讓我們再一次熱血，可以嗎?: Chapter 4
「嘿!」跳波時間到了，洛哥出乎意料地跳起，時機可說是拿得分秒不差，縱然遇上對方的中鋒，也沒有半分退讓，結果因為完美的Timing，控球權落在譚中老鬼手上。
「比我!」洛哥對著控球後衛阿偉說，阿偉便立即將球交到隊長手上，是一記兩分球。
「呢度!」
「阿強，剷籃!」
「回防!唔好比佢地入籃底。」
「Johnny，搶位!」
「雄仔，三分!」
洛哥再次打出當年那不要命的打法，一有機會便制造入球機會，不理對手的身型，不理防守是如何嚴密，以全攻型的姿態殺入得分區。為求得分，甚至做出一些看似危險的動作，外人看來完全不像是三十三歲的業餘籃球員會做的動作。
此外，他再次發揮指揮若定的本領，其餘四子由原本只是鬧著玩的心態，慢慢開始配合洛哥的節奏，任何洛哥安排他們不同的位置，不同的方針。再慢慢地，他們眼中再次流露出那份要推倒一切的殺氣…
…彷彿….回到…十七年前…那一段…義無反顧的時光…
「喂，呢班老鬼同上次打嗰場唔同晒既?」
「痴孖筋架，索晒氣都咬住我地唔放。」
「喂我地唔好比佢地大到，慢慢打，回一回氣。」
現任校隊被老鬼嚇怕了!原本已十分疲累的老鬼，仍然採取緊迫盯人的戰略，校隊以為放慢打可以回氣，但卻不知道這只是給老鬼休息的機會。你累…我更累…但除了體力，我們還有無限的鬥志!
當校隊知道放慢打只會讓老鬼佔便宜，便決定以速度取回主導權，我們當打，體力是我們的最大武器。
雙方也以全攻型的姿態對戰，你來一球，我反攻一球，我累，也不會讓你好過!
因為…他們五人開始記起那句說話，十七年前對戰屯官的說話…
「很累…很累…但累只會激發起我們戰勝疲累的決心!」
「Johnny，呢度!」洛哥大叫一聲，Johnny立即傳球給在三分區的隊長。
仍然落後兩分…
…要有一記三分球…
洛哥輕輕將球射出…
「呢球，用黎喚醒你班仆街…」
「啾!」籃球應聲進了籃框，最後老鬼以一分之差，贏了現任校隊!
XXXXXXXXXXXXXXXXXXXXXXXXXXXXXX
「師兄，你地嗰日係讓賽架? 」比賽後，校隊的隊長問道。
「哈哈!唔係，而係，當有啲野如果唔做，你會有所遺憾既時候，就會不顧一切咁去做。覆你地灼，係我好想做既事…」洛哥輕輕的說。
「好!我地都會加緊練習…希望有機會可以再贏番你地…」
「好呀，拭目以待。」
Xxxxxxxxxxxxxxxxxxxxxx
「估唔到我地都寶刀未老…」校隊離開後，五人躺在球場上，阿偉輕輕的說。
「記唔記得當年，我地就係要做一啲，連我地自己都唔相信既事。」洛哥說。
「記得…當日好多老師學生都唔睇好我地，甚至笑尻我地，但我地乜都唔理，淨係向前衝，真係好響往當日既成績…」雄仔說。
「其實洛哥，你做咁多野，係咪想話比我地知，冇野係冇可能，唔好Set個Limit比自己。」阿強問。
「冇錯，你覺得自己唔可以達成到既夢想，根本就係自己比自己既藉口，究竟係藉口重要啲定夢想重要啲，大家都好清楚大家都好明白。好似今日咁，你以為自己打唔贏班中學雞，最後結果呢?我地咪又係成功左。點解，未試就話自己唔得?」
「生活唔同打波呀隊長大人，唔到我地話事架。」Johnny說。
