《香港革命戰》(上): [15-深入搜索] PART 1
喺黑暗既人間裏面，每一個人都忍辱偷生。
為求生存，甘心成為惡魔既奴隸。
英雄並無跟住原有既劇本，降臨人間拯救世界。
奴隸們慢慢咁忘記左希望，就只有絕望。
惡魔肆無忌憚奴役奴隸，殘殺奴隸。
因為惡魔知道，軟弱既奴隸們七零八落，唔識得集合反抗。
一個又一個軀體被肢解...一個又一個靈魂被吞噬...
血肉橫飛既地獄...腥臭難聞既地獄...
你地仲可以做D乜?
你地仲可以為自己做D乜?
以殘肢為惡魔舖道路?
以鮮血為惡魔設河道?
睇住呢個人間地獄...我無力...我無助...
「阿日，仲瞓梗?差唔多係時候同執行任務既行者訓示喇。」當我仲係夢中既時候，阿賢以思緒叫醒左我...
『Sorry，我尋日喺訓練室練得太攰瞓妟左...我而家梳洗完立即過黎。』我立即回個神向阿賢交代。
「Ok。唔好遲到。」阿賢從我既思緒中慢慢離開...
大鑊!要快D...要快D先得...
何永賢，先行者。
阿賢喺執行兵團既團長。
而執行兵團既主要任務，就係去地獄執行搜集情報、發放假消息、擄劫任務等。
行動組既成員約有2000人。
而成員大多都係執行者。
阿賢主要負責挑選合適既行者、訓練行者、分析情報、編製假消息、策劃行動、設計路線等。
總之所有有關出去地獄既任務，都係由阿賢負責。
阿賢係一個好認真既人，亦都係好謹慎既人。
每次進行任務前，都會將所有搜集返黎既情報，分析得清清楚楚。
設計出一套萬無一失既計劃，再模擬好幾十次先會行動。
而咁多年黎，咁多次大大小小既擄劫行動，都從未有任何出錯。
所以有阿賢喺道，擄劫行動方面我好放心。
不過...阿賢有時又真係過份認真...
做任何事都要規規矩矩...
一定要跟足規矩行事...
唔係既話又會同你講一大輪道理...
所以我都好少會同阿賢頂撞...
聽阿賢說教真係慘過俾阿月哦...
都係唔好諗咁多，快快手手梳洗完立即趕過去...
唔可以遲到...唔可以遲到...
“滴答...滴答...滴答...”喺黑色為主既浴室入面...
“滴答...滴答...滴答...”凍水流遍全身...
“滴答...滴答...滴答...”我閉起雙眼...
“滴答...滴答...滴答...”仲係有D攰...
尋日既練習真係有D過左火...
不過唔係咁樣既話就好危險...
出到去地獄活動，要打醒四十八分精神...
體能好重要，格鬥技就更加重要!
始終走出結界範圍後，唔可以用高振動EVE粒子刀，帶槍又唔方便，就只可以靠自身...
無錯，我本身就係一件戰鬥機械...
最重要既都係Keep住最佳狀態，喺危急既情況都可以立即殲滅敵人或逃脫!
無錯...我周不時都要走入地獄...走入地獄...
「阿日，我既兒子，你唔可以害怕地獄。因為你要拯救地獄裏面無辜既靈魂。」老豆喺我細細個既時候，成日都會咁提點我...
細細個既時候，老豆就向我灌輸一種重要既思想，我係為拯救地獄裏面無辜既靈魂而生。
就算要我犧牲一切，都一定要完成呢個使命。
我犧牲左好多...我已經犧牲左好多好多!
我犧牲左好多同我一齊成長既戰友...
我犧牲左好多無辜既生命...
我甚至注射有害既精神液強化自己...
但係都仲未夠...
你唔單止要我犧牲...仲想犧牲埋你個親生女!
你真係好忍心...
有時我真係唔明白...點解我地要犧牲一切，只為拯救受困於地獄裏面既靈魂...
地獄既靈魂...連自己都唔著緊自己...連自己都無諗過要救自己...點解要我地犧牲一切去拯救佢地?
講唔通...無道理!
自古有邊個革命唔係自己起?
連自己都唔願企出黎，邊個會為你揭竿起義?
我真係唔明...我真係唔明!
我地本來可以好好地喺結界範圍內...喺誡律之牆內話知佢地死活!
我地本來有一套完美既法則...
