《香港革命戰》(上): [15-深入搜索] PART 2
喺房道拎埋D野...
究竟綽瑩發生左咩事呢?
舊報紙...有...
應該要點樣調查呢?
舊相簿...有...
「哥哥...」阿月喺我執梗野既時候，喺我背後叫我。
舊日記...有...『乜事?』
「呢部就係iPad喇?」阿月既聲音依舊喺背後傳過黎。
舊地圖...有...
我回頭望一望阿月，阿月手中拎住部iPad搖一搖。
『嗯。』
舊照片...有...
我將所有野都放入一個黑色木箱入面...
所有要拎俾智海既野都拎整...
仲有仲有...
仲有沒藥!
我喺一個黑色木盒裏面，拎出一支食指咁上下大細既玻璃瓶。
透明既玻璃瓶入面載住淺淺地...淡淡地既藍色濃稠膠狀液體。
呢D膠狀液體就係沒藥。
沒藥一定要帶埋...
危險既時候就靠佢保命...
將沒藥袋入衫袋後...
『好喇，我地行得喇...阿...月...』當我轉身諗住行返去阿月身邊既時候...
我見到阿月閉起雙眼，雙手握住iPad...
更奇怪既係，iPad既周圍佈滿發出淡淡綠光既EVE粒子。
無數既EVE粒子圍住iPad飄下飄下...轉下轉下...
阿月既秀髮亦都喺空氣中飄下飄下...
『阿月...妳做咩丫?』我拎住個木盒行近阿月身邊...
阿月睜開雙眼，秀髮回復平靜，EVE粒子消失左，綠光都消失左...
「無丫~幫你再加多D會吸引李飛揚注意既野落去咋嘛~嘻嘻...」阿月對我莞爾一笑...
『加D會吸引李飛揚注意既野落去?加D咩?』我伸出左手，向阿月示意拎返部iPad。
「秘密~」阿月攬實左部iPad...
我話知妳加左D乜鬼野入去，總之就唔好影響到個計劃就得喇。
拎整晒所有野，準備好行裝，為腦部注入假晶片...
早上十點三十分...
我同阿月經由聚合反應堆(西部)既折疊之門，黎到黃金海岸。
「我地瞞住綽姿會唔會唔係咁好?」阿月攬住部iPad跟喺我身邊行。
『而家都仲未知發生左咩事...而且喺呢個時候，盡量唔好影響到佢...』我地向住停車場既方向行。
「都岩既~呢個時候，綽姿需要穩定佢自己既情緒。唔係既話，換腦手術就會有危險...」阿月點點頭...
難得一次得到阿月既認同...
『係呢...對於綽瑩既失蹤...妳有無D咩頭緒?』我繼續望向前面行，唔係好敢正視阿月...
「你要有心理準備...綽瑩好有可能已經遇上不測。」阿月講出左我唔想聽既事實...
老實講句，當阿月同我講話綽瑩失蹤...我就做好準備迎接綽瑩遇上不測既事實...
應該話...當我決定要派綽瑩去地獄執行任務既時候，我就預左會有呢一日...
不過...
『點都好都要調查左先...』雖然未必搵到真相，但都要盡量調查...
「你諗住點做?」阿月嘗試望住我雙眼。
『首先都係要將手上既物品交到智海手上，之後...嗰兩個人住邊?』我同阿月穿過沙灘，走到廢墟...
「一個住大角咀，另一個住西環。」阿月喺瓦礫上彈彈跳跳。
大角咀...西環...華富邨...
『首先都係要將手上既物品交到智海手上，之後去大角咀同西環解決嗰兩個麻煩友，再去華富邨調查綽瑩失蹤既事。』喺地獄行動既話，最好都係跟住路線行。
「嗯..都好既，以順住路線行動既話，時間容易掌握...而且...」我無等阿月將說話講完...
『首先處理左掌握在手既事，然後再調查唔明朗既事...假如...萬一都係調查唔到重要線索，我地都可以帶住梗有既線索逃脫...』唔好唔記得我地只有三個鐘...
