《香港革命戰》(上): [15-深入搜索] PART 3
同阿月離開座舊樓，坐返上架Aston Martin...
『係妳話要俾佢入黎架咋，妳自己安排人手接佢丫~唔好旨意我同阿賢交涉丫~』最怕就係要同阿賢計劃行動...
「得啦得啦~放心啦~我同阿賢都好傾得埋既~今晚實搞得掂~」阿月得得戚戚咁既樣。
唔係丫化...
阿賢喎...
連阿賢呢舊石頭都傾得埋?
真係估妳唔到...
『下一個詳細地址。』撳落刻有Aston Martin logo既Engine Starter後...
“吼...吼...”
「西環加多近街37A號加多近山。」阿月扣好五點式安全帶。
加多近山...
舊豪宅...
『黑喵，顯示西環加多近街37A號加多近山的路線。』爭取時間!
“依...”一下後輪咬地聲，Aston Martin沿住殘破既舊公路，離開舊區。
早上十一點零八分...
真係好。
處理左兩件事之後都係十一點鬆D。
而架空高速公路上面，除左三層巴士外，仲有少量歐洲車。
但奇怪既係...
『點解對面線連一架車都無既...阿月，係妳做既好事?』我望一望對面條行車線。
「嗯?係丫~為左執行擄劫王嘉雯既執行者嘛~出黎之前已經設定好大約喺呢個時間，將對面呢層既行車線清空，所有車輛使用另外幾層唔同既架空高速公路。不過佢地已經駛過左呢段路，好快就會再有車輛使用架喇。」阿月望住面前既路面...
『嗯...』其實我係唔知阿月點做得到...
有關修改自動導航系統既方法我係完全唔知...
一直以黎都係由阿月親力親為，親自改寫。
阿月可以修改自動導航系統既設定，令到車輛喺某D時間使用指定既架空高速公路。
呢種技術對我地黎講真係好有用。
不過...
「我唔知道我仲可以改到幾多次...MINDER越黎越醒喇...我就快被佢拋離。」阿月依然目不轉睛望住面前既路面...
雖然唔計今次既話，擄劫行動照理就只係剩返一次...
而呢一次仲唔一定要執行...
但如果阿月再唔可以由MINDER中修改自動導航系統既話，對我地其他既行動都好不利...
特別係對一D對生命可能會構成影響既行動...
「減慢小小車速。」阿月直視前方。
『哦?點解?』我望一望投射式標板...1006km/h。
「因為飛揚架車就喺前面。」阿月指一指前方。
李飛揚就喺前面?!
我跟住阿月手指指向既方向望過去...
遠處...
幾架三層巴士之間...
幾架歐洲房車之間...
白色既跑車...
「瑪莎拉蒂，飛揚既愛驅瑪莎拉蒂。」阿月眼定定咁望住架白色瑪莎拉蒂。
就喺前面...
第一目標就係前面!
李飛揚...
我腳並無減輕力度，車速1006km/h...
我唔會放過你...
1010km/h...
「哥哥...」
1020km/h...
你呢隻惡魔!
「你再喺咁加速就會俾飛揚發現。佢好認得我呢部Aston Martin。」阿月捉一捉住我手臂。
俾佢發現...
係...而家唔可以俾佢發現...
雖然我真係好想而家就捉走佢!
但...唔可以...
我開始減慢車速...
白色既瑪莎拉蒂開始離我越黎越遠...越黎越遠...
直至離開我既視線範圍...
我唔會用“唔捨得”黎形容我而家既心情。
但係我知道阿月係...
由阿月既眼神中可以感受到，無盡既掛念、無盡既思念、無盡既愛念...
阿月對呢個李飛揚既愛真係好深好深...
都係嗰句啦~口裏說不，身體卻很誠實嘛~
喺阿月同李飛揚呢段可歌可泣既禁斷愛情故事裏面，我突然諗起一個古老既童話故事...羅密歐與茱麗葉...
佢地兩個根本就係羅密歐同茱麗葉!
老套到爆囉...
不過講開又講...
羅密歐與茱麗葉好似係bad ending架喎...
唉~都係唔好理咁多，阿月同嗰個李飛揚點樣發展都唔重要!
而家最重要既係專心面前既任務!
