《香港革命戰》(上): [17-內部準備] PART 1
喺無邊無際既地獄裏面，奴隸手拉手築起人牆。
地獄之火由四方八面撲埋黎。
面對熊熊烈火，脆弱既身軀好快燒焦。
奴隸並無因此而退縮，反而更加主動，更加積極以身成牆。
黑色既焦牆越黎越高，越黎越厚...
犧牲既生命越黎越多...
但係上天好似仲未察覺得到...
仲未留意得到...
仲未有意圖去拯救世人...拯救弱小既世人...
「哥...」
意識開始崩解...
「哥...」
眼前既黑牆開始分離...
「哥...」
化為碎片...粉碎...飛散...
「哥!過黎控制中心搵我!」阿月進入左我既思緒...
『咩事...』我都未瞓醒...
「過黎先講!」阿月嬲爆爆咁既語氣...
『係都等我個沖個涼先啦...』呢個阿月，點可以除除便便走入人地思緒...
“滴 滴 滴 滴 滴 滴 滴”尋日要做既事都做完...
算係順利?
可以話係順利...
由地獄返到入黎之後，都只係可以同阿月仲有阿風推斷一下黎梗既局勢...
阿月同阿風都覺得事態發展可以跟住計劃進行。
但我就有所保留...
始終...可唔可以吸引到李飛揚既視線到黃金海岸係一個問題...
而可唔可以帶埋李軍黎又係另一個問題...
Sacred-Armor...
藍志勇...
究竟藍志勇會唔會對Sacred-Armor有興趣呢...
希望有啦...
只可以希望...
只要藍志勇對Sacred-Armor有興趣，先可以吸引到解放軍既注意...
吸引到解放軍注意，先有機會吸引到李飛揚既注意...
吸引到李飛揚注意，先有機會吸引到李軍...
一整個連帶關係...
當中已經唔可以再有乜野錯漏...
沖完涼，換好衫...
「哥!你仲唔快D黎搵我?!」又俾阿月強行入侵思緒...
『黎梗...』係時候出發...
阿月搵得我咁急唔知係唔係發生左咩事...
如果係發生左事既話，可唔可以早D話俾我聽先呢?
唔駛等到我去到佢面前先講啦!
急急腳行到去控制中心既大堂...
我已經見到嬌小既身軀...
『阿月!』
「咁遲架?等左你好耐喇!」阿月翹住手，谷起塊面...
我坐到身邊既凳上面。
『搵得我咁急係唔係有咩事?』有事就快講喇!仲喺道話我...
阿月亦坐到我身邊。
「我想講我已經警告左嗰個李飛揚!睇佢以後都唔敢再調查u.00.w既事!」阿月仲係嬲爆爆咁...
『就係咁咋嘛?』我仲以為有咩咁大件事...
「咩就係咁呀?激死我喇!」阿月碌大對眼望住我。
『做乜咁激氣丫?邊個激親我地個大小姐丫~』阿月平日都唔會咁好火...
「嗰個死人李飛揚囉!以為自己好聰明!哼!」阿月塊面越黎越黑。
咪同妳一樣囉...
你兩個真係天生一對...
「以為估到我地同解放軍有聯繫就好巴閉!」阿月仲係喋喋不休咁...
兩小無猜...
「真係要好好教訓下佢!」阿月既眼中充滿怒火。
『咁就等我而且出去殺左佢。』睇妳都唔捨得親自落手。
阿月拉一拉我手:「唔好!唔好...我已經罰左佢俾多D錢我地...」
都話左妳唔捨得架啦~
你地呢一對真係奇奇怪怪...
「飛揚要求我再將下一次擄勢行動既情報交俾佢。哥哥認為點？」阿月認真咁望住我。
『又要多一次有關擄劫行動既情報？嗰個李飛揚又想點...OK啦，我會搵阿賢傾一傾，安排下一次擄劫行動...我諗都應該要做好另一手準備...如果綽姿都失手既話...妳認承左佢先啦，當我同阿賢傾好之後，就會將個計劃話俾妳聽，妳就再將個計劃轉告俾嗰個李飛揚知。』最後一次既擄劫行動...
「其實我一早就認承左佢架喇~嘻嘻~」阿月對我莞爾一笑…
呢個阿月...又喺道自把自為...
『係呢，解放軍嗰邊點樣?』提起解放軍，唔可以唔留意下。
阿月諗左一諗:「解放軍嗰邊...我認為我地唔好再賣情報俾佢地。」
『點解?』點解咁突然?
「因為MINDER會發現...」阿月企左起身，行前兩步。
『MINDER?!』又係MINDER...
「嗯...MINDER既成長速度俾我既估計更加快...如果我再用INTRUDER同解放軍接觸，MINDER就越容易追蹤到我既身份...」阿月語氣沉重...
『咁會唔會影響到其他方面?』如果會就麻煩...
「而家仲未...但唔駛幾耐...我諗就連改變自動導航系統都有困難...」阿月面有難色...
咁就真係麻煩得多...
本身局勢對我地黎講已經非常險峻...
假如就連阿月都唔可以利用INTRUDER作出支援既話...
