從前有個校長，佢禁錮左全校學生【更新至第二十一章】: 第九章

15:21
啱啱閂埋門，就聽到一聲嘶心裂肺嘅怒吼，唔知係因為佢俾我地再次走甩定係因為我一次又一次咁縱火而令佢大發雷霆，諗到呢度就令人忍俊不禁。可惜我身上嘅化學炸彈已經用曬，同埋其他人又要將自己嘅武器分享俾maggie同財政，所以我只有一枝火槍當係武器，攞黎插眼應該有D用呱？

「小年，放火放得好呀，消防員多得你唔少。」moon對我豎起拇指，半諷刺半讚賞咁講。
「…………」我都唔知點答佢好，唯有舉起中指回應「我記得呢度有鎖匙㗎，唔使嘢嘢都爆鎖既~」我指住牆上一個深灰色嘅鐵箱，我地入黎嘅目的除左避難仲要係攞返我地部電話，喺我地咁多人之中就只有蕭永同moon無帶電話返學（絕對唔係因為佢地守校規），而咁啱喺一個月之前我因為太遲攞電話，搞到差D因校務處閂門而趕唔切，最後一個疑似秘書嘅人喺個灰色箱度拎左條銅色嘅鎖匙出黎開左副校長室隔離嘅房門將我嗰部孤零零嘅湖水綠色手機拎俾我，所以我先知條鎖匙嘅位置。

15:22
「攞齊啦嘛？咁行啦！我地各自返反去自己嗰班啦！」咸魚對我地發號施令，其實佢喺日常生活又真係幾次大家姐既，不過諗嘢就唔係太成熟。

喺呢個時候，財政行左過去道門度，將耳仔貼埋門小心傾聽。半响，「我諗佢已經走左。」財政用一種自信嘅聲音講，眼神中沒有一絲猶豫不決。說罷，佢馬上推開門。





「哇！仆街！」一開門竟然見到一隻成身都係焦黑色，仲隱隱約約見到有少少火苗喺身嘅曱甴企喺我地臉前，就算睇唔到佢有五觀，都感覺到佢嘅笑意，睇黎今次我地都將成為佢嘅囊中之物。

15:23
財政無一刻嘅猶豫，立即將身後嘅木枱上面嘅筆筒、文件、沙煲冷餐全部抌曬去怪物身上，意圖與怪物拉遠距離。
「匿埋！」唔知邊個大叫，下一秒就啪一聲熄曬燈
我地即刻走去最近嘅藏身處，我去左一個位於兩個櫃之間嘅凹位，除非佢入左黎之後刻意拎轉頭，否則就算佢喺副校長室同電話房出返黎都唔會見到我，造成視覺盲點。
呢個時候財政趁佢同怪物之間有左一定嘅距離就即刻用力閂左門，再打個關抖去大理石枱（呢個時候隻怪物喺度撞門），順勢匿入枱底。下一秒，隻怪物就破門而入，叮嚀一聲，門鎖都因蕭永同怪物嘅猛烈撞擊而損壞，應聲跌落地。怪物發出「嘶吼嘶吼」嘅呼吸聲，仲聽得出佢有D興奮。

15:24




由我嘅藏身處可以見到原本啡色嘅曱甴因為我嘅傑作而變得焦黑，仲帶仲濃烈嘅燶味，幾乎同昏暗嘅環境溶為一體，唯有暗暗發紅發光嘅火苗分別出兩者。強烈嘅燶超級嗆鼻，搞到我差少少咳左出黎，好彩我及時忍屏住氣息，否則呢度八個人條名就斷送喺我口中…………

「叮…………」忽然一個厚約五蚊銀嘅硬幣，從我右上方擲出，並落喺助理校長室入面，由角度可以估到應該係Chloe嘅暗號。原本隻怪物係喺電話房入面，一聽到聲響就發出嘿嘿嘅笑聲再慢慢行過去，佢大概以為有人喺入面仲嚇到震曬，我對佢嘅感覺就係佢好有惡趣味。

等佢身影完全沒入助理校長室之後，一直匿埋喺嗰間房隔離個櫃暗角位嘅咸魚出盡全力將身旁嘅櫃踢冧，倒塞門口，同一時間全部燈突然開啟，只見Joey企喺燈制側邊， 不停打手勢叫我哋走，所有人同一時間紛紛逃跑，呢一刻又傳黎熟悉嘅咆哮，相信開燈呢下動作為佢造成短暫失明。

兩秒仆到去門口嘅我，見到Joey又將燈啪熄曬，突如其來嘅變化令怪物跌左下，發出砰砰巨響。眼見危機近在咫尺，我地半推半就混亂咁走左出黎。就喺最後一秒我地打算閂門嘅一刻（同時咸魚蕭永玩緊亡命奔逃），隻怪物伸出手捉住隊尾嘅Joey……

突然，我唔知發咩神經，將部電話掉出去，成件事轉為慢動作play，被湖水綠色布質手機套包住嘅三星galaxy J7以旋轉姿態慢慢飛向一面驚嚇嘅Joey……身後面目猙獰嘅怪物。正當怪物仍然喜形於色，忽略眼前嘅危機，手機喺佢醜陋嘅臉上著陸，發出低沉嘅碎裂聲，曱甴堅硬嘅頭部出現幾道裂痕，一下吃痛，逼使雙手放鬆。重新獲得自由嘅Joey立即加入亡命奔跑嘅行列，而我一攞返部電話就用跑running test百分二百嘅速度跟返大隊。









……………………今日李佑年爆技，成功三次激嬲隻曱甴，為團隊拖延逃生嘅時間，喺隊伍揾到自己嘅價值，喺佢嘅欲望世界重生找到生存嘅意義……………………