讓我們再一次熱血，可以嗎?: Chapter 8
第二日，Johnny四出找尋全屯門區可以乎合預算範圍的樓盤，因為以往有過睇樓的經驗，他可以迅速知道該樓宇是否合適。
「陳生，你又係公務員又冇個人貸款，三百萬內既樓做九成按實冇問題，你間屋係幾多人住架? 」地產經紀問Johnny。
「兩個人...又或者...三個人... 」Johnny回答，這時電話突然響起，是洛哥。
「喂衰仔，尋晚我走左之後成晚冇搵我，有冇搵到佢呀?定係又縮沙呀? 」洛哥揶揄道。
「我搵左佢，不過唔講住，我有啲好重要既野搞緊。補多句，呢十七年黎我自己欠自己既一個交代，我會用好短時間去討回番黎。」
回想經過了的一生，你做過甚麼?有甚麼事是做完後令你一世難忘?有甚麼目標已經達到?如果要你用五分鐘簡單地說說自己這些年值得驕傲的事情，有信心可以說出嗎?還是活過幾十年，連五分鐘值得驕傲的事情也無法跟別人分享?那麼?你活著又為甚麼?而你和死亡之間的距離，還剩下甚麼?
有人說人的一生大概只有三萬日，頭七千日在學習階段尾七千日進入等死階段，大概可以完全支配到的時日，只有萬五日，時間每流走一秒代表著與死亡越接近，那些一去不復返的時間為你帶來甚麼?為你成就甚麼?
不要以為活過就不枉過，活過...可以是白活!
洛哥聽到Johnny的電話，放下了心頭大石，他知道Johnny正在朝自己的目標進發，於是便找另一位兄弟---雄仔，和他一起達成另一個夢想。
雄仔的夢想:開一個遊戲開發公司
「喂洛哥，我諗過度過真係搞唔掂喎，啲遊戲一個R&D都使幾百萬，我得嗰十幾廿萬儲蓄連開發費都唔夠，點搞一間遊戲開發公司?就算搵阿強借錢佢啲息口咁低守業都守唔住啦。」雄仔在他的家中，面對著自己的mac book，PS4，向洛哥投訴。
「咁呢層我都知，有冇啲On99遊戲唔使咁多人力物力架，你又唔使一開波就整隻GTA既。」洛哥說。
「呀隊長大人，你啲理論雖然講出黎好動聽，但遊戲機係一個虛擬世界黎架，冇番咁上下Visual你估會吸引到啲人去玩咩?你知唔知咩叫Visual呀?視覺刺激呀，你估而家啲人仲係玩仙劍奇俠傳扮下李逍遙嗰個年代咩? 」
「呢層我明，Cost係好大，要投入好多資源，大家再諗諗。」二人不停在斗室內苦苦思量，卻不得要領，又因為喝了酒的關係，二人便不自覺的在沉思中睡去。
晝日起床，由於雄仔要先行上班，於是便留下洛哥一個。他一看手錶，發現已經是早上十時，恨不得立即離開他家吃個豐富的早餐。由於雄仔仍住在一些舊式唐樓，仍然使用舊式的鐵閘門鎖，因此當洛哥打開大門準備開鐵閘時，便暗叫不妙。
「仆街喇，條PK冇留鎖匙比我!點開門呀? 」
正當他想打給雄仔詢問時，更發覺手機因一整晚沒有充電而變成磚頭，於是他便在家中四處找尋充電器...
...找到了...可惜...洛哥這時才記起，他用的是iPhone，而雄仔則是用Android手機...
這簡直是石家洛連環不幸事件!
「唔係要喺度成日等條PK番黎下嘛? 」洛哥心想。
他有一個習慣，就是每天必須到茶餐廳享用早餐，再大口大口地喝一整杯熱咖啡才過新的一天。如果當日不能吃全份早餐，洛哥一整天便會暴跳如雷。
時間是十時十五分，距離茶餐廳停止供應早餐的時間尚有四十五分鐘，洛哥不得不翻箱倒籠找尋雄仔的後備鎖匙，希望可以在十一時前趕上最美味的早晨。
「死仆街，啲野咁撚亂，又打唔到比你，究竟擺左喺邊呀? 」洛哥一邊咒罵，一邊找尋屋內的每一角落。
慢慢地，連暴燥的力量也因為沒有早餐補給而平靜下來，洛哥開始思索雄仔的一般生活習慣，再估計他將鎖匙放在何處。
雄仔是一個很需要安全感的人，他一定會將自己最重要的東西放在身邊...
...如果突然遇到火警，那麼需要安全感的雄仔會把鎖匙放在那裡讓他逃出生天?
...開始跟雄仔的心意慢慢接通，洛哥步到睡房中，看著床頭櫃...櫃的手把帶點塵埃，似是有一段時間沒有被打開過...