白色既瑪莎拉蒂離開左視線範圍之後，我地亦都駛入西區河底隧道。
『真係無問題架嘛?』我一邊專心揸住個軚盤，一邊問阿月。
「你講收費問題?指定既機構都仲可以既...其他就唔好喇...」阿搖一搖頭。
睇黎情況真係好差下...
「MINDER既成長速度已經超越左我既評估範圍，喺地獄裏面既活動會越黎越多局限。」阿月兩隻食指喺道篤下篤下。
『最壞情況會係點?』加速超越前面架三層巴士。
「再唔可以走入地獄範圍。」阿月喺空氣中畫左一個大圓圈。
『咁麻煩...』如果唔可以再親自走入地獄範圍，就真係好多野都做唔到...
「都唔算麻煩架喇~至少短時間內MINDER仲未能夠偵測出換過腦既人...」阿月篤一篤自己個頭。
『如果MINDER可以偵測到既話，我地就輸架喇...』好認真講句，呢個係我最後既皇牌，亦都係關鍵。
「咁你望都望我地打後既計劃最好都係順順利利~因為...我估MINDER已經開始評估梗呢個可能性...換腦既可能性...」阿月雙手合上，諗左一諗。
雖然唔係好明，但大概對我地黎講都唔係一件好事...
MINDER有幾聰明，我就真係唔知...
但如果仲要俾阿月聰明既話，咁就真係好難搞...
MINDER...
究竟趕唔趕得切呢...
硬係覺得前路比預計中險峻...
“颼...”衝過西區河底隧道後，黎到地獄既核心區域－港島。
奴隸既血同汗大部份都係流到黎呢道。
黎到呢道就要更加小心。
呢道雖然離解放軍基地比較遠，但就離國安局比較近。
國安局...
實際上，國安局比解放軍更麻煩。
佢地既調查非常深入，手法亦非常殘忍...
而家身邊有阿月喺道，我要保護埋佢既安全...
如果比國安局盯中既話就大鑊...
要我犧牲唔係問題，問題係阿月唔可以有事...
都話左唔好帶佢出黎架喇...
佢硬係唔聽...
都唔知點解阿月咁鍾意地獄...
見到嗰個李飛揚又點姐?
又唔可以同佢接觸!
遠遠咁望住佢就夠呀?
得個望字又搞到自己咁危險，值得咩?
有時真係好唔明，一個咁聰明既人，點解會笨實一時...
「哥哥...你面色好難睇喎...諗梗乜呀?」阿月望住我...
『無無...諗梗一陣點對付第二個hacker咋嘛...』唔可以俾阿月知我諗乜...
「前面就要轉彎喇喎...你仲唔減速?」阿月指一指前面個路口...
『係喎!』我睇住條導引線就快要轉入路口...
我立即向左一扭，拉一拉handbrake，落波...落波...落波...
“依...”
「嘩~哥哥...你專心D好唔好呀?」阿月捉住五點式安全帶責怪我...
『哦...哦...Sorry...』唔係妳既話我駛咁分心?
西環，可以話係半個舊豪宅區...
大約仲未出現誡律之牆前，呢一區開始發展。
起左好多棟所謂可以睇到海景既豪宅。
但一棟又一棟咁起，起完一棟又一棟。
原本可以睇到海景既豪宅，好快就俾前面新起既遮住。
睇唔到海景唔緊要，最慘係要睇樓景。
你唔好話，海景貴，樓景都唔平。
但咩係樓景?
睇到對面屋裏面D人做乜咪叫樓景囉。
有無咁誇張?
再誇D都仲有!
樓與樓之間係近到可以同對面樓既人握手...
咁樣既城市規劃真係得惡魔先諗得到...
“吱...依...”當我同阿月落左車後，Aston Martin被自動送到地下。
加多近山...
『所謂的豪宅都只不過是這樣...』我望住面前既大廈...
大又唔係大，高又唔係高...
外牆睇落去可以話係光鮮D...
其他既根本就同大角咀既危樓無分別。
「不竟也是舊豪宅~而且並不是真正上等人的區域~所謂的豪宅，只是用來欺騙渴望成為上等人的下等人的手段而已~」阿月行到我身邊，同我一齊望住座偽豪宅。
騙徒手法?
