讓我們再一次熱血，可以嗎?: Chapter 6
「未...」Johnny只是輕輕帶過一句，他以為一個簡單的回答不算甚麼，但女的聽起上來，卻覺得他吊兒郎當，根本是有心拖延時間享齊人之福，結果，Natalie一怒之下便離開Johnny的身邊，對他不瞅不睬，甚至...在不久之後接受男一個孩的追求，跟他一起拍拖了。
「其實嗰陣點解唔好好咁同佢解釋清楚呢?真係諗唔明。」Johnny把思緒從過往中抽離，問洛哥，但更似在問自己。
「你想知?」洛哥認真的問他。
「梗係想啦，諗極都唔明...」
「如果比你揀多次呢?」
「咁我一定會同佢講清講楚，我真係冇心拖佢!」
「好!你望下後面!」洛哥說完，Johnny便反射性地看後面，有一個身影在遠處走過來，她，正是陳綺雲!
一個足足等了七天的女人，終於出現…
一個足足等了十七年的女人，終於出現…
「喂!我好淆底喎，行到去都唔知講咩好，不如我地都係走啦。」面對著往日的戀人，Johnny有著說不清的尴尬，他很想再一次和陳綺雲聯繫上來，但又怕未可知的結局令他身陷險境。
「Johnny，其實你怕咩? 」這時洛哥突然一本正經對看著Johnny。
「我唔知道…」
「你唔知…我話你知。其實咁多年黎，你一直都怕，一直怕當要去做某啲決定既時候，你會做錯決定。例如你當日好想追番陳綺雲，但你冇做到，表面上你係唔想拆散人地，但呢個只係藉口，因為你知道用呢個藉口就可以佔據到道德高地，冇人可以反對你，其實你係怕再追佢唔成功嗰種失敗!
到你出到黎社會工作，你選擇既職業同你以前既性格一啲都唔似!以前既你喺中場喺籃底，從來只有人驚你永遠冇你驚人，因為當年你係屯門學界最進取最唔錫身既中鋒。但你出黎做野之後，你冇選擇一個可以表現到你進取性格既行業，只係選擇喺政府做一個無所事事既公務員，你寧願接受每日番工做住同一樣既野，睇同一樣既文件，講同一翻說話，都唔願意走出呢個社會，因為你怕比人炒，怕失敗!你以為自己行出去自己既安全區就必死無疑!
早幾日你講過幾年前你儲左筆錢，諗住用黎買樓，但到臨買嗰一刻因為驚樓價跌，你連五萬蚊細訂都比人殺埋，因為你怕做錯決定怕失敗!嗰陣係2010年，你而家睇下啲仆街樓有冇跌過?你原本想買既單位又升幾多?你呢幾年交租又交左幾多?
Johnny，三十三歲，究竟有幾多次我地因為怕做錯決定，所以唔去下決定?又有幾多次因為唔下決定而令到我地停滯不前?你把握到自己幾多人生?又有幾多人生係你自己想過?冇!因為你只信奉一樣野，就係你既人生唔容許出錯，但你有冇諗過，一個唔出錯既人生，係平淡到過多一秒都冇意義。如果你真係覺得你人生承受唔到任何風險而寧願一世都咁悶一世都冇驚喜，咁你，已經死撚左喇! 」洛哥一口氣說完，低下頭深深地吸了一口煙。
「我明你講乜，你而家喺度尻UP實好聽架，如果任何野摶輸左咁點?一定贏架?如果知道個結果係輸咁做黎做乜? 」Johnny開始動怒。
「係呀，做任何野都有機會失敗有機會輸架，但你唔可以將輸既機率無限放大再莫視成功既可能性，講就梗係好聽啦，講乍嘛，但只要你盡全力去做，就算唔成功咁又點?你過程中一定會令你有所得著，如果所有野做就成功，呢個世界就唔好玩架喇!
仲有，係有可能會面對失敗，但咁又點?會失去啲乜?如果你今日搵番喺後面行緊過黎既陳綺雲，佢話你痴線或者唔理你，你輸左乜?你乜都冇輸到，咁做乜唔摶?做乜唔做?唔好再比藉口自己啦。」洛哥說。
「你就當我面對唔到失敗啦! 」Johnny拗不過洛哥。
「我話你知，每個人都要面對一次失敗，就係我地同自己身體既比賽，終有一日，我地既意志會敵唔過生老病死，終會迎接死亡，一定架喎!咁你明知失敗明知一定會死你點解唔放棄自己死撚左佢?