三個鐘...實在有D趕...
「咁好喇，一切就照你既意思去做。」阿月行到我面前。
計劃就係咁...
但可唔可以順順利利?
唔知道...
我唔知道有幾多野係我掌握到...
我唔知道有幾多野我係揀岩左...
我只係知道...我只可以盡我既能力去做...
盡能力去做...
「你太無自信!你咁樣點能夠成為預行者?!」每次要出去地獄執行任務，我都會諗起老豆既呢一句話...
由細到大都係一樣...
執行每一次任務都係咁...
無論係大大小小既任務...
老豆對我既質疑，我係唔會忘記...
但係...真正無資格成為預行者既人係你!陳星!
坐上Aston Martin既駕駛座位...
「你要錫住我部車黎揸丫...」阿月坐喺隔離，幫我拎住部iPad同木箱叮囑我...
『妳最好坐穩D。』扣上五點式安全帶，準備以手動駕駛Aston Martin。
撳落刻有Aston Martin logo既Engine Starter後...
“吼...吼...”
出發!
“依...”一下後輪咬地聲，Aston Martin沿住小路出到公路上...
「你同智海約好左喇嘛?」阿月突然問起問題。
『嗯，早兩日就同佢講過話今日會俾野佢。』我繼續專心揸車。
「希望佢唔會甩底...」阿月好似對智海無乜信心。
『放心喇，智海係一個信得過既人。佢答應得既話就唔會反口。』要好好控制部Aston Martin...唔好整花...
阿月有咁既擔心都好正常...
話晒智海都係同老豆同一陣線...
我諗如果要為智海加上一個叛徒既罪名，阿月一定贊成。
雖然智海對我老豆忠心耿耿，但佢都好為SPIRIT...好相信死海文書...
只要係為SPIRIT而做...為死海文書而做，智海都盡力協助。
保持車速喺100km/h...
小欖就係面前...
老豆被流放既地方...
我就真係無閒情逸緻去留意呢個叛徒，但睇黎阿月就對佢好有興趣。
阿月一直都望住個山頂，望上山頂上既木屋...
又難怪既...始終都係阿月既親生父親，而且只係見過一面，有好奇心都唔出奇既...
路面上既樹枝同枯葉都俾Aston Martin捲起。
四周都好平靜...
除左Aston Martin發出“吼吼...”既引擎聲之外，四周都好平靜...
陽光穿過樹陰...鳥群喺天空中滑翔...
大海上面就連船都無一隻...
好平靜...好平靜...
但我唔可以鬆懈...
*叮*「系統已連接，現在正回復離線前的設定...安全系統已啟動...」
已經走到入地獄...
「哥哥，放鬆D~其實地獄無乜好怕~」阿月輕輕鬆鬆講左一句。
放鬆?
妳叫我點放鬆?
呢道係地獄...
『都係保持警惕好...妳唔好唔記得，妳係唔可以遇到熟人...』我已經提高戒備，留意四周。
「放心喎~人係好善忘~都過左三年~應該無乜人會記得我~除左飛揚~」阿月甜絲絲咁笑一笑...
呢D係唔係叫思春?
岩既~女仔既思春期都比較長...
成日都話唔緊唔緊，其實都唔知幾咁緊。
口裏說不，身體卻很誠實嘛~
“颼...”黎遠都開始見到一間又一間木屋，好快就到深井...
呢一個區域都仲係無警察巡邏。
被遺忘既...始終都係被遺忘...
有時被遺忘都唔係一件唔好既事。
無人記得你，無人留意你，無人注視你...
被遺忘既唔會俾外人入侵，唔會俾蝗蟲侵吞。
將Aston Martin停喺路邊之後...
『妳係道等我。』我接過阿月手上既iPad同木箱之後...
“沙...沙...”Boot踩到粗沙、碎石、爛泥地...
早上既深井更加寧靜...
