讓我們再一次熱血，可以嗎?: Chapter 5
「痴線我咁勁點會死，但我知道有啲野倒數緊，你地完成晒你地既夢想之後，我就會坦白咁同你地講架喇。
大家記唔記得，我地當年輸左比屯官，話到明要覆佢地灼，點知我地第二年因為種種原因而冇歸隊，呢件事我相信大家都好後悔，如果可以時光倒流去十七年前，比多次你揀，你會唔會歸隊?我諗一定會，因為我地都唔相信自己實力差過屯官。
但時間冇得番轉頭，你睇下，斬下眼我地已經中年喇，好彩既做得人老豆架喇，我地呢三十三年黎，有好多野我地想做，而又冇做，如果要你而家去Conclude自己三十三年黎既人生，你會點去總結?銀行界Top Sales?電訊界從業員?穩定公務員?定係安份守己男Admin?
我地Conclude唔到，因為我地都冇比過Milestone自己，我地一直比藉口自己，屌你老味甚麼出年一定做，等我轉工一定會乜乜乜，等我升職儲到錢就點點點，Bullshit啦，冇一樣野係為我地自己而戰，冇一樣野到我地死嗰日可以比親友攞出黎講，我地已經淪為社會既一粒螺絲，冇左你個世界繼續轉，但如果冇埋夢想，我地連為自己生存既意義都冇埋呀...
如果有一件事做左會後悔，打死都唔好做，然而如果有一件事唔做會有遺憾，就一定要做...人只可以活一次，無謂要以為留低啲咩憾事吖。」洛哥說。
四人不語...因為洛哥的言論觀點，切中了他們的心坎。看似每日為自己的事業奮鬥，為未來打算，卻完全沒有一件事，甚至一分鐘，是為自己而戰鬥，自己想要甚麼，大概已經忘記了...
「點呀?同唔同我一齊，搵番你地嗰份熱血，再傻多次，做一次你地一直都想做而擺低左既野?」洛哥再一次認真問。
「唉...見係你，阿隊長，真係怕撚左你，人到中年先話去追夢，真係柒到爆，好啦，做啦!殺佢老味一個片甲不留喇!」阿偉若有所思的看著天空說。
「死就死啦，追女仔啫，老子甚麼女也不怕。」Johnny也踏出他的一步。
「你老闆我對住啲客秒秒鐘幾十萬上落走黎同你賣奶茶菠蘿包...不過算啦，當我比你Convince到，起碼我借Loan啲息都平啲。」阿強一面不在乎的說。
「唉，你地個個都應承我冇理由唔跟啦! 」雄仔也同意了。
他們五人，終於再一次，踏出那一步，停了十七年的一步...向著理想進發的一步...
洛哥立即拿出電話，在Whatsapp裡改了Group名---讓我們再一次熱血，可以嗎?
經過商議，四人決定由洛哥帶領，先後把四人的夢想實現，次序由抽籤決定:
第一是Johnny夢想:和陳綺雲結婚
第二是雄仔:開設一間遊戲開發公司
第三是阿偉:把音樂作品帶到台灣發佈
最後是阿強:開一間聘請釋囚的茶餐廳
xxxxxxxxxxxxxxxxxxxxxxxxxxxxx
「喂，其實諗住點樣搵番陳綺雲?都咁多年冇見，冇晒佢Contact喇。」Johnny有日相約洛哥於Starbucks，相討作戰計劃。
「其實我又真係冇乜辦法，你知啦，當年佢又咁摺，同其他同學仔又唔熟，我都幫你問過其他舊生，真係冇同佢聯絡好多年喇。」洛哥說。
「咁好難搞喎，仲有呀，同你講呀，我今次係想見番佢了左我一個未完既心願架乍。如果佢而家變到好似港女咁，真係未必會追佢架。」
「得啦，長氣，起碼你見番佢，同佢Say個Hi，都無憾吖。喂不如咁啦，你記唔記得佢住邊呀，我地去步佢啦。」
「嘩大佬玩到咁大?你唔比人地搬左去第二區架?我淨係知佢以前住友愛村愛禮樓乍。」
