[真人真事][校園][純愛]《婚宴上的重遇》: 第八十二章

由若凝離開香港,
到我後來入左大學,
甚至乎去到依家出嚟做野
講緊嘅其實係五年幾六年嘅事,
喺咁多年入面,
我係一次都冇搵過若凝
面書都冇聯絡
因為真係唔識點開口
同埋始終唔知佢嘅感覺係點,
可能唔想騷擾到佢啦




更多嘅係,
係我冇呢個膽量
仲係同讀緊中學嗰陣一樣,
都係咁冇膽
完全冇進步過,
有幾年去到佢生日,
前一晚臨瞓前我都諗,
不如聽日大大方方喺佢嗰wall嗰度講生日快樂啦
但係一到聽朝就冇左件事
唔知點解會好淆底




所以就冇左件事
至於心態上就有少少唔同,
以前一講起若凝,
個心不其然會有少少乸住乸住,
同埋會好緊張同敏感
之後愈嚟愈大個,
就開始有釋懷嘅感覺
同以前有啲唔同,
最多都係嘆一口氣,
跟住就過左




可能已經乸到麻木晒,
唔會再有特別感覺
人愈大,
睇嘅野真係愈嚟愈化啦
有時我都唔係祈求乜野,
只係想喺條街上面見返佢
係咪陌路人已經唔重要,
甚至乎拖住第二個男仔都唔係重點
我依家已經好清楚自己,
唔會好似以前咁貪心
想佢做我女朋友,
做唔做到都冇所謂,
唔知佢近幾年變成點呢
佢已經少左喺面書上面擺相
所以每次我行街,




我都一定好專心咁樣望住路人
睇下會唔會有一日可以撞返佢,
可以嘅話,
梗係好想好似啲電視劇咁樣
一齊去cafe嗰度飲野
如果唔得都冇問題,
只要可以見返就得,
見到佢一切安好,
就心滿意足
或者嗰陣我個人已經冇乜衝擊,
我好想搵返當初帶俾我好大衝擊嘅嗰個人,
有時行返屋企嗰陣,
我都會特登兜返去,
佢以前住嘅嗰條街
睇下會唔會好彩見到佢,




咁又唔係特登行嗰度嘅
只係順路先經嗰邊啫,
當然啦,
我係一次都唔成功
當然成日食嘅車仔麵,
早幾年已經執左,
我同佢之間嘅回憶,
又少一樣
有較大機會會見到佢嘅地方,
亦都少左一個,
係咪真係以後都唔會見
我愈嚟愈受動搖,
可能真係,
明明一早已經冇希望,
但自己一次又一次嘅期待,




最後得返失望,
有時真係冇希望好過有希望.

喺我身邊關於若凝嘅野已經唔多
只係得返個守護符同埋波砵,
個守護符仍然扣喺我銀包嗰度
之前我換銀包,
都特登揀返一個可以扣到個守護符嘅
至於對波砵,
到今時今日都仲係未換過
T90已經絕左版,
依家行出街踢波都冇乜人著咁滯,
有時有啲朋友問我,
點解你對鞋咁舊都仲唔換
我都淨係話冇錢就算




我解釋唔到點解要咁樣做
可能已經習慣左啦
冇左佢地硬係覺得唔自然,
又或者,
其實係我唔想接受若凝同我已經冇關,
所以打死都要留住呢兩樣野
一冇左就唔會再有,
冇第三樣野嘅存在,
一定要好珍惜,
波砵個鞋底,
以前有若凝寫嘅兩個字,
「傻仔」,
一早已經俾歲月磨滅左,
變左一個好殘舊嘅鞋底,
根本就睇唔到有字
但都仲係唔捨得扔走,
太過留戀唔係一件好事.