從前有個校長，佢禁錮左全校學生【更新至第二十一章】: 第四章

14:00
梁老師諗左一諗，然後話：「好啦，唔該班長，我地繼續上堂先，落左堂老師先再處理。」無疑，老師一方面對受到消息所影響而靜曬嘅同學感到高興，另一方面又失蹤嘅同學感覺焦急，任何1人都可以見到老師心中正上映住一場激烈嘅天人交戰----責任與欲望。最後佢被欲望戰勝，決定落左堂先去展開尋人記。反正邱淳都逃唔出學校嘅“ 手指罅（音la）”，無論點都唔會消失ge。

14:05
自從梁老師表現到一臉唔在乎到底邱淳係咪失蹤，班上就出現左難得嘅寧靜，可能唔係全部人都認真聽書，但起碼無人出聲。「叮叮叮叮……」落堂鐘聲響啦，梁老師連再見都無同我地講就一支箭咁走出課室，睇黎口裏話唔太重要，仲表現到唔在乎咁，但始終喺學校唔見左一個人都有一定影響同重要性。之後兩堂係難捱嘅科學堂，science係幾好玩，只係我地個老師兼班主任Man sir有D難頂啫。

當個阿sir正常嘅時候都接受到，只係無乜人見過佢正常啫，佢係典型針對學生類型嘅老師。根據某被針對嘅當時人表示佢教書又教得垃圾，日日都好似女人更年期/m到，堂堂講一兩句嘢又話咩擾亂課室秩序要扣分，重點係考試內容又教唔曬，成日剩係識講廢話……（下刪100字）

總結：所謂執輸行頭慘過敗家，遇著呢種老師，就白白洩左兩年science嘅光陰同成績。





14:10
由於今日係連續兩堂science，所以我地要上去五樓嘅science lab（科學實驗室）。中一至中二係上五樓嘅實驗室上IS（綜合科學），中三之後就分別去Phy,Chem,Bio嘅實驗室，我個人對，biology（生物）都有少少興趣，不過到而家對解剖呢樣嘢有D驚驚🙈，相反蕭永就對呢樣嘢有濃厚興趣。

「屌！咩味黎㗎 😖」蕭永喺我隔離講，我地而家喺全班上實驗室嘅隊頭，啱啱上左一層，就聞到濃烈嘅腥臭味。
「做咩呀？樓上bio lab劏豬呀？」企喺我後面嘅moon疑惑咁問。
黎到呢度，我地開始猶豫緊要唔要繼續行。喺三樓同四樓之間嘅過度層，可以見到四樓嘅課室5E熄曬燈，甚至連老師講課嘅聲音都無。「頂，前面做咩唔行呀？」「喂，快D啦！遲到俾man sir記名㗎！」下方傳來陣陣投訴聲，咁唯有硬着頭皮向前行。

四樓嘅環境滿目蒼荑，地上有一條又一條嘅血路由5E課室伸延至物理室，陣陣嘅血腥味傳黎「當睇唔睇，幻覺嚟㗎啫，嚇我唔到㗎……」我企圖為自己壯膽。

「依埃~」四樓嘅物理室傳黎開門聲，喺肅靜嘅環境下夾雜着幾聲不滿嘅語句，連如此細小嘅開門聲都可以嚇到我地得返半條命。




「頂！樓下嘅人可唔可以收一收皮呀！」企喺我地後面再後面嘅咸魚對下面大叫，結果只傳來更多嘅粗口。

一隻青蛙，唔係，係一隻怪物，一隻曾經被解剖，成身血肉模糊，比正常人大兩倍嘅青蛙。一道被大幾倍嘅刀傷橫過佢嘅腹部同頭部，傷口淌住半凝固嘅血，散發出丁點血光，傷口更加可以清楚見到內部嘅腸同骨頭。怪物胸口一下一下地跳動着，彷彿連心臟都要跳出黎。

怪物就係咁企喺度同已經嚇壞嘅我同蕭永對望，我不停深呼吸，克制住尖叫嘅衝動，但本身大膽嘅蕭永已經情不自禁尖叫左出黎。我喺意識游走中嘅腦海抓住一絲理智。
「走……走啊！」我用力推住動彈不得嘅蕭永向上跑，與此同時，怪物恰似發狂咁怒吼一聲。

怒吼伴隨住一堆混亂嘅尖叫同腳步聲，但我已經唔理啦，徹徹底底咁豁出去，並跟從人類生存第一原則：逃生。一切一切都與我無尤，只可以講一句：自求多福……而我地眼中只有一個目的地，sci lab，希望存活人數會比不幸嘅5E班多，希望可以“全班而退”，希望呢一切都係夢……
【假期生產力特別高(^ω^)】