「咁呀，我地一邊等佢，一邊再諗辦法搵佢Contact啦。」
「喂你傻撚左呀?你估黑社會咩喺人地屋企樓下等人，仲有呀，如果真係撞到佢咁又點呀?當我地屋村痴漢乍，咪玩啦。」
「咁如果唔咁做你仲有乜野其他方法呀大哥?冇晒Contact要喺七百萬人既城市搵一個人呀，你教下我喇。你等就仲有一線生機，唔等就呢世都見佢唔到，仲有喎，我會繼續幫你去收風，睇下搵唔搵到佢而家近況，雙線發展啦兄弟。」
「真係怕左你，而家似係你追女仔多過我追女仔，人到中年先做痴漢真係頂你唔順。」
「咁痴漢好多都係中年男人黎架啦!」
「拿，怕左你，總之等一個禮拜，等唔到就再諗辦法。」
「OK冇問題。」
有試過等待一個你忘不了的人嗎?等待讓我們了解到時間可以流逝得如此緩慢，等待可以在過程中，讓我們再次靜思兩人的關係，等待，是人際關係的沉澱。
別以為等待是一種消極的做法，如果只有兩個選擇，要麼等待要麼放棄，那麼等待看起來大概更加積極.,.
「如果呢個星期都見佢唔到，我就殺Q左你。」就在會面的第二晚，他們二人便來到友愛村愛禮樓下等待著陳綺雲，一個Johnny永遠忘不掉的人。洛哥有一種毀譽參半的特質，他的行動力很強，強得想做一件事便要立即去做，有人把這種性格解讀為衝動，又有人解讀為有幹勁。因為洛哥知道，人一生只可以活一次，如果想到一個計劃，而沒有立即實行，他便會覺得是浪費時間，甚至...浪費生命。
如是者，兩人在友愛村愛禮樓下，足足等了六日，早上是只洛哥負責等待，待Johnny放工後便會加入行列，直至晚上十二時才離開。其間兩人訴說著闊別以來的種種，六整晚，其間沒有冷場沒有Dead Air，只有兩人的笑聲，以及互相對大家經歷的嗟嘆。
當然，洛哥也沒有閒著，不停在Facebook拜託舊生找尋陳綺雲的資料。
第七晚...
「頂你個肺最後一晚喇，十二時前再唔出現我真係打鑊你呀。」Johnny邊抽著煙邊看錶，已經是晚上十時了，Johnny比洛哥更焦急，不是因為想早點到Deadline，而是...他不想能最後的希望也變成失望。
Johnny很少抽煙，但連續七日的消磨已叫他心力交瘁，唯有用煙草來提振精神。有時Johnny一邊抽煙一邊回想起十多年前，和陳綺雲的一段情，一段未開始的情...
Johnny當時有一個外校女朋友，但由於性格不合，已面臨分手的邊緣，直至有一天，中五班上來了一個插班女生，陳綺雲---Natalie，Johnny便被她吸引過來。
Natalie沉默寡言，但善解人意，雖然她和大部份的同學也不算熟絡，但卻特別和Johnny友好，時常一起上下課，一起溫習，一起吃飯，做著一些年少荳芽夢應該發生的事情...
Johnny絕不拖泥帶水，他知道自己已經對女朋友沒有感覺了，但由於正值準備會考的時間，分手只會讓女友做成極大的創傷，隨時會考成績也不能保住...
「你會唔會同你女友分手?」Natalie有日問Johnny。
「梗係會啦。」Johnny說，他沒有告訴Natalie他的Hidden Agenda---會考後的分手宣言，因為他覺得這是無關痛癢的資訊，所以只給予她一個簡單而認真的承諾。
發乎情，止乎禮，兩人互生情愫，但絕對沒有做出逾越理性的事情，直至有一天，會考前的一星期...
「你其實同你女友分左手未?」Natalie由於巨大的考試壓力，很想有一個人名正言順的在她身邊支持她，因此終於按捺不住，問了Johnny這個問題。
一個影響著兩人一生的問題...