諗得出呢D咁低劣既手法並唔可恥，咁都俾人呃到既先係最可恥。
我相信如果有眼既、有腦既、有分析能力既、唔係弱智既都俾人呃到既話，只可以話你連自己都呃埋。
『話說大堂的門都鎖上，我們要怎樣進去呢?等其他人出入?爬上去?直接衝擊大門?』我左望望，右望望。
街上都有唔少人...
有男有女有老有少...
不過個個都好似行屍走肉咁，無咩表情...
「直接走進去就好了。」阿月向住玻璃大門行過去。
『直接...』我既疑問都未問完...
“噹”玻璃大門就打開...
咁就打開左喇?
我地唔係住喺道...
甚至用梗假身份...
我地係你地所稱為無惡不作既三合喎...
咁都為我地打開方便之門?
保安真係差...
我一直跟喺阿月後面...
「我早已經設定好在這個時候打開玻璃大門，還設定好一號升降機在這個時候為我們服務。」我同阿月行入大堂後，面前既升降機已經中門大開。
咁厲害?
但點解唔可以設定到，當系統感測到我地出現既時候先打開門呢?
咁既話唔係仲型...仲更加暢通無阻咩?
「沒有辦法吧~我不可以過於張揚~假如要在系統裏加入我和你的身份，很容易被MINDER識破呢~」我同阿月行入升降機後，升降機隨即關上。
原來有咁既一回事...
不過唔緊要啦~
反正有阿月安排，我都唔需要擔心咁多~
升降機一直上...
『我地要上幾多樓?』我望住個投射顯示器...
「16樓。」阿月微微嘴笑...
阿月喺道笑咩呢?
10...11..12...13...
望住個投射顯示器裏面既數字一路跳，好快就到喇...
“噹”一聲響，升降機門打開...
我行出升降機:『左定右?』
「左。」阿月既聲音由我身後傳過黎。
『哦...』當我向左轉之時，我見到大約五米前既大門已經打開...
屋入面企左一個人，一個二十多歲既女仔...
個女仔長有長長既黑髮，髮尾仲有小小捲曲...
上身著住著白色長袖T，下身著住紅色短褲...
雪白既雙腿，鞋都無著...
呢D都唔係重點，重點係...
呢個女仔手上有支類似槍既物體，仲要指住我!
「噢~Sorry呀哥哥~我計錯時間~早左開佢道門添~」阿月喺部升降機入面同我講...
『留係升降機道唔好出黎。』我望實屋裏面呢個靚女...
我見到靚女雙手不斷震下震下...
“咯...咯...”我向住靚女身處既方向行前兩步...
靚女雙手就震得更厲害...
“咯...咯...”我再行前兩步...
靚女對眼有D飄忽...
“咯...咯...”我再行前兩步...『美女，妳的手槍還沒有解開安全鎖喔。』
靚女呆一呆，望一望槍上面既安全鎖...
襯呢個時候，我立即衝上前，閃到靚女身後!
「呀!」靚女發出一聲尖叫...
我左手鍊住靚女喉嚨，右手將槍上既安全鎖LOCK實，嘴貼到佢耳邊:『聽我說，別大叫。不然我的手不知道會移到那裏去。聽懂嘛?』
靚女郁都唔敢郁，乖乖地企定定。
只係感覺到佢既心跳好快。
我慢慢將靚女手上既槍接收。
『阿月，過來吧。』我錬住靚女條頸後退兩步。
「噢~半分驚險也沒有呢~」阿月雙手放後，彈下彈下咁彈過黎。
我有理由相信，阿月係存心SET錯時間，將道門提早左打開...
“咯...”阿月行入間屋之後，門亦都自動關上。
「妳就是林芊欣對吧?」阿月行到靚女面前。
林芊欣好似好愕然，但又唔係好敢亂郁。
『回答她吧。』我搖一下林芊欣既喉嚨。
「妳怎會知道我的真實名字?」林芊欣竟然反問阿月。
「呵呵~」阿月喺細小既廳道行左一轉。
睇真D呢間屋...相比起大角咀既海興大樓仲細...
一百呎?
我諗大約都係得一百呎左右...
一百呎既空間都可以稱上豪宅?
究竟呢道既人...心裏面諗梗乜野?
「今天早上，妳有否搜尋有關一個名為u.00.w的人的資料?」阿月翹起對腳，高貴典雅咁坐到啡色既皮梳化上。
林芊欣好似唔係好想回答...