我地本來可以好好咁跟隨規條生活...
但而家...
而家已經無得揀...
一切都係因為你!
老豆...究竟你腦裏面諗梗D乜架?
一直以黎，你所做既一切，都為SPIRIT既利益著想，為左地獄裏面喺惡魔手中既奴隸著想...
但點解要答應佢地分裂SPIRIT...
就算你當初唔知分裂SPIRIT會令LILITH失去再生能力，你都應該好清楚將SPIRIT分裂只會帶黎無盡既惡果...
自命聰明一世既你，點解會笨實一時?
我真係唔明白你...
我真係好唔明白你呀!
但而家講咩都無用...
而家既情況，已經再唔係單單為左拯救地獄裏面既靈魂...
而家既情況係要拯救埋SPIRIT...唔係...係拯救我地自己...
我地好快會滅亡...
唔再向地獄作出審判既話，我地就會滅亡...
為左我地屯門領域...一定要審判地獄...建立新法則...管治新淨土!
沖完涼，換好衫，準備訓示行者。
訓示行者既地方習慣喺監控中心(西部)對出既平台進行。
嗰道比較開洋，而且接近聚合反應堆(西部)。
喺黑黑既建築物之間、黑黑既環境之中、綠綠既光線之下，我喺監控中心(西部)門口已經見到平台上企左幾個人。
我雙手放後，莊嚴咁行過去。
如果唔扮得莊嚴D，等等阿賢又會話我唔重視儀式架喇...
“咯...咯...咯...咯...”一步一步...一步一步咁行過去...
“咯...咯...咯...咯...”眼神要堅定...
“咯...咯...咯...咯...”腰骨要挺直...
“咯...咯...咯...咯...”越黎越近...距離嗰幾個身影越黎越近...
我已經見到一個神高神大，板起塊面，一頭黑髮既柏豪 all back，著上一身整齊以黑色為主，配上銀花紋長袍既阿賢筆直咁企左喺道。
見到佢個樣...我不禁吞左淡口水...
呢D係唔係就係傳說中既霸氣?
我唔知...我只係知30歲既佢好細個就已經跟我老豆做事...
佢同智海兩個都係我老豆既得力助手。
好多重要既任務...危險既任務，老豆都會交俾佢兩個執行。
由細到大，我都視阿賢同智海係好兄長，好長輩!
可惜喺救出阿月既行動，就只有阿賢企喺我呢邊...
智海...點解你會同我老豆一樣咁冥頑不靈?!
「立──正!」當我行到佢地面前企好之後，阿賢立即向眾行者高聲加嚴厲地發出命令!
“咯”穿著黑色長袍既眾行者一致咁雙腳緊貼，雙手放到背後，挺胸收腹，神情嚴肅，筆立咁立正!
數一數...唔包括阿賢，面前有九個行者...
好正常，除非有隨行者需要實戰訓練，唔係既話九個行者係執行擄劫行動既固定人數。
今次行動無隨行者跟隨呢...
「我，何永賢，先行者，以執行兵團團長身份向預行者陳日確定人選!」阿賢繼續以嚴厲既聲線高聲宣佈!
「執行者，杜易民!」阿賢開始逐一宣讀名字。
「有!」執行者亦不敢怠後，立即報到!
「執行者，馬安倫!」
「有!」
「執行者，鄧希忠!」
「有!」
「執行者，葉敏茵!」
「有!」
「執行者，林啟生!」
「有!」
「執行者，朱寶華!」
「有!」
「執行者，鄒睿銅!」
「有!」
「執行者，吳佑達!」
「有!」
「執行者，伍光明!」
「有!」
「九位執行者已經到齊，請預行者向各執行者作訓示!」阿賢向我發出命令...
無錯...我係會用命令黎形容...
『面前九位執行者...』我都要用上嚴肅既口吻...『你地既名字我會銘記於心!行動係危險，所以你地要有犧牲既心!人唔犧牲，就唔可以得到想要既野!我地要既係長久既自由、長久既和平、長久既穩定!我地所做既一切都係為左SPIRIT!為了SPIRIT!』
我緊握拳頭，雙手打交叉放喺胸前，筆直地立正!
九位執行者加上阿賢亦都立即緊握拳頭，雙手打交叉放喺胸前，筆直地立正，放聲喊叫:「為了SPIRIT!」
為了SPIRIT...真係仲係為左SPIRIT?
我不禁都要問一問自己...
而家既情況已經同之前好唔同...