小黃仲喺道瞓梗覺...
嗰兩個老頭仲未出黎吹水...
小儀返左學，小灰就可以安心咁吹住風曬住太陽。
『黑喵，開啟立體攝影模式。』見到小灰瞓得咁得意，我忍唔住要為小灰影張立體相片，俾阿月睇下。
阿月咁鍾意貓，見到小灰咁得意，一定好開心~
共通使用作業系統下，阿月應該已經睇到我為小灰拍攝既寫真~
我都係時候繼續做我要做既事...
跟住海風一直行，行到去海邊前...
「咁妟架?我等左你好耐喇。」智海背住我，望住個海。
『好妟咩?差唔多啦。』我行到去智海身邊，嘗試搵下佢喺道望梗乜。
「呢D就係你要我交俾教授既野?」智海望一望我手上既iPad同木箱。
『嗯，唔單止交俾教授...』我打開木箱，將一本封面寫有“Diary”既日記、一本皮製封套上面印有“Album”既相簿、幾份舊報紙都拎晒出黎。
「嗯?唔止交教授?你既意思...」我無等智海將說話講完...
『幫我將呢幾樣野賣俾第一目標。』我將手上既iPad、日記、相簿同舊報紙遞俾智海。
「你要我走去同第一目標接觸?!」智海接過iPad、日記、相簿同舊報紙後表情有D驚訝。
『嗯。其他既就交俾教授。』我再將木箱交到智海手中。
智海接過晒D物品後，認真咁望住D物品諗左一諗:「雖然我殺唔到佢...但你唔怕我會同佢講...有關你地既事俾佢聽?」
我望左智海一眼，諗左一諗:『你無聽過用人勿疑，疑人勿用咩?交托得俾你就信得你過。至於點樣賣俾第一目標...你有咁多鬼主意，就照你既方法做啦。』
「你講架，唔好後悔呀。」智海大一大我。
我太了解你喇，你大我唔到既。
只要係死海文書既一部份，你都會跟住做。
『係呢，完成任務之後，你打算去邊?』我望返出大海。
「我?」智海亦望返出大海，「去搵我既青鳥~」
『青鳥?你曾經為左SPIRIT離開呢隻青鳥，又為左呢隻青鳥離開SPIRIT，最後又為左老豆離開呢隻青鳥，而家又話想搵返佢?實搵到架?』我望住兩隻海鷗喺海上飛下飛下。
「我一直都留意住佢，一直都有搜集有關佢既消息。」智海既眼中好似出現左一個人。
『咁人地實肯原諒你架喇?話晒當年都係你對人始亂終棄。』我帶D責怪既語氣話智海。
「我唔係始亂終棄，只係身不由己...但而家你話只要我完成今次既任務，我就可以得到自由，想去邊就去邊既話，我一定要搵返佢。」智海既眼神非常堅定。
『咁你會同你隻青鳥去邊?離開地獄?遠走高飛?』我望住兩隻飛到天邊既海鷗。
「唔...我諗唔會喇...我諗我會同佢留返喺地獄，見證住審判既來臨。」智海將視線放到我眼裏面。
『係呀...咁我希望你隻青鳥唔會係被審判既目標之一喇...』我亦都將視線放到智海眼裏面。
「呢點你大可以放心，因為而家喺呢一個地獄裏面，已經再無梯俾我地爬上去。」智海對我微笑。
智海竟然會對我展露微笑?
『係呀?咁我就祝你兩個幸福快樂喇。』我轉身離開海邊。
今日之後，我地應該無乜機會再見...
『呀...仲有呀...阿風同阿賢託我問候下你喎。』我再背住智海揮揮手。
應該真係無機會再見...
喺審判之前...甚至審判之後...
當我行過一條橫街後，我就已經見到一個熟識既身影...
『阿月...點解妳會喺道架?我唔係叫左妳喺車上等我架咩?』我一邊行近阿月，一邊以責怪既口吻講。
「你影左張咁可愛既貓貓相俾我睇，我梗係要走過黎同佢玩下啦~係唔係呀貓貓~」阿月摸一摸小灰個頭...