「妳最好乖乖地老實回答，不然...我不敢保證妳身後的男人會對你作甚麼...」阿月展露出陰險既笑容...
唔好講到我好似D變態佬咁得唔得...
「對...妳就是u.00.w?」林芊欣竟然再反問阿月。
「聰明的美女喔~是誰指使妳的?」阿月摸下摸下將梳化。
「我不知道。」林芊欣表現得好冷靜。
『妳還是老實點比較好。』放心，我唔會亂摸，但我會殺人。
「我真的不知道...」林芊欣身體震左一震，睇黎佢無忘記而家既佢仲係肉隨砧板上。
「我看妳都不太老實喔~是Anonymous給你的任務吧?」阿月踢下踢下隻腳。
林芊欣只係望住阿月，並無作出回答。
「妳也是Anonymous的成員?」阿月指一指林芊欣。
林芊欣繼續保持緘默...
呢個女仔都幾口硬架喎...
我用力錬一錬林芊欣條頸:『快回答!』
「對...我也是Anonymous的成員...組織要我搜尋有關一個名為u.00.w的人的資料...」林芊欣終於肯講得詳細D。
所以話，適當既武力係必須既。
「委託人是誰喔?」阿月左望望，右望望，好似搵梗野咁。
「這個我真的不知道...」林芊欣又唔肯講喇...
『給我說出來!』我又再鍊一鍊林芊欣條頸。
「我...我真的不知道喔!咳咳...」林芊欣顯得有D辛苦。
睇黎我太大力喇...
對住靚女我唔應該咁粗暴...
「算了吧~看來她真的不知道~Anonymous他們做事向來也很小心~想必有一定的保密機制~你就放過她吧~」阿月向我示意鬆開林芊欣。
好喇~好喇~阿月話乜就乜喇~
將林芊欣鬆開之後...
「咳咳...」林芊欣吸多兩啖氣...
我用本來係林芊欣既手槍指住佢個頭...
「Anonymous~要怎樣hack入他們的系統呢?」阿月望住個天花板諗下諗...
「不可能的...就算我是Anonymous的成員，也不會知道有關組織的資料...」林芊欣坐到喺地下上。
「哦~對了~妳也是Anonymous的成員~只要利用妳的身份就好了~」阿月展露出誘惑既奸笑...
「我不是說了就算我是Anonymous的成員，也不會知道有關組織的資料嗎?還以為妳有多了不起...」林芊欣送左個冷眼俾阿月...
係囉~係囉~
雖然我唔係太識D咩hack黎hack去既野，但我都明就算係林芊欣本身，都對組織唔多認識啦...
咁仲點可以利用佢既身份查Anonymous呢?
「黑喵，開啟模仿程式。我是林芊欣，搜索有關我與Anonymous的資料...搜索有關p0is0n的資料...搜索有關d1ese1、cl0seup、k1ngd0m的資料...」阿月使用佢既作業系統一路搜索唔知係乜既資料...
阿月喺道搞梗乜呀...
「黑喵，與林安明通話...HI~請問是林安明先生嘛?我當然不是~哦哦~沒甚麼特別~我是想問問你受了誰的委託搜尋有關u.00.w的資料吧~哦?你猜猜吧~嗯?她?被我殺了~嗯...嗯...對喔~真聰明~嗯嗯...噢~謝謝你~你救了你自己~Bye~」阿月同咩咩林安明通話...
但林安明係咩人?
「妳剛才作了甚麼?」林芊欣好困惑...
「與妳的上上上上上頭通話~」阿月又喺道甜笑...
「不可能的...連我自己也不知道他是誰...騙人...騙人...」林芊欣搖搖頭...
「信不信由妳~反正我已經知道是誰委託你們了~」阿月越笑越甜...
「你們...從何辦到...究竟你們是何方神聖?」林芊欣比之前更加困惑...
阿月帶住誘惑既笑容:「三合，你們是這樣稱呼我們的。」
「三...三合...呀!!!」林芊欣聽完阿月講之後，驚到立即發出慘烈既尖叫聲...
駛唔駛咁驚呀...
我地係唔係真係咁得人驚呀...
