讓我們再一次熱血，可以嗎?: Chapter 10
隨後阿偉與阿婷開始籌備遠赴台灣的行程，而阿洛深知自己的時間在倒數中，因此馬上找來阿強完成他的夢想。
阿強的夢想:開一間聘請釋囚的茶餐廳
「喂洛哥，唔使你搵我，我呢啲Action派黎架嘛，我已經籌備緊茶餐廳既野，下個月開張。」阿洛致電阿強，馬上收到這個令人振奮的消息。
於是洛哥便馬上到阿強位於南山村的茶餐廳鋪位，希望可以為兄弟盡一分力。
「喂隊長大人，到左呀?」強哥興奮地說。
「係呀，喂，正喎，鋪面裝修好晒，啲架生又齊晒，諗住點搞呀?」
「我地呢啲計ROI架嘛，如果我肯請，用最低工資請佢地，佢地都已經會仆到黎做啦，而家呢度啲租又咁貴，一定要好好控制成本，用啲平價食材先有賺頭，搵食艱難呀老友。」阿強邊愁眉苦臉邊說。
「咁你諗住點發展呢間茶記?」洛哥一臉不快的問。
「冇架，盡快搵多啲錢，領匯見到如果呢度好搵一定會加貴租，我地到時再諗辦法，總之一切呢，就以成本同利益行先，你知啦，做生意唔計呢啲計邊啲呀?如果真係捱唔住都冇辦法，唯有執左佢當完成左自己一個心願啦。」
「咁呢班釋囚呢?」洛哥開始憤怒。
「喂我比左份工佢地重過新生已經好好啦，唔係要包生養死葬下嘛。」
「強!你知唔知自己做緊乜撚野呀?」洛哥怒哮。
「做生意啦，唔通開善堂咩?」
「如果個個都係咁做生意，仲邊使有我地去行呢個使命呀?你咁做生意同出面啲人有乜分別?而家個社會就係太多呢啲唯利是圖既人，所以先咁唔平衡呀!你知唔知自己做緊乜野呀?你係比機會佢去更生，而唔係因為佢地係釋囚就有議價條件比最低工資佢地呀，你係咪搞錯左呀!柒頭!」
「你都唔撚識做生意架。」阿強說完便憤怒得離開茶餐廳。
我們是否在社會打滾得太久，而忘記了我們追尋夢想的初衷?甚至乎，將追尋理想變成一種追求利益的途徑?有時目標一樣，但目的也會隨時間過去而有所不同。
如果任何東西也是用利益或回報去衡量成功與否，那李嘉誠很成功嗎?很值得別人仿效嗎?首富的成功，歸功於他剝削碼頭工人、歸功於壟斷行業以取得競爭優勢、歸功於政策頃斜、歸功於一將功成萬骨枯的經歷。為著首富的王座，有多少個家庭被剝削得只可租住劏房?又有多少員工被壓制得只能支取不乎合工作量的薪水?
筆者從不幫襯豐澤、百佳、屈臣氏、3網絡、沒有想過在港島置業，便是想利用自己微弱的一分力量，去抗衡大洪流中主流的成功價值觀...
如果成功是由踐踏別人剝削別人而得到，你真的成功嗎?抑或你只比別人更面厚心黑更懂玩社會的規則?
曾有高官叫年青人自問點解自己做唔到李嘉誠，年青人將這個問題交給物理界的權威曹宏威博士...
「博士博士，點解我做唔到李嘉誠?」
博士的回答，讓我有良久的反思...
「乜李嘉誠又做到你咩?」
你不需要模仿別人的成功模式，只需忠於自己，做最好的自己便可以了。
忠於自己，不是叫你忠於當時的自己，而是忠於最原始的自己，那個原點，才是自己的核心價值。
做最好的自己，便是成功...這種成功無從複制，無從抄襲，只有遵從自己最深的心意，才可成就自己獨一無二的成功...
你最原始的自己...在那裡?被社會吞噬了嗎?
強哥在晚上苦苦思量，深思自己搞這間茶餐廳的用意...
當年那個釋囚的兒子肥仔，由於父親失業，家中沒有收入，只好在午膳時間不停喝水充飢。阿強由於生於中產世家，沒有家累，因此時常想請肥仔吃東西，但肥仔是一個很有骨氣的人，每一次也狠狠拒絕。
後來阿強想出一個辦法，他用廉價向外校購入不同類型的NBA籃球明星卡，再交由肥仔在學校高價轉售，把盈利分賬。
雖然平均每日只有二十元的收入，但阿強很開心，不是因為利潤問題，而是因為，肥仔每日可以有二十元吃午飯。
這是阿強第一次進行商業活動，亦是唯一一次，沒有以利益為考慮的商業活動...
「我點解要搞呢間茶餐廳?」阿強問自己...
第二天，阿強再次叫洛哥到南山村...
「洛哥，尋日唔好意思，我知你係想我好，我尋日諗左成晚，諗到一個方法，可以令達到雙贏既效果。」阿強謙卑的對洛哥說。
「係點?我好想聽下。」洛哥興奮的問。
「第一，我搞呢間茶餐廳既用意，係比釋囚一個機會，所以我唔會按最低工資去出糧，而係以市價去支薪，呢個係對釋囚人仕一份尊重。
第二，雖然對佢地有一份尊重，但由於佢地喺外界眼中會受盡白眼，所以我對佢地既要求，會比一般正常既人為高，如果接受唔到既，走!我咁做係要話比人聽釋囚人仕唔係烏合之眾，佢地就算做一間茶餐廳，都可以好專業，而且一定要專業，佢地先會受人尊重。
第三，只要一日唔蝕到番唔到身，我都會繼續Run呢間茶餐廳，如果有盈利既話，我會按每個人既進步同表現去分配股份，等佢地對呢間茶餐廳有真正歸屬感，比機會佢地改過自身，唔淨止係比一份工佢地咁簡單，而係要比佢地融入呢個社會，有一個可以晉升既階梯。
第四，如果佢地有乜絕世好橋可以發展另一門生意，就可以利用嗰筆股份去做創投資本，真真正正做自己既老闆，再Copy呢個模式去幫其他釋囚，呢個模式先至可以Long lasting，靠我一個人既力量唔可以做好多，但如果Copy多幾個我出黎，就可以將呢股力量用幾何級數擴大。
呢個茶餐廳個名我都諗好，就叫Take Two，因為我相信每個人，生命都有Take Two，只要佢地肯的話。」
如果我們在這個石屎森林，受到各種生活的壓迫而劃地自限，我們跟一個在名為「香港」的監獄服刑又有甚麼分別?如果我們可以抓緊那個夢想，過一次Take Two的生活，你會如何選擇?
生命有Take Two，可否再次回想起那個夢想，今天便切切實實地執行它?
洛哥聽完阿強的講解，如釋重負，因為他終於找到了茶餐廳的精粹，一個不劃地自限的經營模式。
洛哥正想開口說甚麼，卻慢慢地失去知覺，暈了下來...