「咁各位…我地既生命，又係咪我地可以話事?你就算無辦法去控制自己朝九晚六做啲乜，但放工後，又或者週末，我地又浪費左自己幾多生命?花費喺上網、電視機、同無聊朋友Social既時間，佔據左我地幾多生命?但有冇諗過其實你可以用呢啲時間做好多你一直好想做既野，你地究竟，明唔明?」
這時阿強一躍而起。
「洛哥，而家係究竟你明唔撚明呀!大家三十幾歲喇!玩唔起架喇，我年薪過百萬淨係出Bonus都夠我供成年樓呀!我仲同你玩啲咁既遊戲，你係咪Kai撚左呀!老架喇，冇架喇!有啲野過左去番唔到轉頭架喇，你要做乜野我都支持你，但你唔好叫我做埋呢啲後生仔先做既野啦!」
「咁你究竟仲想唔想搞嗰間茶餐廳?」這時洛哥也一躍而起。
「我係好想呀!自從睇番紀念冊之後我每一日都有諗番，但點呀?冇機會做…」不等阿強說完，洛哥突然一拳打在阿強身上。
「屌你老母!你死撚左架喇!」洛哥出拳時激動地說。對，阿強大概已經死了，當他連自己的夢想也不再捍衛的時候…
「我冇呀!我做唔到架，中年喇我地。」阿強這時也回擊。
「你做到架，屌你!你唔撚做!你死撚左架喇。」
「我冇呀!屌你老母!」
「有呀!你、死、撚、左、喇!」
面對者二人的扭打，三子只是從旁觀察，沒有勸交，亦沒有幫任何一位…
因為這場境…十分熟悉…
當年，每當五子意見不合，他們便會扭打作一堆，往往洛哥會成為捱打的對象，因為他知道四人在訓練時面對住異乎常人的壓力，因此只會默默地承受一切，成為他們舒壓的對象。但當他們四人在訓練時給自己藉口想放棄時，他便會大打出手，用拳頭告訴他們，放棄，從來不是一個選擇，放棄，等如投降!
越打越痛，越打越心寒…原本只是汗水配合著拳頭揮動的聲音而掉在地上。慢慢地，混合著淚水揮洒在地。
拳頭，把理性驅走，淚水，把青春帶回來…回到那沒有任何現實考慮的心境，那個我們曾經熱血過的心境…
你…熱血過嗎?記得…那份感覺嗎?仍然記得，那些腎上腺素帶來的刺激嗎?
「你死撚左喇。」洛哥重覆這句說話，閉著眼淌著淚，拳頭無章法地擊出。
「唔係呀，我唔想架…屌你我唔想架。」阿強也忍不住淚水，揮拳迎擊洛哥。
「哇唔好打喇!」阿偉似是被這怪異的氛圍影響，終於忍不住大喊，抱著兩人，制止著二人滑稽而感性的行為。
其餘二人，也衝上前來，扭著大家哭泣…
…五個大男人…五個充滿汗臭的身軀，擁在一起…一起哭…面對著無情的社會，早上戴上一副外表堅強的面具。回到家中，因為不想親人擔心，便換了另一副”一切安好”的面具。面對住多年的壓抑，他們大概已很久沒有如此嚎哭了吧!足足整整哭了一個小時。
「我明呀，我明我冇做到，我好撚後悔呀。」
「對唔住呀…嗚…我浪費左好多時間。」
「屌你點解我咁撚蠢浪費時間。」
「我先最蠢呀年薪過百萬同你班仆街喺度喊…嗚…」
哭，把我們帶回最純粹的感性思維，再沒有庸俗的枷鎖；哭，因為我們知道，那份後悔那份不甘心一直都在心底，只要開啟那道心門，所有感覺便如同電影般一幕一幕地逞現眼前...哭...讓我們...從新活過來。
嬰兒有氣息，所以哭...五個大男人回憶起生命的價值，所以哭...
「其實點解你要咁做?」大哭大鬧過後，五子再次躺在球場上，阿強問。
「呢個係我而家既夢想，我時間有限，好想幫你地成就一啲野番黎。」洛哥說。
「你唔好話比我聽你有世紀絕症得番三個月命呀?」Johnny說。