從前有個校長，佢禁錮左全校學生【更新至第二十一章】: 第五章

※今集有D唔同，會切換其他人嘅視覺，今集使用胡基言視覺，所以將會有少少簡介※
胡基言（基本資料去人物介紹睇）係一個正常人唔會對佢有好感嘅人，亦係一個標準抖M（被虐狂），一日唔俾人鬧，唔俾人打會死，每次做錯嘢都唔知錯，仲成日講咩so9ry，勁嬲打。佢亦係一個運動好差但皮膚好黑，又核突嘅肥仔，當然佢唔係個樣核突咁膚淺，而係佢嘅言行舉止談吐好核突，特別係上堂採礦，仲要周圍彈。【以上簡介並無任何惡意或者影射成分】

＜胡基言視覺＞
13:58
「梁老師！梁老師！邱淳係咪跌左落屎坑呀？」我對全班大叫
無人理我，咁唯有再大聲D啦……
「邱！淳！係！咪！跌！左！落！……」
「係呀係呀！唔該你收聲啦！😡」由於中文堂而同Joey調左位ge李佑年對我唔耐煩咁講。我真心唔想理佢囉，八婆……
「關唔關你事呀？」




「喂大佬，你咁鬼大聲，聾啦，顧下人地感受好無？」挑，又唔見你顧下我感受
「好啦，胡基言，唔該你唔好再嘈如果唔係我以你擾亂課堂秩序扣兩分。」梁老師嚴格咁對我講。
李佑年以一副勝利嘅樣子望我一眼又拎返去前面。
超，好叻咩？李佑年有老師叉腰有幾勁？本大爺有嘅係操行分，扣咪扣囉。
不過我都唔敢公然咁同老師作對，咁唯有用唔服氣嘅樣望住老師，橫掂佢都吹我唔漲㗎啦。。。

14:05
邱淳到而家都未返黎，早知我都陪佢一齊走堂啦！梁老師為左揾條粉樣，一落堂就一粒聲都唔講就快步就離開左課室，甚至連佢跌左張紙都唔知，不過我係唔會拎返張紙俾佢，我連鞋都唔想擦啦。下一堂仲要係由死人文sir教嘅綜合科學，尸口巾，佢又會針對啦……
點解成堆人塞曬喺樓梯口㗎，頂，再唔行又被人罰抄㗎啦！





大隊步行嘅速度慢到好似無郁咁，向上望一望，頂！放眼盡是春光呀！🙈🙈🙈
「喂！行啦！遲左又被人罵㗎啦！」「Joey，做咩唔行呀？」「行幾層樓都咁」「樓下可唔可以收一收皮呀？」

「啊！！！！」「走……走啊！」突然有兩把尖叫嘅女聲發出，然後本身擠曬喺三樓嘅人而家不停向下跑，更夾雜幾聲慘叫同尖叫聲。而我嘅好奇心戰勝理智，我同湧落黎嘅人往相反方向跑，彷如三文魚咁排除萬難逆流而上，但當然我唔係上去產卵，我係上去睇下發生“咩事”

14:10
what the ****！呢度係四樓？係我讀左兩年嘅學校嘅四樓？呢度……根本無可能，肯定係AV team拍宣傳片啫，套句肥yo講嘅說話：搞笑呀？

「啊……救我呀……救……命……」一個手無搏雞之力嘅女生躺喺血淋淋嘅階磚地上作出無意義嘅掙扎同求救聲。有一刻，我想過去救佢，做一個無賴英雄，但喺腦中僅存嘅理智停止曬我所以嘅動作。一隻成身都係血仲要放大幾倍嘅蟾蜍喺度用佢嘅血盆大口在女生身上吸血，並無所不用其絕咁將女生身上劃出一道又一道嘅傷口，所有傷口都流出源源不絕嘅鮮血，而女生嘅臉龐則好比白紙一樣蒼白，形成強烈對比，佢係陳晞瑤，一個甚少返學嘅影子學生。





佢幾秒鐘嘅掙扎本應為我帶黎逃走嘅機會，但我就掛住食花生，完全忘記逃走呢件事，今次仆街啦，陳晞瑤早已經失去意識淹淹一息，而個隻怪物邊抹去嘴巴則邊嘅血一邊將下一個目標人物鎖定。成層樓根本人影都無，更唔好話課室嘅人，最近嘅5E課室裡面到處都係血，血流成河，細心咁望都會見到有少少散星肉碎喺地上，令人咋舌😵😵，但奇怪嘅係入面完全無屍體。

下一個目標係我，由怪物似笑非笑嘅樣子可以知道，我已經走投無路啦，面對生死關頭，我到底要硬碰硬定做縮頭烏龜？

「吼！！！」眼前嘅怪物又咆哮一聲，算啦，烏龜都幾啱我做。

「啊！！！……」仲未黎得切走第一步，就感覺到背後有強勁嘅壓力壓落黎。

突然腹部傳黎強烈劇痛，一隻利如刀嘅爪狠狠地由我背後插入下腹，秒間一條血柱毫不留情地由腹部噴出，強烈嘅痛楚由傷口蔓延至身體各處，身上每一個細胞都沸騰起黎，對外力作出激烈反抗。

怪物將佢嗰個醜不拉磯嘅頭慢慢靠近我嘅頸部，唔通隻青蛙係gay？就算死，我都要保菊花！我兩隻雞腳用力一蹬，如我所料，怪物被我踢得步履不穩咁後退幾步，為我爭取到小小時間。

我隨手執起個筆袋，再將佢掉向怪物度，然後連跑帶滾咁衝落樓梯。落到二樓，我彷彿見到生命嘅曙光，希望嘅温暖。「砰！」點解課室會開唔到門㗎？點解……

課室門嘅另一面被大量嘅枱同櫈塞住，撞門只會引起無意義嘅砰砰聲。「開門呀！」「快D開門呀！」「砰砰！！」幾聲我感覺到另一面嘅雜物冧咗落嚟，加倍阻塞門口通道。樓梯嗰邊再次爆出咆哮聲連帶幾聲令人心寒嘅笑聲，今次GG了