「來吧來吧~不用害怕~坐吧坐吧~」阿月安撫完林芊欣之後，帶佢上梳化坐。
林芊欣雖然好似仲係好驚咁，但半推半就之下都係坐左喺阿月隔離。
「妳自己一個住嗎?親人呢?」阿月搭住林芊欣膊頭，溫柔咁望住佢。
又要聽故事喇...
我嘗試喺一個一百呎左右既空間裏面搵個地方企下...
雖然話女仔既屋企都係整齊D，但呢間屋又真係太細啦掛...
好喇...我都係企埋牆角喇...
林芊欣望一望阿月:「我媽媽在我出生之時，因為政府醫院沒有適當的處理致死...爸爸為了我倆的生活，每天工作20小時...當我14歲的時候，爸爸因過勞而死...」
又係D悲慘故事...
「嗯...妳為何會加入Anonymous呢?」阿月摸住林芊欣隻手，憐憫咁望住佢...
我硬係覺得阿月喺道抽梗水...
林芊欣耷低頭:「父母也因為活在下等層次才會得此慘劇收場...我發誓要爬到上等!」
我睇得出林芊欣由悲傷轉變為憤怒...
「15歲的時候，我已經要自力更新...每天上課...打工...打工...上課...打工...打工...為了生存，我可以不眼不休!」憤怒既氣場仲要不斷擴張...
為左生存...你可以去到幾盡?
想做自己想做既事已經唔可以...
就連想休息下都唔得...
「為了得到更多金錢交學費，我還會從事不法行為...而最容易又賺最多的是...處理非法數據...」林芊欣開始處於回憶當中...
處理非法數據?
邊方面既非法數據呢?
黑錢?
我諗最常見都係黑錢...
要將記錄黑錢既數據，修改為見得光其實唔難。
原因係因為MINDER對呢方面既監控接近零...
「由起初處理黑錢記錄，慢慢地了解作業系統的運作...從而得知原來系統充滿漏洞!」林芊欣既雙眼越黎越飄忽...
講到系統...
雖然我就唔夠阿月知得咁多，但我都知道成個作業系統既架構係千瘡百孔。
好多時都係政府要求程式設計者寫一D後門出黎，方便監控...甚至偷取資料。
「一直以來，我也致力研究有關系統中的漏洞...錢亦越賺越多...直至被Anonymous留意...」林芊欣嘆左一口氣...
Anonymous...
其實Anonymous係一個乜野既組織黎架呢?
「基本上，誰也可以自稱為Anonymous...但真正稱得上Anonymous成員必須有一定的實力...」林芊欣再嘆左一口氣...
任何人都可以自稱為Anonymous...
呢個都算得上係一個保安技巧...
越多人自稱為Anonymous，勢力就會越大。
但要搵出真正係Anonymous既成員，又唔係咁容易...
因為嗰D所謂Anonymous，根本就無同正真既Anonymous成員接觸。
而期間又有好多人會加入自稱Anonymous既行列...
要搵出真正既Anonymous成員，就要花更多更多時間...更難更難...
「Anonymous教了我很多很多...賺回來的金錢亦多了不少...我終於儲了這間豪宅的首期!可是...縱使改變了居住地區，也改變不了我是下等人的身份...」林芊欣開始眼有淚光...
層次...
究竟係邊個定?
又憑乜野黎定?
一直以黎我都有黎個疑問，究竟邊一個人有咁大權力，可以將每一個人劃分去唔同階層?
「我地只不過係人!」老豆間唔使都會咁樣同我講...
人...又點會有足夠權力為別人劃分唔同階層?
「我的生活越來越艱難...甚至比沒有供樓的時候更艱難...每天為爬上更高而付出生命...但我越用力爬，向下掉落的速度越快!生活在這個中國香港...根本沒有途徑給我向上爬!」林芊欣閃住眼淚既眼神充滿怒火!
究竟係邊個令妳咁憤怒?
又究竟係邊個令妳生不如死?
生活喺真相裏面既人就越唔知道真相...
佢地唔係見唔到...係唔肯去面對...唔肯去接受...
情願用假正面既態度去迷惑自己...
去相信一D假正能量去麻醉自己...
奴隸...就是這樣鍊成的...
阿月搭住林芊欣既膊頭:「林芊欣，現在面前有兩條路給你選擇。一，被我們殺掉。二，來我們的地方過新生。」
林芊欣一面困惑咁望住阿月:「過...新...生...?」
唉...呢個阿月又自把自為喇...