小灰又好嗲咁舔一舔阿月隻手指...
『佢叫小灰~嘩呀!!!痛死!痛死我!!!』我嘗試好似阿月咁摸一摸小灰，但小灰用佢既尖牙咬我囉!
「哈哈哈~你知道嘛~貓貓係唔可以亂摸架~你要睇下佢既脾性~睇下佢心情好唔好~睇下佢鍾唔鍾意你先~係唔係丫小灰~?」阿月溫柔咁摸一摸小灰，小灰好享受咁喵喵叫。
我就真係唔明...點解貓咁高傲都有咁多人鍾意...
「你係唔會明架喇，一個自我中心太強既人，係唔會明白貓心裏面諗乜。」阿月對小灰特別溫柔。
話我太自我中心?
妳自己咪又係...
『好喇，我地要行喇。』我地好趕時間...
「好喇小灰~我地要走喇~有時間再黎探你啦~Bye Bye~」阿月同小灰揮揮手後跟住我行出村落。
“吼...吼...”兩聲引擎怒吼...
而家係早上十點四十五分...
我地要去下一個目的地。
『阿月，詳細地址。』我揸實軚盤。
「大角咀福澤街三十八號海興大樓。」阿月扣好五點式安全帶。
海興大樓...
向住下一個目的地...海興大樓進發!
“依...”一下後輪咬地聲，Aston Martin衝上公路。
早上十點四十六分...
真係好。
由黃金海岸出黎到交晒D野俾智海，全程只係用左十五分鐘。
順利既話...三個鐘內一定可以完成晒喺地獄要做既事!
但係...
關於綽瑩失蹤既事...
始終都係唔明朗...
而家呢個時候，唔可以有任何偏差...
「哥哥，專心現狀。我地要先爭取時間去大角咀。」阿月望住前路。
係...而家要處理既係住喺大角咀既hacker...
要專心...
專心眼前既事先可以順利完成。
專心...
“吼...吼...”
我望住前路，踏盡油門，向住架空高速公路衝上去!
“颼...”空氣擦過多層擾流板...
“吼...”Aston Martin以時速1100公里，喺架空高速公路上面飛馳。
高速公路上面有好多巨型貨車...
一架又一架，好似鐵板一樣。
Aston Martin喺鐵板之間左穿右插。
『呢個工廠區簡直就係痴線!』我望一望一座又一座，噴出黑煙白煙既摩天大樓。
「工業本來唔係錯。但過量就會失衡...」阿月繼續望住前方。
『好明顯而家已經完全失衡喇...』一座又一座摩天大樓密不透風。
「人類既本性就係貪得無厭，特別係上等人。縱使佢地已經擁有一切，都仲係要貪。慾望無限~我最清楚。」阿月嘴角笑一笑...
曾經長時間生活喺地獄裏面既阿月當然清楚...
幸運既係阿月無被同化。
喺呢種變態既社會裏面生活，就只會產生出兩種人。
一係消極得痴線。
一係貪婪到瘋狂。
有時候真係唔可以唔佩服呢道既當權者...
點樣可以用咁唔公平既制度令人民信服?
生活喺地獄既人民，真係唔覺得自己已經成為左一個，無辦法再隨心所慾既奴隸?
真係瘋狂...
好喇...都係唔好諗咁多...
再去深究過去既錯都係無補於事。
都係盡快完成當前既任務最為重要!
“吼...吼...”
穿過一塊又一塊巨型鐵板...
“颼...”
穿過一架又一架三層巨型巴士...
“依...依...”
繞過一架又一架房車...
“吱...吱...”
好快就黎到大角咀。
『黑喵，顯示大角咀福澤街三十八號海興大樓的路線。』用唔到自動導航，就只好用地圖顯示。
車頭玻璃隨即顯示出紅色既路線。
只要跟住紅線走，就會去到想去既地方。
轉左...直行...轉右...直行...
