《香港革命戰》(上): [22-內部事務] PART 3
我地三個行到過元朗領域之後，都見到有六個著住Sacred-Armor既行者喺道巡視。
係我地屯門領域既人...
咁樣算唔算得上已經係全面接收左元朗領域呢?
「講返關於呢邊既人想出去境外生活既問題先...」阿賢一邊扶住我行過去停泊喺路邊既黑色房車，一邊講...
當然，呢架房車都喺由我地喺屯門領域，決定要走過睇元朗領域睇睇既時候，EVE系統就已經為我地安排好。
但我就仲係好似唔係好習慣，兩邊領域既EVE已經接通返...
心裏面硬係覺得有D唔自然...
「我地尋晚向元朗領域既人民提出方案後...」阿賢扶左我上車後，阿風都坐左喺我隔離。
阿賢翹過車頭，坐到去前座後:「要求出去境外生活既人，數量都唔少...」
呢一層...預左架啦...
當年我地屯門領域一宣佈LILITH危機既時候，一樣有好多人民話要逃離SPIRIT，出去境外生活。
就算係無晒呢道既記憶、修行既成果，都要逃離SPIRIT要面對既險境。
我地架車開始喺公路上行走。
尋日我地就係喺呢條公路上奔跑...
阿風望一望窗外既景色:「咁則係有幾多要離開SPIRIT?」
「大約都有十萬…仲要不斷增加。」阿賢都留意一下車外四周。
『十萬人?!太多喇掛?!』初初我仲諗住一、兩萬都已經叫做多...十萬喎...仲要不斷增加梗?!
阿風擰擰頭:「太多喇。唔好話我地要用幾多時間...幾多人手…幾多LILITH幫佢地清除記憶...境外都容納唔到咁多人。」
無錯喇...境外咁細，點可能容納到咁多人呀?
「但我地唔可以阻止佢地既自由意志。」阿賢簡單咁講出重點...
阿風都點一點頭:「嗯...我地無權去阻止佢地既自由意志。」
無錯...我地唔可以咁做...
只要係佢地自己既意願...我地都無權去阻止...
但係...就算我地真係幫呢十幾萬人民洗腦，送佢地去境外，境外根本就無咁多地方容納咁多人...
點算呢?
點算好呢?
咁應該點做好呢?
我地仲可以點做呢?
阿賢透過倒後監視器望一望我:「唔可以拖得太耐架喇...而佢地既反應，情緒明顯唔穩定。如果拖得太耐，佢地有可能會癲。」
仲要唔可以拖太耐...
本身要處理審判程序就已經夠晒煩...
而家仲要處理埋元朗領域既人民...
「你唔應該咁做...你唔應該話個真相俾佢地知...你唔應該話個事實俾佢地知!你太年輕喇!你咁做係大錯特錯!哈哈哈~」難道...鄭穎心所講既...係岩既?
我真係唔應該話個真相俾佢地知?
話左個真相俾佢地知之後，只會發生更多無辦法處理既危機?
就好似而家咁...
我地一邊要處理審判程序，一邊又要同時面對元朗領域既人民要逃離SPIRIT既要求...
境外又無咁多地方容納咁多逆行者...
假如話審判之日黎到，我地可以出去地獄重建天堂就話姐...
咪住先...審判之日...重建天堂?!
係喎!
『咁同左呢道既人民講審判之日既事未?』差D都唔記得左添...
「無丫。我地仲未向呢道既人民提及，我地仲實行梗審判程序。」阿賢擰擰頭。
『咁就岩喇!你估我地將審判程序公佈埋既話，可唔可以拖耐多少少丫喇?』我問一問阿賢。
阿風望一望我:「呢層...又或者真係有得諗喎~」
『真係?』阿風竟然會認同我既講法?
阿風點一點頭:「嗯...因為而家既情況有D改善~或者真係可以再拖耐D都仲得~」
『有D改善?』邊方面既改善?
阿風諗左一諗:「嗯...係LILITH方面...EVE打穿左分裂之牆之後，元朗領域既LILITH就同我地屯門領域嗰邊既LILITH溝埋一齊...呢方面等等先再探討~都係等阿賢講埋先~」
阿賢點一點頭:「嗯。喺人口問題上，仲有一個要點值得關注...就係行者既問題。」
『行者?』阿賢係指元朗領域既行者?
阿賢再點一點頭:「嗯。呢道既行者...大多數都放棄左行者既身分。另外就係...尋日佢地派左出去追殺李飛揚嗰班既行者...已經全軍覆沒。」
嗰班追殺李飛揚既行者...無辦法...