人人都怕死，但係人人都唔珍惜生命爭取有限既時候做最多既野，如果你真係唔再搵佢，我地又浪費左七日架喇! 」
「我明…但…」
「Johnny…你唔明，但我明，其實有一件事令你變成咁。」
「咩事?」
「同屯官比賽最尾嗰一球，其實…真係唔係你既錯。」洛哥平靜地對著Johnny說。
原來當日對戰屯官的最後一球，是由Johnny操刀!而不幸地，射失了。
洛哥十七年來，沒有埋怨他，但同一時間，全隊人包括洛哥也沒有對他說關於射失這球的任何事情，因為大家都希望Johnny利用這一個契機，培養出Johnny的復仇心理，於中五時可以再戰屯官，殊不知卻成為他十七年來不敢為人生踏出新一步的障礙。
因為怕射失，所以連球也不射…
因為怕錯，所以連做也不做…
有試過這種經歷嗎?很想闖，但不敢闖；很想捉緊某些東西，但卻怕付出的收不到回報。為著這些情境，我們浪費了多少時間?錯過了多少應該要下決定的機會?
今天你可以無動於中，繼續覺得錯過了的東西無甚麼所謂，但到行將就木之際，你敢說，你、不、會、後、悔、嗎?
做了而後悔的機會較大，還是不做而後悔的機會較大?
Johnny聽到洛哥這樣說，好像突然解開了他的心結似的，不自覺的流下淚來。如果那一球可以射入，五人的人生便可以改寫，五人真的可以創造出傳奇，然而一直以來，他卻沒有將那次失誤變成復仇的動力，反而把這次失敗便成人生的污點，將自己應走的路毫不留情地封死。
我們又有多少次，因為失敗，而沒有再嘗試多次很想挑戰的東西?
那些失敗，如果沒有為你帶來日後的成功，便註定毫無意義，不要讓任何失敗，失去意義…失敗，也可以是一個褒義詞。
「Johnny，嗰球真係唔關你事，唔係你既錯! 」洛哥拍拍他的肩膀說。
「隊長…我好對你地唔住呀! 」Johnny邊哭邊說。
「我明白，如果比你有機會黎多次，你都係會幫我地，將嗰球射入去，係咪?」
Johnny不停的點頭。
「如果再有一次機會你都會揀射嗰球波，點解今次你選擇唔面對陳綺雲?勇敢啲，去爭取你想爭取既野。」洛哥說完，便站起來，準備離開。
他要離開這裡，讓Johnny獨自抉擇，是否要跨過這一步，重新奪回他一直都想擁有的東西。
Johnny的夢想:和陳綺雲結婚。
哭，再次再他帶到最感性的氛圍，讓他仍然記得，當日對陳綺雲做過的一切一切。當日讓她眼白白的走了，今天，要重新開始。
Johnny停住了哭，開始再次搜索陳綺雲的下落。這時她已進入了電梯大堂。他趕緊跑進去，在陳綺雲身後，默默地和她等待電梯。
被誤會也無所謂…
被罵變態也可以置之不理…
就算今日她對我不瞅不睬，也不後悔!
今天的我只想做一件事，我只想，知道你的近況。
你好嗎?陳綺雲…
「你呢幾年幾好嘛，Natalie。」電梯內只有他們二人，Johnny甫一進去便對她說。
「你係..」陳綺雲驚訝的轉頭看著這個哭得眼也腫了的男人。
看上去，陳綺雲好像消瘦了一點，少了一份心寧的平靜，多了一份憂鬱…
「我係Johnny呀，你幾好嘛? 」
「Johnny?點解你喺度既。」陳綺雲問。
「其實我係特登黎搵你架，呢十幾年冇見，我好想知你近況，好想知你生活係點，所以我特登黎搵你，仲等左七日添，希望唔會打擾到你生活啦。」Johnny終於股起勇氣，說出那句等了十七年的說話。
陳綺雲驚訝得說不出話來，舊情人十多年沒見面，突然出現在你面，還說為你等了七天，大概任誰也覺得瘋狂吧。
正當綺雲覺得十分驚訝，而Johnny也緊張得說不出話來的時候，終於到了綺雲要去的樓層，電梯門徐徐打開。
「媽媽!」甫開門，一個小孩便衝到綺雲的懷裡，滿足地攬著她。