喺橫街窄巷控制住Aston Martin行駛，真係好唔暢快。
舊區...
大角咀係一個被遺棄既舊區...
雖然鄰近九龍，但呢道都仲係無得到上等人既重視。
地獄既世界，下等人太多...奴隸太多...
要安置呢D窮人，只要放佢地去呢D被遺棄既舊區就好。
被遺棄既人遺棄到被遺棄既舊區簡直既絕配。
「保持純潔既心靈。」阿月帶住微笑望一望。
保持純潔既心靈...
無錯，阿月講得好岩，要保持純潔既心靈。
身處地獄真係要無時無刻都要警惕自己。
唔可以被黑暗既地獄同化...
唔可以...絕對唔可以...
“依...”將Aston Martin停左喺紅線既盡頭...
我同阿月落車四圍望一望...
『看來這裏並沒有自動泊車系統。』黎到呢道，喺時候要講普通話。
「對喔~舊區不會有這些設備的~我們把Aston Martin停放在這裏好了。」阿月行到我身邊。
呢道真係好殘舊...
道道都係一D唔過八層高既舊樓。
街道上面既舊商舖都係賣鐵多...
D鐵呀、雜物呀、垃圾呀都係隨處放...
就連一D閂左門既舖頭既鐵閘，都係溶溶爛爛、銹漬斑斑。
而生活喺道既人，個個都係死口死面...
幾個骨瘦如柴既中年人，抬住幾籮廢鐵喺身前行過...
幾個阿伯坐左喺路邊打鐵...
又有幾個無著衫既年輕人，推住一大車廢鐵喺對面行入後巷...
呢道就好似一個死城咁...
灰天黑地，死氣沉沉，一D希望都無...
「走吧，哥哥。」阿月好似唔係好在意呢道既人同事，向住樓梯行上去。
我亦跟住阿月後面一直行。
沿住樓梯行上去，一直行...一直行...
灰灰黑黑、殘破無光、垃圾滿地既樓梯住滿老鼠曱甴...
D老鼠曱甴大隻到好似生化怪物一樣!
究竟要喺咩地方生長，先可以生長成咁既樣?
呢道究竟係咩地方?
總覺得呢道比想像中可怕...
比想像中惡心...
究竟住喺道既人係點樣生活?
佢地點樣可以忍受得到?
只係眼見行喺面前阿月既背影，好似對身邊既環境完全唔在意...
不帶任何懼色，不帶半點動搖，一步一步行上樓梯...
究竟呢種心態係點樣鍊成?
阿月唔覺得呢道好難頂架咩?
唔覺得呢道根本就唔適合人類居住架咩?
點解阿月仲可以咁淡定?
真係好困惑...眼前既阿月就好似唔係身處同一個空間一樣...
同阿月行到上四樓，通道裏都係陰陰沉沉。
裝喺天花上面既光管閃下閃下...閃下閃下...
令人有D眼花既感覺...
而左右兩邊都間滿住所。
住所門前都裝有鐵閘。
甩晒油既鐵閘...生晒銹既鐵閘...
「就是這裏了。」阿月停喺一道奶黃色，生晒銹甩晒油既鐵閘前。
我望一望個鐵閘，係用古舊既鐵鎖鎖住。
“叮噹叮噹”阿月撳左兩下門鐘，住所裏面傳出“叮噹叮噹”聲。
「看來沒有人。」阿月再撳多兩下。
『嗯...等我直接把鎖頭亂斷好了。』我揸實個鎖頭...
「不用~」阿月捉住我隻手。
阿月由衫袋裏拎出一支鐵線。
唔係呀化?阿月連老爆都識?
只係見阿月用支鐵線喺個鎖匙窿道搞下搞下...
“咔”一聲響，鎖就開左...
阿月究竟係咩人...
點解連老爆都識?
說時遲，那時快...