佢地要執行黎種任務，都預左要犧牲...
之但係...仲身處喺元朗領域既行者...竟然放棄行者既身分?
阿風點一點頭:「呢點都唔出奇既~呢道既行者都墮落...唔單止呢邊...我諗天水圍領域既都係差唔多~」
係…都差D唔記得左，阿月都有講過...
天水圍領域既行者都已經墮落...
呢道都係一樣...
阿賢亦都點一點頭:「正所謂上樑不正下樑歪...個統治者都係咁，行者都唔會好得去邊。」
無錯...鄭穎心...
不過都唔緊要啦，佢都已經得到應得既報應...被佢自己既人民流放!
阿賢再望一望我:「所以，天欣已經派左我地D行者過黎呢邊執勤。」
『嗯...辛苦晒各位。』我望一望出架空天橋...
呢道已經由我地接手...
「講開又講喇阿賢~件Sacred-Armor OK嘛?」阿風拍一拍前面阿賢既膊頭。
「嗯。」阿賢點一點頭，「我同天欣都覺得好好用。所以就開始派出穿著Sacred-Armor既行者過黎執勤。始終，要控制防禦者RU過黎呢邊，好似唔係幾放心。」
「嗯~我都明~始終都要對EVE系統做多D測試先得~」阿風點一點頭，再望返出去窗外。
我一頭問號咁望住阿風...
測試?要做D乜野測試?
阿風望一望我，送左一對冷眼俾我:「講你都唔明架喇~科技白痴~」
我係唔明...但都可以解釋一下掛...
「總之...兩個領域既EVE系統先岩岩再接合起黎，有好多野都要測試好幾次先可以使用...唔好唔記得...之前係將EVE系統一分為三，而家只係將其中三分之二結合返...我都仲未將佢地分開之時，各有各自我運行左咁耐既差別計算在內，當中會唔會有唔協調或者排斥既情況出現都係未知之數...」阿風再望返出去窗外。
只係聽一聽阿風咁講...原來...唔係想像中咁簡單...
一直以黎，我都無諗過領域與領域之間仲有機會打通返。
我更加無諗過打通返之後，EVE系統重新連接既問題...
我更加更加無諗過EVE系統既連接，原來仲要考慮埋會唔會唔協調...會唔會有排斥...
無錯喇...雖然話三個領域既EVE本來就係同一個，只係嗰三個賤人將佢一分為三…
但三個系統各自運作左五年...好有可能各自演算出各自既一套...
無錯喇...EVE系統就好似人一樣，會思考...會成長。
當人生處喺唔同既環境之下，有可能會培養出唔同既性格...唔同既思考模式...
假如要夾硬將兩個唔同性格既人放埋一齊，都有可能會打起上黎...更何況係要融合為一體...
所以，阿風要對EVE系統再作更多既測試，以確保唔會發生災難性既意外!
望一望窗外既景色，車速都明顯減慢。
睇黎好快就到目的地...
而事實上，我都已經見到...
就喺不遠處，一座巨型既黑色摩天建築物...
尋日我地強攻既地方－元朗控制中心。
我望一望比較中層既位置...仲未修理好...
尋日同噴射式直升機EU大戰過後既痕跡~
成層D玻璃都爛晒，仲要成層都無光~
睇黎係暫時封閉起黎，暫停使用~
諗起都覺得驚險萬分~
望就望以後都唔好再遇上要同EVE系統交手~
如果唔係...下次真係未必有咁好彩...
不過...如果要接收天水圍領域既話...好有可能...都要再硬攻一次...
“依”我地架車停左喺元朗控制中心外既廣場。
“咯”我落車望一望四周，廣場內仲留有尋日激戰過既痕跡。
雖然被破壞既防禦者RU都已經被清理...
但地面、外牆、門口都有受嚴重破壞。
「轉個頭我會嘗試向EVE系統發出派遣維修機器球過黎呢邊維修~呢個可以話係最基本既測試~」阿風行到埋我身邊。
『嗯...』我點一點頭。
呢方面，交俾阿風處理就可以放心。
“咯 咯 咯 咯 咯 咯 咯 咯 咯”我地一行三人，向住被擊破既大門行過去。
喺元朗控制中心裏面，已經見到有幾個著住Sacred-Armor既行者喺道駐守。
亦都有幾隊喺道巡邏。
睇黎...整個控制中心已經俾我地控制...