難道佢地唔知咩?
難道阿賢唔知咩?
佢地都好清楚...
有可能比我更清楚...
「好!你地而家要做既就係作好最後準備!各行者，預祝你地凱旋已歸!解散!」阿賢向九位執行者發出最後命令後...
“咯...咯...咯...咯...咯...咯...咯...咯...”九位執行者向住聚合反應堆(西部)方向跑去。
我同阿賢目送九位執行者後...
「你越黎越有你老豆既風範。」阿賢認真咁搭我膊頭...
『我先唔想似佢。』我對住阿賢搖搖頭。
「睇黎你仲未放得低。」阿賢搭住我行，一路向住張黑色既長凳行過去。
『唔係咩放唔放得低，係唔可以原諒。』我同阿賢坐到凳上。
「我始終都覺得唔係咁簡單?」阿賢點起手上既香煙。
『唔?』我有D唔係好理解阿賢既意思...
「我係話，你老豆所做既野唔似會咁簡單。」阿賢吸一吸手上既香煙。
『可以有幾複習?明明就係因為自私!你睇另外嗰兩個領域既統治者，簡直係私私到唔係人!』我腦裏面一直出現嗰兩隻禽獸既樣。
「以我認識既陳星絕對唔係咁既人。我跟左你老豆咁耐，好了解佢。」阿賢呼出一口煙，灰色既煙喺黑色既天空中飛散。
『我係佢個仔，我一定比你更了解佢!佢根本就係一隻心狠手辣既狼!』我用狼黎形容佢都算俾面!
「唔係咁...唔係咁...陳星做事係心狠手辣，但絕對唔係自私。佢做既一切都係為左SPIRIT。」阿賢手上既香煙發出陣陣紅光。
『為左SPIRIT?如果真係為左SPIRIT就唔會聯同嗰兩隻禽獸分裂SPIRIT!好喇唔好再講喇!我地都係講返今次既擄勢行動喇。嗰九個執行者掂唔掂架?』而家應該要集中喺今次既行動道。
「放心，佢地都係精英。以杜易民、馬安倫、鄧希忠為主帥，其餘六個Backup一定無問題。」阿賢繼續吸一吸佢手中既香煙。
『我知道佢三個已經執行過十三次擄勢行動，但其餘嗰六個...』我仲未將要講既說話講完...
「其餘嗰六個只係Backup，唔大影響。而且佢地六個人每個都有自己既專長。好似葉敏茵咁，佢既應變能力高超。如果有咩差錯，佢都可以立刻諗出修正辦法。」阿賢將我既說話打斷...
『係姐...之但係咁次既行動...』我仲未將要講既說話講完...
「今次既行動好重要，唔可以有差池。對我黎講，每一次行動都好重要，我亦唔容許自己有乜差池。」阿賢又一次將我既說話打斷...
有阿賢既策劃我當然放心。
之但係...我心裏始終有D害怕...
世上有太多意外...而今次既行動會對綽瑩同綽姿有直接既影響...
唔係...應該話同打後一連串既計劃都會有直接既影響...
最大問題係，我地已經再無其他後備科案喺手...
「放心喇，唔好唔記得我地已經喺地獄安放左唔少人。而且做過好多次模擬實戰。一定無問題。」彈一彈支煙，淡灰色既煙灰隨風飛舞。
雖然話準備充足，但係始終都係有太多變數...
試問喺呢個世界上，有邊個可以計劃出滴水不漏既劇本?
除非係神喇...
「仲有，我地仲有阿月。有阿月預先向MINDER作出誤導，我地就安全得多。」阿賢吸埋最後一口，將煙頭整熄，放到盒裏面。
講起阿月就仲擔心...
阿月雖然天資聰敏，但呢個不穩定元素，一D都唔可靠...
我真係唔知佢幾時會失控...
「總知放心喇。我地已經計劃到最好，盡可能減低出錯。」阿賢拍一拍我背脊。
『之但係...』我仲未將要講既說話講完...
「你就係差呢一樣野，缺少左信心。你咁樣一世都到達唔到你老豆既層次架。」阿賢又再一次將我既說話打斷...
我好認真咁望住阿賢:『我比起嗰隻狼好得多!』
阿賢望一望我:「哈...我都希望...希望唔會睇錯人。」
雖然我唔係好明阿賢所指既睇錯係咩意思...但我絕對唔會比嗰隻狼差!
