[真人真事][校園][純愛]《婚宴上的重遇》: 第五十七章

第二朝返到去
今日出奇地唔使早會
所以一返到去就上左班房
冇幾耐若凝就返到嚟,
平時佢會同我講早晨,
之後就會講一堆好無聊嘅野
跟住我就會答返佢,
係咁喺度傾計
但係呢個情況今日冇出現
佢一返到嚟,




擺低個書包之後就坐喺度
乜都冇講,
咁我就知佢仲未嬲完
既然未嬲完就唔好煩住佢啦
我自己嬲嗰陣都唔鍾意人地煩住我
唉,
早知今日何必當初呢
如果我知個後果係咁樣,
我一定唔會講大話
呢個教訓實在太大喇




大到我完全接受唔到,
原本我諗住趁小息小人嗰陣同佢講對唔住
點知一到小息佢就出左去,
去到食飯嗰陣佢又係咁樣,
好似好唔願意坐喺我隔離咁
又去拿拿臨搵佢啲朋友出去食飯
今日應該係第一個上課日,
我同佢完全冇講野
雖然大家坐喺隔離,
但真係可以冇交流,




佢有佢聽書,
我有我扮聽書
其實真係好唔自然
嗰個感覺好差,
同埋唔知大家記唔記得,
今日係放新年假之前嘅最後一日,
如果今日佢未原諒返我,
咁樣放新年假佢就一定唔會同我出嚟
仲有可能會越嚟越疏遠添,
我點可以俾呢件事發生呢
不過又唔知點做喎,
個心就好急,
但就完全唔知有乜野入手方法
搞到成個人都好鬱躁,
最慘係又要極力控制情緒嗰下先至麻煩.





去到放學我地踢決賽之前
我地都仲係一句野冇講
估唔到只係短短一日,
就已經有咁大改
其實我有幾次都真係想開口,
但見到佢木口木面個樣
嗰啲說話就已經收返埋落個心口度
之後我地踢嗰班人就落去換衫先
其他人就喺操場嗰度等緊,
一嚟係放假前最後一日,
個個都想留低喺度睇埋先走
反正唔趕時間,
同埋班主任之前講過,
想將我地踢決賽呢件事用照片去保存




因為好難得,
咁樣講好似係串緊我地
我冇記錯有三四個帶左相機返嚟,
若凝係其中一個
如果係平時,
我一定會叫佢俾部相機我望下
等我睇下咩嚟,
同埋影多啲我嘅英姿
你知啦,
我冇幾可可以咁威水
成為其中一個受注目人物
不過依家梗係唔敢同佢講啦
佢都仲未嬲完,
會唔會影我都未知啦





嚟到決賽,
就係咁易講下少少踢波嘅場面啦
正如我之前所講,
計埋龍門五打五,
其實踢落去
我自己覺得我地隊同對面隊原來唔係差好遠
甚至有少少上風,
而去到一啲無聊時間,
我都會不其然望下場邊嘅若凝
咩叫無聊時間
即係等緊開角球,開界外球嗰啲時間囉
我發現佢都好肉緊咁樣睇緊場比賽,
頭先都講啦,
我地有少少上風,
咁自然有攻勢啦




我記得有一球,
對面因為有角球,
而幾乎全部人都上晒嚟
淨係龍門同埋一個後衛冇上嚟,
跟住我地防守角球成功,
就打一個快速反擊,
我地隊龍門將個波俾左我
咁我就帶住先啦,
跟住我發現我有個隊友走左去一個冇人看管嘅位置
咁呢啲時候我就梗係唔貪功
順勢將個波俾左佢,
當時佢接應嘅位置大約喺娥眉月頂左右,
之後佢推左一步,
唔知係咪太緊張
佢將個波射出界
老實講嗰下真係有少少忟憎
但又唔可以鬧隊友喎
因為我自己個價值觀係唔鬧隊友
我成日覺得,
喺球場上鬧真係冇乜作用
又唔會因為你鬧完就即刻入波
同埋問心講句,
自己係咪真係完全冇失誤呢
但嗰下的確有少少忟憎
跟住就到對面打反擊,
好好彩咁樣畀佢地符碌撞棍入左波
咁樣對成場波梗係有影響啦
淨係士氣都低落埋,
由原本有希望入波先,
去到依家反而比對面入左波
點會冇影響
時間又唔係淨返好多,
但最大問題就係唔可以喺場上頹廢
因為真係最後一年,
中學生涯最後一場比賽,
過埋今次之後就真係冇,
點可以頹廢落去
之後我地繼續搶攻,
踢踢下其實應該過左法定時間
不過可能我地仲有攻勢
所以就想等埋嗰攻勢完左
先至結束比賽,
我地喺度搓左好耐
都係攻唔入
咁啱有個角球,
跟住我地個隊長就行埋嚟同我地講再搓落去唔係辦法,
一陣如果有位就射啦
冇人會埋怨你獨食
隊長嘅說話我地點敢唔聽
所以梗係即刻話收到啦,
跟住係點樣
下回再分解.