「阿日、阿風，我去處理我要處理既事先。」阿賢向我同阿風揮揮手。
『你唔同我地一齊落去?』我好奇咁問一問阿賢。
阿風拍一拍我膊頭:「人地先無你咁得閒丫~」
阿賢點一點頭:「遲D見啦。」
望住阿賢行左入去升降機之後...
係既…我地每個人都有自己要做既事...
每個人都有...
我同阿風亦都跟住綠色既導引線行...一直行去另一部升降機...
其實自我由屯門領域坐上汽車之時，導引線就一直引領梗我地去要去既地方。
當我同阿風行到入升降機之後，導引線亦都隨之而消失。
升降機門關閉後，升降機高速向下移動。
「其實我琴日落過去睇過下~」阿風挨一挨埋部升降機。
『咁有無D乜發現?』我就企定定企喺中間。
「有無D乜發現丫?講出黎就要你失望喇~係無既~」阿風擰一擰頭。
『嗯...就算無都要親自落去睇下...』無錯，點都要親身落去睇一睇...
「真係要咁做咩?唔覺得好浪費時間咩?」阿風冷眼望一望我...
『我地每個人都有我地自己要做既工作...呢樣都算係我要做既工作...』了解情況...係我既其中一樣工作。
升降機保持急速下降...
呢邊既升降機同我地嗰邊既真係好唔同...
感覺上都比較唔穩定...
離心力都比較大...
「尋日坐呢部升降機都覺得好唔舒服架喇...遲下真係要整過晒D升降機先得!」原來阿風都察覺到。
『我地有咁多時間同資源先講啦~』成日都話要留返D LILITH…
「嘿嘿~」阿風奸笑兩下，無左反駁落去。
少有喎...
以阿風既脾性，總會頂撞返我兩句架...
做乜呢次又會咁順攤呢?
我地既升降機急速下降左好一陣子之後，開始慢慢減速...減速...減速...越黎越慢...越黎越慢...停左落黎...
“吱...”一聲響，閘門隨即打開。
眼前係一個無乜點經過人工修建過既大地洞...
地洞既牆身都係灰灰黑黑...
空氣中亦只有少量發出綠光既EVE粒子作照明...
呢一層...呢一個地下洞穴...同我地嗰邊既真係無乜太大分別...
只係...
「呢五年，佢地一定係無乜點落過黎啦~你睇下呢道~仲難行過我地嗰邊...」阿風摸住塊灰灰黑黑既牆身，慢慢向前行。
『佢地當然唔會理呢道既野~佢地根本就唔在乎~』佢地只係在乎點樣享樂...
墮落既行者...
「真係要睇住…前面會更難行架...」阿風沿住暗淡既綠光，小心翼翼咁向前行。
『嗯...』我亦都跟住阿風後面，小心翼翼咁向前行...
隧道開始向下繞...一路斜斜地咁向下繞...
左繞兩轉...右繞兩轉...
本來浮游喺空間中發出綠光既EVE粒子，慢慢被淡淡既藍光取代...
我留意一下空氣...藍色既空氣:『呢道既LILITH...』
「嗯...」阿風點一點頭。
比我地屯門領域嗰邊更加藍...
好明顯呢邊係深色D...
我跟住阿風身後一直行，越行越斜...
而家眼前既景象，全部都係好藍...好藍...藍色...藍色...
阿風既背影越黎越藍...空氣變得越黎越深藍...
『我地已經走出左結界層...』我望住眼前既阿風...
「嗯~比我地嗰邊好似早左走出結界層呀呵?」阿風繼續小心翼翼咁行...
『嗯...路亦都比我地嗰邊難行得多…』好窄...仲有好多大石...
我一直摸住岩岩蠶蠶既灰黑色牆身行。
地面明顯變得比之前更加難行...
而且開始比之前斜得很...
多行幾步，我開始見到前面有好強既藍光...
阿風向住藍光一直行...
穿過藍光...
穿過隧道既出口...
空氣間變得更藍...更光...
睇到既野都完全變成藍色...
腳下既路同左手邊灰藍色既岩牆仍然都係咁岩岩蠶蠶...
而右手邊...係一大個懸崖...
呢道係一個地底大洞…同我地嗰屯門領域嗰邊一樣...
LILITH既大地洞...
我同阿風沿住懸崖邊一直向下行...
我望一望落懸崖下...望住藍色好似水一樣既LILITH...
奇怪喇...
『LILITH既水位…』我企定定望住LILITH...
「係唔係多好多呢~嘿嘿~」阿風擰轉頭向我發出奸笑...