間走出我地嘅視野範圍。
「呢度發生左D事，我可以相信全校老師都走曬，而校長嗰堆人應該係主謀！」咁都好合理，副校長咪又係校長嘅跑腿。可能係我平時睇得較多災難/偵探小說所以都較快冷靜落黎，再者，凡事有因先會有果，我地被人韞住喺度，即係代表我地做過D嘢先會咁。只要揾到原因，就可能會揾到出路啦！我將我嘅理據話俾其他人知，「你又肯定我地韞住左？後門唔係只可以喺入邊鎖㗎咋咩？可能前門未鎖呢！」Joey問
其實Joey都講得啱，雖然小說同電影從來都唔會咁簡單，但係博一博單車都可以變摩托啦，咁去下都無妨ge。




「咁我地落去睇下囉，可能隻怪物走左呢？不過貿貿然行落去都有一定風險，我地喺度摷下有無D嘢可以當下武器啦！」蕭永向我地提議，咁我地都一致同意，同埋呢度始終都係實驗室分分鐘可能會有氣體可以加熱會著火之類，睇黎今次會幾好玩。

Game On，而家我地就去迎接令人心身發毛嘅現實同歷險