讓我們再一次熱血，可以嗎?: Chapter 7
Johnny立時錯愕了一下，不懂怎樣反應，既然已經有了小朋友，大概也已結婚了吧，又怎好意思再打擾?
「Johnny呀，你趕唔趕時間，如果你唔趕，介唔介意等我帶埋個女番屋企再講?」陳綺雲問。
Johnny微笑地點點頭，有家庭，有兒女，大概她這些年來的生活已很好，我應該放下心頭大石了吧。
或許，當日你好離開，對你百利而無一害。或許，我只是你人生中的一個小過客…
Johnny體貼地在愛禮樓下截了一輛的士，打算送兩母女上車後離開。雖然我的夢想是跟你結婚，但我的目的，不是為了自己的益處，而是讓你受到如公主般的看待，看見今天的你，大概我的夢想…或者我一半的夢想已經實現了。
和你結婚，讓你成為最幸福的女人，讓我成為最幸福的男人。今日看見你成為最幸福的女人，便夠了…
「喂你做乜唔上車?我個衰女包已經好眼訓喇。」Natalie在這時叫著呆立在車傍邊的Johnny。
「會唔會唔係咁方便?」Johnny這樣問也不無道理，如果被綺雲的丈夫看見深夜時份有人送她的太太回家，想必大吃干醋吧。
「你而家再企喺度就真係唔方便喇。」
於是Johnny便跟她上了的士，原以為她在成家立室後，至少會住在私人屋苑或居屋，到最後的士卻停在屯門虹橋的單幢樓前。
「我而家喺上面住緊劏房，你等我十分鐘，我好快番落黎。」
等候的期間，Johnny不停猜想，是否他們仨遇到甚麼經濟困難?自己有甚麼可以幫忙?自己沒有買樓而儲的幾十萬，可否為他們仨解決燃眉之急?
「唔好意思。」綺雲的叫聲，喚醒了他，二人慢步到附近的公園，靜靜地交換對方的近況。
「真係唔好意思搞到你咁耐，我都好耐冇搵人傾偈喇。」綺雲首先開腔。
「唔緊要，等左你七日，終於等到你，OK既。係呢，你唔怕你先生…」
「佢?我同佢離左婚喇…」
兩人不語。
「OK喎唔使扮唔出聲喎。好多人都會估如果有個細路都仍然離婚，原因不外乎係衰爛賭衰女人衰吸毒是但一樣，不過我真係幾好彩，我前夫唔係是但一樣，而係三樣都中晒!」綺雲望著天慢慢的說…
「早幾年我啱啱生，仲係租緊大興花園住，我前夫仲係做緊萬二三蚊人工既文員仔，每個月都係緊緊夠交租開飯，佢諗住結左婚生埋個女想搵多少少，又見到啲人講話每個月回報有60%，咪走去買嗰啲乜鬼倫敦金囉，點知一兩個月就輸鬼晒。我諗住都算，叫佢收手唔好再賭，佢都唔知比鬼迷定點，借財仔比個女Agent再去買諗住番本，邊有咁易得世間財吖。
我有日忍唔住帶埋個B走去個Agent公司去理論，咁就見到佢地兩個喺員工休息室鬼混。原來佢已經一早辭左份工職諗住學埋一份炒金，個女人又比晒迷藥佢食，完全失去理智，我一個女人仔帶住個B仲可以點?點知佢番到黎屋企之後，仲同我講話做女人就係要忍，男人出去搵錢逢場作戲好平常，我聽到真係痴左線，而家係佢比人迷，點解仲要講到好似好正常不過咁?
都算，為左個B我忍，佢唔捨得番屋企日日去經紀行，我忍；佢偷偷地賣晒我結婚啲金器炒金，我都忍。但佢帶埋個女人番屋企上埋床，我仲可以點忍?」說到這裡，綺雲開始抽泣。
Johnny很想把肩膀借給綺雲，原本這十七年來，這個肩膀應該是屬於綺雲的，但他沒有為她盡過男人的本份，雖然名不正言不順，但Johnny此刻，有說不出的難受…
如果…十七年前…可以不惜一切把你追回來，你會受到這種痛苦嗎?
「雲，慢慢黎，唔緊要，從頭黎過。」Johnny輕輕把綺雲的頭放在自己的肩膀上，這刻他再沒有因為要下這個決定而猶疑，因為他知道，自己的猶疑已叫她過了很多年的苦日子…
如果猶疑影響的只是自己，還好…如果你的猶疑，影響到自己最疼愛的人的終身幸福，你還敢浪費時間思前想後嗎?
綺雲被Johnny這一舉動軟化，把頭埋在他的肩膀大哭，大概她已受了很多委屈，大概她已被迫堅強起來很久了。然而，被迫的堅強，只是裝出來給世界看的面具…人…總是軟弱…人總需要在適當的時間，適當地軟弱…
「咁之後呢?」Johnny很想知道綺雲的近況。
「之後我就同佢分左居，而好正常個衰佬都已經將啲錢輸晒，而嗰個女人知道呢口水井已經挖完，梗係離開埋佢啦。」
「咁唔通你冇諗過原諒佢?」
「點會冇?我唔係對佢有感情，而係唔想個女冇老豆，但有一樣野我真係接受唔到，就係佢輸晒所有野唔識醒，走去吸毒黎麻醉自己，我寧願我個女喺一個單親家庭長大，都唔想個女有一個癮君子老豆呀!所以我二話不說同佢離婚，唔比佢再接觸我個女。」
「明白…咁你…呢幾年點呀?」Johnny不忍再問，但終究忍不住自己的好奇心，問了這個問題。
「呢幾年我咪搵份文員工做囉，日頭番工夜晚就住劏房。本身我份工又好得夜，咪將阿女比我爸爸媽媽照顧住先，到星期五晚咪接番佢番黎同我住，我成個星期冇見過個女喇，真係掛心死我。」
「唔怪得我等足你七日先見到你啦，原來你一星期只係番一次友愛村。」
「係呀，咁你呢?你搵得我，即係未結婚啦。」綺雲就是一貫的冷雪聰明。
「係呀，我而家都仲係單身，做緊公務員。」
「你唔似咁冇鬥志做公務員架喎，喺我心目中應該係為事業摶殺得好西利既人」綺雲笑著說。
「哈哈!冇錯，而家既我真係一啲都唔似以前既我，記唔記得邊個石家洛?嗰個籃球隊隊長呀，認真起上黎對眼識噴火嗰個呢，佢都話我個人唔同晒，冇左以前嗰團火…」
「係…生活艱難，好難好似以前咁想做乜就做乜。」
「以前我都覺得係，而家我覺得唔係喇。」Johnny突然一本正經地說。
「點解呀?」
「係石家洛，搵番我嗰份熱血番黎。而你，令我搵到我既目標!」