“咔”一聲響，連鐵閘後面道木門個鎖都俾阿月爆開埋...
真係唔可以睇小呢個陳月...
“咯...咯...咯...咯...”一行入屋裏面，灰色既膠地板發出“咯咯”聲。
我輕輕力鎖返住道鐵閘，閂返埋道木門，四圍望一望...
細小既房間亂七八糟...
一個二百呎左右既空間放滿雜物...
衫褲鞋襪一地都係...
茶機上面有食完既杯麵、飲完既紙包飲品、用過既廁紙...
整間房間都霉霉爛爛、日久失修，就只有一樣野最光鮮...
圓圓...黑黑...掌頭咁上下大小既半圓球體...全方位主動式防禦系統。
真係諷刺...
最光鮮既野唔係雪櫃，唔係爐頭，唔係檯唔係凳唔係床，唔係自己最重要既野...
最光鮮既竟然係會攞自己命既全方位主動式防禦系統...
諷刺到不行!
『這間房間人住的嗎?』我真係好好奇咁既環境點住人?
雖然我之前已經聽過阿月講過，亦都接觸過下等人，腦裏面早有預計既影像。
但都未至於咁既地步?
唔好話環境衛生既問題，咁細既空間點生活?
只見阿月行左埋去張雙人木凳道拎開D雜物，拍一拍張凳就坐左落去...
「這間房間已算不錯~在這個香港裏，更惡劣的環境我也有看過呢~」阿月雙手托住下巴望住我笑笑口咁講...
更惡劣既都有?
我真係聯想唔到仲可以點惡劣法...
「二百呎喔~二百呎的房間對下等人來說應該是豪宅了~大多數下等人只可以住棺材屋~只有少部份幸運的人可以住共屋~我看這裏應該是發生過兇殺案的凶宅呢~」阿月托住下巴左望望，右望望。
『瘋狂!他們是如何忍受這種生活?簡直就是發瘋!』我挨到灰黑色既牆邊，翹住雙手望住阿月。
「習慣、認命、自欺欺人，就是下等人的生存方式~」阿月好似已經習慣晒...
習慣?認命?自欺欺人?
呢D只係叫奴性心咋!
不過算喇...只要審判日來臨，一切扭曲左既價值觀同制度都會被打破!
『現在我們要做甚麼?』一眼睇晒，我地要搵既人唔係呢間屋裏面。
「等~等他回來~我猜想他應該去了買東西吃~而且很快就會回來~」阿月雙眼充滿自信。
咁有信心?
阿月呢個人D信心係喺邊道黎架?
點解好似咩都喺佢掌握之內咁?
“咯...咯...咯...咯...”我聽到有腳步聲由門外傳入黎...
“咯...咯...咯...咯...”而且越黎越近...
“叮叮噹...叮叮噹...”門外傳出鎖匙既撞擊聲...
返黎喇...第一個hacker返黎喇...
我貼近牆角，準備迎接呢間屋既主人歸來。
“咔”鐵閘既鎖被打開...
而阿月亦都面帶笑容，雙手放到翹起左既雙腿上面，仲要微微拉起黑色長裙，令雪白既雙腿展露喺空氣中...
“咔”木門既鎖都解開埋...
“依...依...依...”木門慢慢打開...
“咯...咯...”hacker慢慢咁行左入屋，但行唔夠兩步就停左落黎。
雖然我只係見到hacker既背影，見唔到佢既表情，但我估大至上係因為見到美麗動人的阿月，坐左喺自己間屋入面而感到驚訝。
我慢慢將道木門閂埋...
阿月依然展露出誘人既微笑，望住hacker...
唔知既人就咁睇阿月就覺得佢好似一隻可愛既小貓，但識佢既人就知道佢根本就係一隻獵豹...
「小...小姐...妳...」我無等hacker繼續講落去...
我從後左手鍊住佢喉嚨，右手反鎖佢雙手!