『等等我會去搵智海，俾D野佢轉交俾教授同李飛揚...』我用上一副猜疑既樣望住阿賢。
「係丫?幫我問候下佢啦。」阿賢起身向住監控中心(西部)門口行過去。
阿賢背住仲坐喺張凳道既我，不忘揮揮手向我道別。
睇黎阿賢都唔反對我去搵智海幫手...
咁我就放心。
阿賢都唔質疑既話，咁就無野需要考慮。
雖然當時智海選擇左企喺老豆嗰邊，但如果係為SPIRIT既利益出發，智海都會歇盡所能。
為左SPIRIT...
點解你當初要誤信我老豆既讒言呢...
都係唔好諗咁多...我諗應該係時候問阿風攞野...
我一邊向住監控中心(西部)門口行過去，一邊嘗試以思緒同阿風聯繫...
「咁早就搵我麻煩喇?」阿風既聲音喺我腦海中出現。
『嗯。我要既野搞掂未?』對住阿風直接問就好。
「你要我搞好多野喎~你指既係邊樣先?」好明顯阿風有心玩野。
『iPad。唔好玩喇，我趕住要。』好快我已經穿過監控中心(西部)門口。
「早知你會吹我架喇，一早搞掂喇!」阿風帶有埋怨既語氣。
『非常好。我而家去梗你道。』老實講句，你要埋怨我都唔會理你咁多。
「你慢慢黎，慢慢黎好喇!我仲做梗最後測試架。」阿風好似知道我已經趕住過去。
『你最好快D完成埋佢。』講完之後，我將思緒抽離。
太好!
一切都係依照計劃進行!
無錯!一切都好順利!
一定要順順利利!
監控中心(西部)裏面，各個房間既行者都好努力為SPIRIT付出。
日以繼夜咁工作。
基本上，全個控制中心都係24小時不停運作。
為確保行者有足夠既休息，行者們會以六小時為一更工作。
六小時既工作可以確保工作時更有效率。
雖然係咁，但當然有唔少好似阿風咁既工作狂，無時無刻都想為SPIRIT付出。
好快就由升降機降到地下72層。
阿風叫我慢慢黎，我又點會聽佢講。
我仲要越行越快，越行越快...
「嘩!大佬~我咪叫左你慢慢黎既...做乜咁快就黎到?!」阿風左手拎住塊麵包，右手拎住杯咖啡，咦咦哦哦咁...
『我已經好慢架喇。iPad呢?』我已經急不及待四圍搜索。
「喂喂喂!唔好亂咁搞!」阿風咬埋剩餘既麵包同放低手上杯咖啡後，立即阻止我既搜索行為。
『咁你快D拎部iPad出黎喇。』我攤大手板要求阿風交出iPad。
「都話做梗最後測試咯!唉...我越黎越覺得自己仲慘過喺地獄中，被惡魔奴役既奴隸...」阿風無奈咁搖搖頭。
我幾時有奴役你呀...
講到我好似惡魔咁...
我明明就係為消毀惡魔而生既英雄囉好唔好?
『咁仲要幾耐呀?』我隨便搵張凳坐。
「等多陣添喇!你要知道要整你所講既iPad唔係咁容易架!」阿風亦搵左張凳坐。
『可以有幾複雜呀?』我有D唔係咁耐煩...
話晒都只不過係上個世紀既科技，而宜家整返出黎又有幾難?
我係覺得阿風有心偷懶囉!
「你估真係整返部上個世紀既玩具咁簡單咩?仲要做好多防禦設備架嘛!」阿風好似睇穿左我個心諗乜...
『咩防禦設備呀?又唔係叫你整防武!』我繼續以唔順氣既態度對阿風。
「你真係單純...真係乜都唔諗清楚架喎...好彩我唔係無腦架姐~」好明顯阿風呢句略帶攻擊性...
話我單純?
話我無腦?
呢個計劃都係我諗出黎架!
仲有好多計劃都係由我諗出黎架!
「要將我地整出黎既野送去地獄...仲要送去目標人物手上，當然要小心處理!」阿風擺出一個意氣風發既死人樣...
『哦~』我真係理鬼佢!
「始終都要加D保密設施...好似話防止被MINDER偵測到啦...唔可以被scan啦...」阿風喺道自言自語...
『點解要咁麻煩呢?俾MINDER偵測到咪偵測到囉~』我又唔覺得有咩問題喎...
