[真人真事][校園][純愛]《婚宴上的重遇》: 第七十八章

之後我就準備a-level啦
老實講過程冇乜特別
我都唔特別多描述喇,
係有時無聊嗰陣就會諗,
唔知若凝溫成點呢,
係咪仲喺嗰個圖書館溫緊
好唔好喺面書搵佢呢
不過再冷靜咁樣諗,
都係唔好搞咁多野
自己專心溫書算,




理咁多無謂野做乜
唔係話左要放低佢咩
佢去邊度溫,
進度如何,
全部都唔關我事啦
都係唔好阻住人,
亦都唔好阻住自己,
好快我就考a-level,
原來呢啲只係一剎那嘅事
準備左咁耐,




以為自己入到考場會好緊張
但係原來唔係,
其實件事就唔隆重
講緊只係幾個鐘嘅事
考完就走,
之後就溫第二科
去到五月終於考晒所有野,
今次正呀
希望考得好啦,
嗰陣好天真咁樣以為,




以後唔使考試,
發達
但係原來,
畢左業先至係真正嘅考試,
呢種考試對比讀書嗰陣嘅考試,
真係難好多
起碼冇得溫先,
我估唔到我有一日竟然會鍾意以前嗰種考試
細細個逃避,
但係大個反而會鍾意返,
證明所有野,
都係會隨著年紀而有唔同嘅睇法,
我依家終於明,
其實唔止考試,
好多野都係.





之後六月頭就grad din
大家做過中學生都知,
grad din擺明就係去睇女
個個女仔都會著到鬼火咁靚
今次真係有福
放榜嗰日,
個個人心情都係好忐忑架啦
正正係因為咁,
所以grad din就係俾咁多個同學互相見下面,
當係最後一次,
開開心心咁樣坐埋一齊
放榜嗰日應該唔會有呢個心情
當日梗係有人歡喜有人愁啦,
仲點會好似今日咁樣




成班人樂也悠悠,
臨grad din前嗰晚,
我瞓喺張床度諗,
原來我都有成四個月冇見過若凝
係自從認識佢以嚟,
最耐冇見嘅一次,
我嗰陣仲自己呃緊自己,
完全唔掛住佢
依家就梗係知咩事啦
不過嗰陣仲喺度自欺欺人丫嘛,
其實打從心底就好想見到佢,
當然,
我亦都明白到,
以後仲會有好多好多個四個月見唔到,
依家咪當俾自己適應下




遲下就會慣架啦,
唔知佢聽日會點樣打扮呢
可以嘅話真係好想影一張相,
作為日後留念
grad din係攞正牌影相嘅一日
去到grad din,
咁我就同成班契弟一齊去啦,
亦即係呀成佢地
嗰日真係有史以來,
執得最正嘅一次
冇幾可會咁呀
去到之後先至發現,
原來我地係自由坐位
咁我就梗係同自己班frd一齊坐,
我好記得嗰陣我係咁望住個入口,




睇下自己想見到嘅人嚟未
同時間又唔可以咁高調
因為驚俾人知
睇嚟我都仲係冇進步過
等左一陣,
終於見到若凝
喺入口嗰個人群入面,
一望就望到佢
我都唔知點解反應咁快
佢今日著露肩白色裙,
唔係講笑真係好靚
仲係同以前一樣,
化一個淡妝
自自然然會成為焦點啦,
點計都係全級最靚頭幾個
佢坐嗰枱同我坐嗰枱唔多近,
但我都仲係可以望到佢
笑容依然咁有親切感,
但係其實我知道,
我同佢只會愈嚟愈陌生
之後我地成班就周圍去影相啦,
終於去到佢嗰台,
我嗰陣都係冇望住佢,
扮晒唔覺意咁樣,
我係搵第二個影先嘅,
跟住先扮唔小心見到佢
順便搵佢影相,
我:「原來係你
不如影張相啦 」
若凝:「好呀 」
之後我地就拍住咁樣影,
膊頭都唔敢掂,
大家中間有一個無形之牆隔著咁樣
笑容完全唔真摯,
好生硬,
對比返起我喺面書見到佢同佢前男朋友影嗰張相,
簡直係天淵之別
果然我都係拍馬都追唔上佢前男朋友,
影完之後,
若凝:「今日好型仔喎 」
我:「你都好靚 」
若凝:「多謝 」
跟住我就走左,
繼續搵第二個影相,
但係其實若凝可能唔知,
我帶部相機,
唯一一個用途就係同佢影相,
其他人唔係重點,
可以嘅話,
我梗係想喺佢身邊
不過當然唔得啦,
所以我先至扮晒野去搵第二個影相,
對住若凝真係做唔到坦率.