Hacker手上既早餐都跌到落地上，我嘴貼到佢耳邊:『聽我說，別大叫。不然你的喉嚨會立即斷開。知道嘛?』
我唔係講笑，keep住注射精神液既我，臂力係足以徒手將一個人既頭扯斷。
我感覺到hacker既身體不停咁震，頭輕微咁點一點...
睇黎hacker好驚...
不過驚都係人知常情。
試問自己間屋無啦啦有個美女坐左喺道，後面仲有一個陌生男子鍊住自己條頸...
唔驚就有鬼。
阿月上身微微靠前，雙手壓到落將凳道，帶住微笑同hacker講:「老實回答我以下的問題，緊記你只有一次機會。你就是史仁傑?」
Hacker好似唔係好敢亂郁，亦唔係好敢俾反應...
『回答她吧。細聲點。』我鬆一鬆我隻左手，等佢可以講到野。
「對...對...我...我就是史...仁傑...」hacker將聲線壓到扭曲一樣，身體仲不停咁震住講...
史仁傑...
原來叫做史仁傑...
阿月點一點頭:「嗯~很好~那我繼續問~昨天你是否在網絡上，搜尋有關一個名為u.00.w的人的資料?」
史仁傑諗左一諗:「嗯...我...我確實有在網絡上...搜尋有關一個名為...u.00.w的人的資料...」
「為何要搜尋這個人的資料?!」阿月由和藹可親，突然變得兇神惡煞!
「不...不...不!!!不!!!不!!!不是我的主意!不是我的主意!我根本就不認識u.00.w!」史仁傑顯得有D激動。
『細聲點。』我再鍊一鍊史仁傑條頸。
史仁傑既身體微微震下震下...
阿月又回復和藹可親既笑容:「你老實告訴我，為何要搜尋u.00.w的資料?」
史仁傑再諗一諗:「昨天...是昨天那個榮少要我搜尋的...真的不是我的主意!我只是聽命於他而已!」
阿月又諗左一諗:「榮少?」
「對喔...榮少...經常欺負我的榮少....」史仁傑既聲線充滿委屈。
「榮少為何要搜尋u.00.w的資料?」阿月皺一皺眉。
「我不知道喔...」史仁傑輕微搖一搖頭。
「快說!要是你不老實說出來，你的喉嚨便要斷開!」阿月睜大雙眼怒視史仁傑。
我左手加大力度，嚇一嚇史仁傑。
「我不知道!我真的不知道喔!對了對了!!!好像有一個姓李的男人要求我幫忙!」史仁傑又再緊張起黎。
「姓李的男人...李甚麼?」阿月好奇咁問。
「李...飛...揚!對了!李飛揚!他說要在網絡上搜尋有關一個在網絡上搜尋不到的人的資料!」史仁傑既聲線非常肯定。
「飛揚?想不到他會對u.00.w產生興趣...笨蛋~」阿月甜絲絲咁笑出黎。
一提到飛揚就思春...所以話女人都係礙事...
不過我都估唔到李飛揚竟然會搵人查u.00.w...
『還有其他忘了告訴我們的嗎?』我扭一扭史仁傑既喉嚨，將佢既耳仔貼近我耳邊。
「沒有了!真的沒有了!我甚麼都不知道!我真的甚麼都不知道!」史仁傑震住身咁回答。
『真的嗎?那麼...你沒有利用價值了...』我左手用力一鍊...
「哥!唔好!你答應過我唔可以亂殺人。」阿月誠懇咁望住我，阻止我鍊斷史仁傑既喉嚨...
係...我係答應過阿月唔可以亂殺人，但呢個史仁傑知道既野都唔少...
「不要殺我...求求你們不要殺我...嗚嗚嗚...」我感覺到史仁傑既眼淚流到我既手背上。
「哥哥放左佢喇，佢都係一個被惡魔折磨既奴隸...」阿月用上憐憫既眼神望住我...
唔好咁望住我啦好唔好...
我真係好鬼怕正視阿月...