...十五分鐘後，洛哥正在享受著五香肉丁麵及熱咖啡，他問茶餐廳借了一個電話。
「喂雄仔!你條粉腸鎖埋度門我開唔到，不過比我搵到你條後備鎖匙，亦都比我諗到條橋幫你搞間遊戲開發公司喇。」
是夜，他們二人再次聚首在雄仔的家，洛哥開始解釋他的作戰計劃。
「遊戲係乜野? 」洛哥首先開腔。
「遊戲咪就係比人玩，用黎放鬆心情同減壓既工具囉。」
「咁既然係咁，遊戲唔一定係Digital Format，係咪?大富翁係遊戲，波子棋都係遊戲，係咪? 」
「係呀，你唔係叫我開發波子棋下嘛? 」
「唔係，但如果我地整一個電子遊戲投入既Cost咁高，點解我地唔諗一啲唔係電子類既遊戲? 」
「洛哥，而家咩年份呀?個個都用電腦個個都用手機個個都用PS4喇，點會有人仲玩大富翁呀?打麻雀都上網同人對戰啦。人地啲Developer個個都用Program寫Game架喇。」
「雄，你明唔明，你呢世人既弱點，就係太過跟人地既做法去行，人地做乜你就做乜。而家係多左好多電腦Game電子遊戲，你就想跟住一齊做，以為咁樣先Work，你有冇諗過如果唔跟人地嗰套去行，可能收獲會更大?
再者，睇下我地既人生，三十三年喇，你轉過幾多份工?又點解要轉工? 」
「人地話第二行好啲，佢地話一齊轉行吖嘛。」
「究竟有幾多野係你自己作主?究竟有幾多野係跟隨住自己既心意去行?就連今次呢個熱血大行動你都係見到其他兄弟參加你先參加。
你同社會上一般既人根本冇分別。社會覺得潮嗰樣野就去跟風，社會覺得好嗰樣野就去做，社會覺得唔Work既野就連試都唔試。有幾多次你係真真正正聽從自己既心意而行事?冇!因為你跟風!你覺得跟風就可以冇風險，但你冇諗過，如果你一直都係跟隨人地既處事方式去做事，你永遠都只會落後於人，你既人生要行自己既道路先可以成功架! 」洛哥激動地說。
「我知呀，但個社會多人咁做，跟住實冇死架，就算死，都有大把人跟住一齊，點解知道人地意見之後先行事? 」
「好呀，我舉個例子，買股票十隻週街啲人話好既股票，九隻都輸死人，你信佢地?早幾年已經有人講過樓價好貴好多大跌三五七成，到而家我地咪又係望住啲仆街樓一日貴過一日!人地做你就做，唔通人地廢你又要跟佢廢咩?仲有你記唔記得，你點解當日唔歸隊?因為你見到我地四個唔再手波所以唔入番隊，唔通你唔後悔咩?
你知唔知出面嗰班羊群係咩人?係一班連自己為乜生活都唔知既無主孤魂黎乍。你番工搭車望下佢地，雙目無神，好似死魚咁，因為呢個社會話佢地聽，佢地應該成為呢個社會既一粒螺絲，社會有既定既規則唔應該逾越，慢慢地比呢啲規則Train到連自己想要乜都唔知，跟隨大家追同一款手機、食同一類型既食物、過同一類型既生活、保持住同一種既意識型態，呢啲就係典型既香港人，人做我做冇蝕底，人唔做我做正傻仔。呢班香港人，死晒架喇，冇得救架喇!
你有冇諗過，成功既人係有別於世界上95%既人，你聽佢地講?你跟佢地同樣既諗法?你永遠唔會成功!如果你覺得跟隨別人意見而可以喺呢個社會保命，你，已經死撚左喇! 」洛哥說完，大口大口地喝下啤酒。
多少次我們想跨出人生的一大步，腦內便出現了一種聲音，告訴你的行為有異於別人，應該規行矩步而埋沒了當初的理想?多少次我們怕成為社會的異類而甘心成為羊群的一份子?多少次我們想挑戰社會定律而又怕成為小眾，所以寧願抱著夢想自慰而不付諸行動?
別人說你先等雙糧Bonus才辭工，浪費了多少不愉快的光陰?
別人說你應該讀一些「搵到食」的學位，放棄了多少大學時的快樂時光?
別人說創業很難，消磨了你多少雄心壯志?
別人說、別人說，多少次我們聽了別人說，而把自己想做的事情完全封殺?別人說的不需要負任何後果，而自己浪費掉的光陰卻不停虛耗你的生命。
別人說…難道「別人說」，真的重要過「我想」嗎?
你的意志，又有被「別人說」所消磨嗎?