我地好難行落去...
「其實又唔一定要咁擔心，情況仲可以控制...只要我再小心D...唔好亂黎...」阿月認真點點頭...
咁我就仲擔心...
要妳唔亂黎喎...
邊有咁易?
妳仲難控制過INTRUDER同MINDER...
直頭係最不穩定元素!
今次慘喇...
無喇無喇...
注定我地SPIRIT要毀喺阿月手上...
當時我就應該聽老豆講，唔鬼救妳返黎咪乜事都無...
都係我衰...
睇黎我真係要負起全部責任!
「哥...你面色做乜咁難睇?」阿月送左個冷眼俾我...
『無無...』唔可以俾阿月知我質疑佢...
唔係既話，我會俾佢手刃...
「無就最好啦~呀!係喎~阿風話要我叫埋你一齊去搵佢喎~」阿月頭上面好似突然多左棧燈。
『妳唔早D講?』浪費時間...
「咁我唔記得丫嘛~」阿月谷一谷塊面...
『知唔知咩事?』我開始沿住指引住阿風方向既導引線行。
「唔知喎~」阿月亦跟住我身後。
阿風有事搵我地?
好心阿風有事就直接用思緒搵我同我講啦!
好衰唔衰交低俾個無責任心又唔上心既陳月!
真係...
呢個兩唔可靠既人都掌握住計劃既關鍵...
想成功睇黎真係要靠上天...
去到阿風既工作層，離遠都見到阿風好似好煩惱咁...
『阿風~搵我地有事?』我離遠知會一聲阿風。
「你地黎喇?咁遲架?」阿風行近我地。
『阿月囉...佢話唔記得左喎...』怪下阿月都要。
阿月伸一伸脷扮無知...
『係唔係有D咩重要事?』都係唔好浪咁多時間...
「兩件事，一件好，一件壞。想聽邊樣先?」阿風伸出兩隻手指。
『好先啦。』到左而家都仲要問講邊件先...
「好既係Sacred-Armor既技術已經賣左俾藍志勇，而且已經製造出試作型。」阿風伸出一隻食指。
『咁快就開始測試?!』我有D唔係好敢相信...
「嗯...而家既科技發展其實真係好高速。每個國家都唔可以浪費一分一秒。而只要有設計圖，就可以用3D份子打印技術將產品製造出黎。」阿風點點頭。
真係可以咁厲害?
只要設計得出，要製造出黎就一D都唔難...
睇黎，我地只係差神一樣既頭腦...
「根據情報所得，藍志勇佢地已經製造左100個出黎做服務測試。」阿風繼續點點頭。
『非常好!就咁睇，唔駛幾耐就會得到解放軍採用!而解放軍亦都會將D良品不足既賣俾李氏...』咁既話，李飛揚應該知要點做...
阿月突然加把口:「不過...唔好唔記得我地仲有一個壞消息...阿風...」
「無錯，壞消息就係，藍志勇竟然選擇用AI去控制Sacred-Armor...」阿風擰擰頭。
『乜野用AI去控制?』科技呢家野我真係唔係好識...
「就好似防禦者EU咁?」阿月突然問起。
「無錯!就好似防禦者EU咁...以AI去控制既機械人...」阿風向阿月點點頭。
『點會咁架?你有將防禦者EU既資料俾埋佢地咩?』我質疑一下阿風。
「我又點會咁蠢?其實佢地一直都有自行研發AI...」阿風送左一對冷眼俾我。
「你係唔係指佢地一直以自閉式測試既A.I.S.C.P.S.?」阿月又同阿風開始交流...
「無錯!就係A.I.S.C.P.S.!」阿風俾個Like阿月。
『A.I.S.C.P.S.又係乜東東?』又係一D我唔識既野...
阿月望一望我:「A.I.S.C.P.S.係佢地自行研發既AI系統，係一個初生系統...雖然比INTRUDER年紀大D，但成長速度比INTRUDER慢。」
『咩叫成長速度比INTRUDER慢?』我疑惑咁望住阿月。
「則係好似人咁...我比較聰明，你比較蠢囉~」阿月冷眼望一望我...
咩叫妳比較聰明，我比較蠢...
又俾阿月冷嘲熱諷...
早知唔問咁多...
阿風諗左一諗:「其實佢地喺好耐之前，已經收集梗MINDER既資料作分析。目的就係要製造出一個自家製AI系統...」
「始終MINDER都唔係佢地親生仔...」阿月接住講。
「無錯。」阿風點一點頭，「佢地一直都想有自己既AI系統去控制MINDER...」
「而國安局既外掛唔夠強大...連D級都未到...」阿月又接住講。
「國安局?AI技術未夠成熟...」阿風又接住講。
「始終國安局過於獨立，變成孤立...」阿月又接住講。
「所以就要開發A.I.S.C.P.S.去控制MINDER。」阿風又接住講。
「但真係可以咩?MINDER真係會俾佢咁做?」阿月又接住問。
「可能性唔可以話無...」阿風又接住講。
「但唔高。」阿月又接住答。
其實佢地兩個你一言我一語，我真係唔知佢地講梗乜...
AI既野實在太複雜...
