[真人真事][校園][純愛]《婚宴上的重遇》: 第七十七章

跟住就到我正日生日,
當然都係好平淡咁樣過啦
你知啦,
毒男生日係咁架啦
邊度有可能會多姿多采
嗰日又要返學,
放左學未成班frd去打機,
當係輕鬆一日啦
成日溫書真係頭都癲,
返到去屋企,




沖完涼吹緊頭嗰陣喺度諗,
乜原來咁快就一年,
今年講緊已經係十九歲,
上年十八歲生日,
好似唔係好耐嘅事
情境仍然歷歷在目,
我再望一望放喺我間房嘅波砵,
我上年嘅生日禮物,
唔知負責買佢嘅人,
今年會唔會好似上年咁




其實我自己知架,
不過總係改唔到自己嗰啲愛幻想嘅性格
真係犯賤
都唔知期待啲乜,
一早唔應該有,
我好似上年咁樣,
都係等到零時零分,
自己同完自己講生日快樂先瞓覺,
順便開面書,
睇下有冇人會特登inbox我,




當然機會高唔高大家都知啦
其他人心諗,
呢條蛋散生日關我叉事
咁我都係搏懵心態啫,
去到零時零分,
過程相當平淡,
冇人再好似上年咁樣,
有人打俾我,
幻想果然係幻想
唔會成真,
瞓啦,
唔好諗咁多.

之後嘅事冇乜特別
距離a-level就愈嚟愈近,




好快就去到last day,
跟住我地就study leave,
然之後就a-level
終於殺到埋身
last day嗰日,
好多人都帶左相機嚟影相,
我係少數冇帶嗰個
其實我本身就唔鍾意影相
咁當然啦,
上堂又好小息都好,
基本上老師都批准左
今日係影相,
反正都最後一日,
咁咪盡情玩啦,
嗰日,




我地個層好熱鬧,
全部人都係揸住個相機周圍影
可能佢地都明白到,
呢班人,
以後唔會再有機會好似今日咁,
聚埋一齊
考完試就會各散東西,
分分鐘真係畢左業後就唔會再見,
所以就盡量機會影相記念下,
我見到若凝都有帶相機
亦都好多人搵佢影相,
正常丫,
靚女待遇係唔同啲
其實有幾次,
我都諗緊,




好唔好行過去,
不過諗諗下,
自己真係冇勇氣行過去
佢亦都冇行過嚟
咁就不如算
唔好再有無謂嘅留戀喇
就等時間沖淡一切啦,
唔影咪唔影囉,
嗰陣我係咁同自己講
況且遲啲仲有grad din,
到時先算啦
跟住終於響起放學鐘聲,
今次係最後一次聽,
以後唔會再有機會聽呢個放學鐘聲,
我喺度諗,




不知不覺間,
我都喺呢間學校七年,
估唔到自己最後嗰日,
都會有唔捨得嘅感覺
呢七年好似過得好快,
我仲好記得當年啱啱入嚟嗰陣,
都唔知邊度打邊度
真係懵下懵下咁樣,
原來咁就懵左七年
好開心入到嚟呢間中學,
識左咁多好朋友,
雖然呢班朋友平時好賤格
不過都真係冇後悔識到佢地
當然仲有喺度遇到一個我好鍾意嘅女仔啦,
雖然結局唔如意,
但係問心講,
我完全冇後悔過識左佢
特別係我呢啲毒男嚟講,
有咁嘅生活體驗已經好好
真係多得若凝,
呢啲真係中學回憶嚟,
日後會好懷念,
一切都只係因為佢係若凝,
事實上,
依家嘅我正如開頭所講,
中學生活真係最好
多謝一眾出現喺我中學生活入面嘅人,
遺憾就一定有,
但係仍然有令人振奮嘅地方
我諗日後諗返起都會會心微笑
我地嗰日放左學成班喺度玩,
玩到五六點先走,
最後仲影埋大合照,
呢張係全日唯一一張有我同若凝嘅相,
僅僅一張,
對我嚟講,
就係因為咁先至係珍貴,
跟住就踏出校門,
最後一次喺上學日著住校服喺學校走,
正式踏入人生嘅新一頁.