「梗係唔可以啦!你要知道iPad唔應該仲會喺呢個世界上出現，如果俾MINDER偵測到，唔知佢會唔會產生懷疑!」阿風好自以為事咁望住我。
『MINDER有咁聰明喇咩?』雖然阿月都話MINDER既學習能力驚人...
「當然有!可能比估計更聰明...再講，iPad裏面有黃金海岸既相片，仲有你既相片!萬一俾國安局佢地發現就麻煩!」阿風俾左隻中指我...
阿風所講既又唔係話無道理...『咁又係，萬一李飛揚惹上國安局，以佢呢種大少爺，一定招架唔住...』
「所以我而家做梗既就係呢D測試~」阿風拉出一個EVE粒子實體顯示器。
顯示器中顯示出多個唔同數據...
仲有幾個棒形圖...
五顏六色...
其實每次，阿風拉出呢D數據同統計圖我都唔係好知點睇...
科學家係唔係都比較鍾意睇呢D野?
又係唔係對呢D野比較敏感?
「我已經照你既指示將D相放晒入去。亦都將之前注入iPad裏面既EVE能源抽乾。而家既iPad就要靠裏面鋰聚合物電池發動。當然鋰聚合物電池裏面無任可電能喇。」阿風指一指個棒形圖...
當然唔會有電喇，喺結界範圍內，唔啟動中止電能瓦解器係無可能產生電能架嘛。科學白痴既我都知喇~
「機關已經準備好，只iPad俾MINDER盯上，防禦系統就會啟動。」阿風點一點頭。
『嗯嗯...』原來要有機關...
「而家要測試既，就係要用幾多LILITH先可以影響到天眼既偵測呢...」阿風又指一指個棒形圖...
『要用LILITH?』雖然我唔識睇個棒形圖，但我都扮晒識咁望住佢...
「嗯...就好似用黎呃MINDER，注入腦裏面既假晶片內既LILITH粒子咁...究竟要用幾多LILITH先發揮到足夠既LILITH粒子影響天眼呢?」阿風好認真考慮梗...
『但唔可以用太多LILITH...』LILITH已經好唔見駛...
「嗯...唔可以用太多，但又唔可以用太少...太少就唔足夠影響天眼...而且續航力又係另一個問題...」阿風摷一摷自己D頭髮...
『嗯嗯...』續航力...要幾耐先叫足夠?
「續航力最少都要有三日...唔只...應該要有一個星期...最少要有一個星期都唔可以俾MINDER發現到iPad...」阿風將棒形圖裏面D棒拉高拉低...
『一個星期?要維持一個星期?咁則係要幾多LILITH?』我望住個EVE粒子實體顯示器裏面D數據，閃下閃下...
「好多...差唔多係我地屯門領域一日既總用量...」阿風認真咁望住個棒形圖...
一日...我地又少左一日...
『真係有必要?』我仲係希望可以盡量慳得幾多得幾多...
「係!我地唔可以低估MINDER...而且呢個已經係最保守估計...」阿風堅決咁望一望我...
如果係咁...真係無辦法...
少一日就少一日...
只好希望我地可以順順利利...
「就咁決定!我地用一日既份量，注入iPad入面，防止iPad裏面既資料俾MINDER發現!有無異議?」阿風望住個確定掣問一問我。
『就咁決定。』已經無得揀...
「好!」阿風左手食指一撳，撳落個確定掣道...
李飛揚...你真係要生生性性先好...
我為你做咁多野，安排一條咁直既路俾你黎，你唔好自己唔知走左去邊先好!
「等多陣啦，等到LILITH注入完成就可以攞得架喇。」阿風將EVE粒子實體顯示器關閉。
『嗯...希望一切順利。』我仲係有所顧忌...
「一切順利...我地只可以盡量做好自己可做既事，盡量減低出錯既風險。呢樣就係學科。」阿風拎起檯上面杯咖啡飲一啖。
盡量做好自己可做既事?
「我地只不過係人...要一切盡在自己手中既，就只有神先可以做得到。可惜我地仲未掌握到死海文書...」阿風搖搖頭。
『盡力喇...繼續盡力解開死海文書既細節...解得幾多得幾多...我都會盡力推敲...』其實我真係無乜信心...
無辦法...
無神既幫助之下，好多野都係靠自己...
「其實人類真係好奇怪...從未見過有神既出現，但深信世上有神既存在...經常用同神有關既名詞為物品改名...死海文書...歷史中出現無數咁多卷死海文書...」阿風面帶不爽...