亦唔係我需要認知既範圍...
雖然係咁...
『如果俾A.I.S.C...嗰個AI系統控制Sacred-Armor，變成一種Robot Unit既話，我地既計劃就會被破壞...』確保計劃完整性先係我既使命。
「所以先要搵你地黎傾傾...」阿風捱一捱喺張檯。
我地三個人都靜左一靜...
點樣先可以令佢地班死蠢由AI控制既機械人，變返做著上身既Sacred-Armor呢?
真係麻煩!
點解人類硬係要令自己麻煩多多?
我地由EVE控制既防禦者EU，變成可由人手控制既防禦者RU，再由防禦者RU重新設計成Sacred-Armor。
好地將成個Sacred-Armor既設計俾晒你，你就硬要走去變返做個由AI控制既機械人。
我地將舊屎變成飯，你又走去將舊飯變返做屎...
真係狗改不了吃屎!
大家都靜左好一陣子之後，阿風開始發言:「睇黎我地唔可以強制同佢地講話要做返穿著式裝備...」
「當然唔可以。我地賣左俾佢地，佢地又已經決定咁做...如果我地而家再加意見俾佢地，佢地會起疑...」阿月擰擰頭。
睇黎我地變得被動...
但我地唔可以咁被動...
歷史教識我地一被動就會輸晒成個勢...
個勢一輸，打後既所有計劃都唔再由我地話事...
『我地係唔係應該轉個方向諗諗...』我突然好似諗到D野...
「轉個方向?轉去邊?」阿月認真咁望住我。
『我地係唔係唔應該諗...點樣令佢地覺得穿著式裝備比較好...』諗到既野越黎越清晰...
「你既意思係...」阿風仲未講完...
「人類總要重複同樣的錯誤...」阿月講出重點...
『無錯...我地係唔係應該諗下...點樣令佢地覺得...機械人係危險...』無錯...
方法有好多...
我地唔一定要喺“點樣要佢地覺得穿著式裝備比較好”，我地可以要佢地覺得“AI控制既機械人其實係好危險”...
但可以點做呢?
點樣可以令佢地覺得AI控制既機械人，其實係好危險呢?
我地三個人又靜左起黎...
大家各自諗梗有乜計劃係可行...
智能叛變...
『點樣先可以令一個AI系統傷害人類?』呢個係一個我諗唔通既問題。
阿風諗左一諗:「AI系統係唔會傷害人類...就好似EVE一樣，以人類利益作依歸...」
「因為佢地有The Three Laws of Robotics...」阿月接住講。
「所有AI系統都會以The Three Laws of Robotics之下創造智慧...」阿風接住講。
「如果要AI系統傷害人類，首先要喺AI系統形成之前，喺內部設定。」阿月接住講。
「就好似MINDER咁...」阿風接住講。
「當AI開始建立，基於The Three Laws of Robotics所產生出智慧之後，AI系統就唔會傷害人類...」阿月接住講。
「就算明知人類係一種自我毀滅既生物，佢都唔會主動以武力控制人類。」阿風接住講。
「AI只會瓦解人類既武力。」阿月接住講。
又上左一堂AI課...
兩位教授講左咁耐，都係解決唔到點樣可以發動智能叛變...
『照兩位所講...要發動智能叛變基本上係無可能...咁可唔可以由另一個途經...』我個腦又好似諗到D野...
阿月望一望我:「你既意思係...」
「入侵?」阿風答左我心裏面既答案。
「唔得。」阿月擰擰頭，「A.I.S.C.P.S.進行梗自閉測試，無對外連接。我用唔到INTRUDER進行入侵行動。」
咁就麻煩...
雖然我唔明咩叫無對外連接...
但如果就連阿月都話用唔到INTRUDER進行入侵既話，則係唔駛諗...
「唔係...」阿風擰一擰頭，「自從尋晚開始，已經有變...」
『有變?邊方面?』我立即緊張咁問。
「佢地為左可以令機械人化左既Sacred-Armor可以做更多既測試，佢地開放左A.I.S.C.P.S.既連接...雖然接口得幾個，仲要係獨立接口，但如果係阿月加上INTRUDER...」阿風望一望阿月。
「雖然話可以入侵...但就算係我加上INTRUDER，都唔可以令A.I.S.C.P.S.對人類作出危險動作...」阿月擰擰頭...
就連阿月都話唔得既話，呢個計劃一定行唔通...
「雖然話唔可以令A.I.S.C.P.S.對人類作出危險動作，但我地都可以封住A.I.S.C.P.S....」阿風接住講。
「你既意思係...」阿月疑惑咁問。
「無錯...好似防禦者RU咁...」阿風接住答。
「嗯...可以係可以既...但係...」阿月又疑惑咁諗左諗...
「妳有無信心做到協調?」阿風接住問。
「協調當然可以...但...」阿月接住答。
「人選方面唔需要擔心，我已經諗到有一個好適合...」阿風接住講。
「你所講既適合人選...」阿月接住講。
「當然就係最得閒嗰個啦...」阿風接住講。
阿月同阿風同時望左過黎...
你兩個咁樣算係乜野意思?