從前有個校長，佢禁錮左全校學生【更新至第二十一章】: 第六章

※留D神秘感，今集用人物A嘅視感※
※人物A係一個超厭世嘅人※

一波又一波嘅壓迫感連綿不斷咁襲黎，成個世界嘅海水都好似沸騰起黎，地在動天在搖，相傳幾億年前嘅盤古以四肢支撐天地，經歷多個世紀嘅變化，為人類嘅進化作出見證。無論喺恐龍時期定冰河紀抑或石器時代，每一分每一秒都係世界轉變嘅歷史，當真正嘅災難襲黎，以往人類會逃命、保護自己所重視嘅嘢以及救人，但而家嘅人類都學識左一樣嘢，就係坐視不理同見死不救，到底人類係進步定退步？

當無助嘅胡基言不停咁敲門拍窗嗰陣，有邊個去救佢？當隻變異青蛙撲喺胡基言身上，有邊個唔係食花生？恐懼令人類喪失本性，而且當死嗰個又唔係你自己或者係你最重要嘅人，咁所有人都會心存僥倖，再者今次死嘅係無人鍾意嘅人，受全班討厭嘅人，咁重會有邊個去同情去傷心？

有一點我好肯定，就係無論有幾憎佢都無人會出去睇下佢點死……
。。。。。。。三分鐘前。。。。。。。
「啊！」「救命呀！」「好X大隻青蛙啊！」「仆街，係咪拍戲呀？」





由於我係今日嘅值日生所以要check曬喺上去上堂之前所有班房嘅電器都熄曬先可以上去。但係啱啱出門口，就聽到上方傳黎陣尖叫聲同腳步聲，我仲未反應得切，就見到一個皮膚拗黑嘅人由樓梯極速跑向我身後嘅課室，眼角見到佢應該係李樂基，果然大難臨頭，男仔係靠唔住。


。。。。一分鐘後。。。。
班房入面有人喘氣，有人受傷流血不止，有人狂標冷汗，但就偏偏無人出聲。好彩我地明智咁將最接近門口嘅枱櫈搬曬去門口度擋住。

。。。。沉默左一段長時間。。。。

「呃有無人知發生咩事呀？」我地嘅主席kitty





「痴線，唔好問住先啦，咁鬼多人流血，係咪想成地紅色先滿意？」羅雨韋一臉不屑咁對kitty講

「咁叻你去包紮囉！」張文柔細聲咁反擊

「點啫？係咪要打先？」羅雨韋舉起拳頭

「要打就出門口啦！」kitty冷靜咁講一句

雖然羅雨韋係衝動派嘅人，但都唔係完全無腦（高分低能），聽到要出去同隻怪物同處一室，點扮都睇得出佢淆底啦。





「有邊D人無返到黎課室？」kitty問

「陳晞瑤、胡基言、李佑年、蕭永、周月怡、譚翠如、蔡沛瑩、朱詠賢，仲有由中文堂開始就失蹤嘅邱淳。」副主席歪兒同kitty講

「我而家想重整班會職位，根據頭先見到嘅嘢，我相信我地有必要作出第一次嘅團結，我希望大家唔會阻止。」kitty有意無意咁望向羅雨韋同Tony「如果隻怪係真嘅……」講到呢度突然有一聲「啊！！！！」打斷kitty嘅偉論。
「呃……如果隻怪係真嘅，咁我地團結都係未雨綢繆，如果係假咁咪得啖笑囉，咁大家……」
「救命呀！」
「……有無異議？」
「砰！」突然門外傳黎拍門聲，大部分人都嚇左一跳，然後我地見到胡基言喺出面撞門。「開門呀！」佢不停咁撞門發出巨大聲響。有幾個男仔想行過去搬開D枱枱櫈櫈，但就喺關鍵時刻我叫停左佢地：「等等，如果我地而家開門，你覺得我地會唔會有危險？如果犧牲佢，我地可以唔使俾隻怪殺，咁都扺啦係咪先？」

聽完嗰D男仔一一卻步，我知佢地諗咩，只要死嘅唔係自己咁又有咩所謂，簡直係頭腦簡單。

「吼！」樓梯嗰面傳黎可怕嘅叫聲同冷笑聲，出面嘅胡基言都停止動作，準備迎接死神嘅到來。呢一刻我終於見到嗰隻怪物嘅真面目，佢係一隻成身都係血嘅凸眼青蛙，喺佢頭同身體嘅交接位有一條血淋淋嘅傷口，臉上更有一個扭曲嘅笑容，嘴角流出一條又一條嘅血液，恐怖至極。佢以高速撲向胡基言，然後嘅情況有D三級，之後外面嘅玻璃窗同地板都染成紅色，擁有陣陣腥臭味嘅血液喺窗口慢慢流落嚟，令人驚心動魄。





當出面嘅慘叫聲完全消失，嗰隻怪物以一個高深莫測嘅眼神望住我地，就好似同我地講話要我地小心D，仲提醒我地而家唔係發夢，所有嘢都係真實，同埋我地係無戴住VR。