『正正就好似你之前所講，我地只不過係人。人既能力太有限，所以我地祈求有神一樣既力量降臨。』我用食指指一指上面。
「祈求神一樣既力量降臨?不如信自己好過啦。」阿風用中指指一指上面。
『咁你快D幫ADAM、EVE、LILITH重新命名好喇~』我用中指指一指阿風。
阿風諗左一諗...飲一啖咖啡...「都係算啦...我承認我都係一個只識得祈求會有神一樣既力量降臨世間既凡人~」
無錯...我都只不過係人...
一個平凡得很既凡人...
我地可以做得D乜?
盡自己既努力去做好自己做到既事。
我一直都係咁諗...一直都做好自己能力範圍內既事...
但眼前既...實在有太多太多喺我能力範圍以外...
「你還年輕。」我記得老爸臨被逐出屯門領域前，有咁同我講過...
我好記得...
嗰陣時我唔係咁明白，佢咁講係咩意思。
但而家...我開始明...或者係應該話有少少明...
「好!搞掂!」阿風起身行到去房間既中間...
地板突然開出一個洞，有塊簿簿地身...黑黑地既...反反地光既野喺個洞道升上黎。
塊野越升越高...越升越高...
升上黎既期間仲會識得慢慢咁自轉...
我仲見到塊野既背面係銀銀地色...有個好似俾人咬左啖既銀蘋果...
「厲害~真係同資料上既iPad一模一模~我真係覺得自己太厲害~」阿風一手就拎起左塊板，左睇睇，右睇睇。
我一手就由阿風手上搶左塊板過黎:『呢塊野就係iPad黎喇?有咩咁特別?似塊唔大唔細既鏡多D咋喎...』
我左望望，右望望，反轉黎望...都唔覺有咩咁特別...
「喂喂喂!小心D呀!你唔好話，呢塊iPad真係好堅!」阿風係咁喺我耳邊叫我小心D。
『有咩咁堅?』“啪啪”我喺手中拍左兩下...
「喂喂喂!唔好拍呀!古時既野避震做得唔係咁好架咋!」阿風拉住我手臂...
『點解無野睇既?點先有野睇呀?開...開始...開啟...開機...』我不段嘗試唔同方法...
「你有無腦架?都無電梗係唔著啦!」阿風拍一拍我個頭...
『咁我點試呀...』我冷眼望一望阿風...
「咪唔駛試囉...你唔係唔信得過我呀化?」阿風送返個冷眼俾我...
『唉~好喇好喇好喇~唔駛試就唔駛試喇...係咁喇...』我拎住部iPad準備行出房間...
「喂~阿日...幫我問候下智海呀...」阿風喺我身後交託我...
我亦背住阿風俾個like既手勢佢...
高智海...你知唔知有好多人都好掛住你丫...
最起碼呢道已經有三個...
我唔知道有乜可以令你留戀...
難道只要係陳星既命令，你就甘心放棄一切?
我係佢個仔，我都識分青紅皂白，但點解你要同我老豆一樣咁冥頑不靈?!
離開地下72層後，我都要繼續為一陣見智海做好準備。
繼續喺黑黑綠綠既環境下穿梭...
話就話準備，其實都無乜特別...
只係要返去房間，拎埋其他要交俾智海既物品。
為左吸引李飛揚既視線，我都真係準備左唔少舊物資。
呢D舊物資，全部都係由住喺屯門領域既人民手中收集返黎。
全部都係正實，全部都係曾經發生過既歷史。
一D被遺忘既歷史...
唔好話身在地獄既人唔在意，就連我地SPIRIT既人都唔多在意...
人類喺歷史中得到既唯一教訓，就係人類從不汲取歷史敎訓...
呢D歷史遺留落黎既有舊報紙、舊相簿、舊日記、舊地圖、舊照片等等...等等...
當中可以話全部都係地獄禁止傳達既資訊。
好似話未有誡律之牆之前既SPIRIT係點樣、SPIRIT既起源、解放軍圍城等等...等等...
我好有信心，呢D都係李飛揚想知既野...有興趣既野!
當李飛揚見到呢D野既時候，一定好驚訝...
你就唔好令我失望呀...李飛揚!
當我一路盤算，一路向住自己既房間行過去既時間...