『你行運了...』我鬆開雙手，輕輕推一推史仁傑上前。
「謝謝大爺不殺之恩!謝謝大爺不殺之恩!」史仁傑跪喺地下向我叩頭道謝。
呢個四眼冬菇頭真係做奴隸做得太耐，就連少少既尊嚴都忘記埋...
「來~來~過來坐~」阿月拍一拍身邊既空位，向史仁傑示意坐到佢身邊。
史仁傑摸一摸自己個冬菇頭，有D唔係咁好意思...
「過來吧!不然我生氣了!」阿月扮到嬲嬲地既樣...
史仁傑立即爬起身，衝到阿月身邊乖乖地坐定定。
「好吧~告訴我關於你自己的事。」阿月溫柔咁望住史仁傑。
「我?」史仁傑有D迷茫...
做左奴隸太耐，就連自己都失去埋...
「嗯~比如說你的生活，你的家人~」阿月對史仁傑點點頭。
唔好浪費時間好唔好...
「我的生活...我的家人...嗚嗚嗚...」史仁傑諗左一諗，眼睙就不斷流出黎...
男人老狗邊得黎咁多眼淚架...
「不用哭~慢慢說~」阿月拍一拍史仁傑背脊，安撫佢既心靈。
仲要慢慢講?
大姐...我地時間緊迫丫...
我雙手翹住，背脊靠近木門，準備聽故仔...
「我沒有家人...父母在我七歲時自殺死了...」史仁傑擢住擢住道氣，開始講佢既悲慘故事。
阿月好耐心咁聽史仁傑講每一言，每一語。
「本應我也死掉了...不知道我是幸運還是不幸...在我父母帶同我一起燒炭自殺時，竟然有人把我救了出來...」史仁傑抽搐左兩下。
仲駛問...執得返條命梗係好彩啦!
「自始，我的生命就只有生存，並不存在生活...」史仁傑諗一諗，眼淚又巴巴聲咁噴出黎。
生存?
其實要喺地獄裏面生存都已經好難...
「每晚努力做兼職賺取生活費...吃不飽...著不暖...睡眠時間不足三小時...把賺來的錢交房租..交學費...為了改善生活努力學習...但我知道...這根本就是自欺欺人的想法!」史仁傑開始流露出憤怒既面容...
憤怒...
原來生活喺地獄裏面既奴隸係仲識得憤怒...
「我們不斷進修，工作量只會越來越多，待遇卻不會改變...又為了改善生活，我們又再不斷進修，但情況依舊...根本沒有給你進升的路!在你頭上的都是沒才沒幹的皇親國戚!」史仁傑既眼裏充滿怒火...
呢個就係現實...
被扭曲既現實...
「我受夠了...我受夠了!在這個不平的社會裏生活比死掉還可怕!」史仁傑鍊住自己個冬菇頭，展露痛苦既表情。
史仁傑既故事只係呢個地獄裏面既冰山一角。
喺地獄裏面，下等人既數量比中、上等人既總和仲要高出好幾千倍。
可想而知受害幾人有幾咁多...
阿月搭住史仁傑既膊頭:「史仁傑，現在面前有兩條路給你選擇。一，被我們殺掉。二，來我們的地方過新生。」
史仁傑帶住迷茫既眼神望住阿月:「你們的地方?究竟你們是何方神聖?」
阿月塊面貼近史仁傑，帶住誘惑既笑容:「三合，你們是這樣稱呼我們的。」
「三...三...三合?!」史仁傑成個人被嚇到跌左落地下，仲要向後爬左幾下...
乜我地真係有咁恐怖咩...
又難怪既...
呢道對我地既報導都係得負面既野...
唔係話我地殺人開火，就係擄人勒贖。
有咁衰就唱到咁衰。
但事實上，我地針對既都係中、上等人。
同時我地亦都有救助好多下等人。(接近邊界區域既下等人)
阿月趴到地上，再貼近史仁傑，帶住誘惑既笑容:「怎樣?死?還是過新生?」