『阿月?點解妳會喺道?』我見到阿月企左喺我間房既大閘門前。
「我岩岩連接過INTRUDER，有兩件好緊要既事要同你講，所以無辦法唔喺道等你返黎。」阿月由大閘門行近我面前。
『緊要事?用思緒連接就得啦。』我行近大閘門...
“吱...依...”閘門中間既鎖隨即打開。
「唔得，一定要當面同你講。」阿月跟住我後面。
阿月好少會唔認真...
咁認真既話，一定係事態嚴重...
唔通係EVE系統出左咩問題?
『咁妳講喇。』我同阿月走入房間後，我企定定望住阿月。
「有兩件事。首先，我由INTRUDER既紀錄當中發現，曾經有兩個人嘗試由網絡搜尋有關u.00.w既資料...」阿月以一副非常認真既神情望住我...
網絡搜尋?
『可能係妳D fans呢。妳唔係唔知妳用u.00.w呢個身份同幾多人做買賣先得架。』我有D唔係好習慣望住眼前呢個咁認真既陳月...
「唔係一般既搜尋。」阿月既神情無任何既轉變...
呢種認真既樣，總有一種吸力...
『唔係好明...妳講清楚D。』我盡量認真正視阿月...
「第一個人係喺尋日大約三點左右。雖然手法比較新手，但好明顯用過下心思黎搵我出黎...」阿月點點頭。
用過下心思?
『咁第二個呢?』
「第二個人係喺今朝0940開始搜尋。呢個人好明顯係老手...有可能係全職hacker...佢用上好多手法去掩飾自己既正身。而且當佢發現我運用INTRUDER為u.00.w設置左個陷阱後，佢認得收手。」阿月顯得更加認真。
新手?
老手?
差唔多時間之內，有兩個唔同層次，用唔同手法既人，嘗試對u.00.w展開搜索...
『咁知唔知點解佢地要搜尋有關u.00.w既資料?』有咩人會對u.00.w咁感興趣呢?
解放軍?
國安局?
唔會...佢地都曾經試過...但最終都選擇放棄...
佢地情願同u.00.w買情報，好過浪廢時間搵出u.00.w既底蘊...
當然...我地賣俾佢地既情報，係唔會對我地SPIRIT做成嚴重影響。
「唔知道。不過我已經追蹤到佢地係咩人，住喺邊。」阿月突然露出一副陰險既笑容...
阿月呢種...好似狼遇上小白兔既笑容，真係令人毛骨悚然...
『係咁妳就話俾我知，等我去殺左佢地。』我亦嘗試露出一副陰險既笑容。
「唔得。我有必要親自去問一問佢地，究竟為乜要搜尋有關u.00.w既資料。」阿月對我莞爾一笑...
明明就係想返去地獄走幾轉，扮咩有必要?
呢個阿月...真係要佢乖乖地留喺控制中心裏面都唔得...
『好，反正我都要帶D野俾智海，我就同妳一齊去搵。』無錯，我仲要拎埋D野先出得發...
當我轉身諗住去拎埋其他野...
「等等...我仲未講完...你唔記得左我話有兩件事嘛?我只係講左其中一件...」阿月拉一拉住我隻手...
我回頭一望...
阿月既神情比之前更認真...「第二件事係...我地失去左同趙玉玲之間既聯絡...」
綽...瑩...
「正確D黎講...從INTRUDER監視MINDER既資料顯示，由尋晚十一點之後，MINDER裏面再搵唔到有關趙玉玲既訊息...而有關趙玉玲喺中央集散式人工智能保安系統裏面既所有紀錄亦都再搵唔到...」阿月以慎重既眼神一直望住我...
MINDER無時無刻都會追蹤住地獄裏面所有人既位置...
中央集散式人工智能保安系統亦唔會無啦啦刪除一個中國香港既奴隸既資料...
無理由...
點解會咁...
綽瑩...去左邊?
失左蹤?
『有無搵到綽瑩最後出現既地方係喺邊道?』我開始緊張起黎...
「有，中央集散式人工智能保安系統記錄左趙玉玲最後出現既地方，係喺佢位於華富邨華興樓既屋企...」阿月既焦點無半點偏差...
最後出現既地方，係綽瑩喺地獄既屋企...
點會喺屋企失蹤?
我內心開始不安起黎...
硬係覺得有D唔好既事發生左...
「阿哥...我地要去調查一下嘛?」阿月搖一搖我隻左手...
調查一下...
去地獄調查一下...
『嗯...』一定要搵返綽瑩!