[真人真事][校園][純愛]《婚宴上的重遇》: 第五十八章

咁樣我地個隊友就開左個角球
斬埋嚟諗住頂入去
點知俾對面頂返出嚟
好彩有另一個隊友拎到個波,
如果唔係就九成九完左
咁佢就諗住射
但係前面有好多人
所以佢就將個波俾左隊長
隊長諗都唔諗就射埋去
點知又俾人擋左




啱啱遇著剛剛,
個波就落左喺我度
我嗰陣喺禁區出少少,
絕對係射程範圍
跟住聽到有人叫我射啦
我就二話不說射埋去,
好好彩,
呢一球我食得應
又冇飛機
真係好難得,




你知啦正常一緊張嗰陣,
總係會失準架嘛
咁啱今次就冇,
亦都好好彩,
呢球波冇被中間嘅球員擋到
直接飛去龍門,
雖然唔講得上係死角
但總算係有角度
喺嗰陣,
我淨係望住龍門位,




我見到對面隊嘅龍門,
已經企定定喺度
冇作出任何反應
而且又個波飛去龍門,
我嗰陣覺得好有機會入
正當我準備慶祝之際,
我聽到”pung”一聲
個波原來中眉頂,
飛左出界,
呢個時候,
完場嘅哨子聲無情咁樣響起
對我嚟講呢個聲音配合真係好唔和諧,
完全唔夾.

平時射咁多波,




中過咁多次門眉
咁多次都係入嘅多過唔入
但偏偏就係喺一場咁重要嘅賽事入面,
先走嚟唔入
原本我以為好好彩啦
冇被中間嘅球員擋到,
龍門又冇反應
上天俾左個希望我
同時間唔夠兩秒之後就收返,
嗰陣係我第一次知道咩叫天意弄人
咁我地成班就梗係唔多開心啦,
完全冇聲
唔好話喺場上嗰五個,
其他人都係好安靜
嗰陣我已經冇望到若凝




可能已經冇乜心情望
咁之後就老師出嚟打圓場,
都係講埋啲例牌說話
即係嗰啲踢得好好之類嘅說話
咁我都明白佢嘅用意
之後成班就散場,
有啲就返左去換衫,
至於我就繼續坐喺操場,
反正更衣室多人,
唔想入去逼
反正唔趕時間
所以就想自己一個靜下,
我自己喺度諗,
如果嗰陣,
我唔射咁大力嘅話,




會唔會已經成功追平
去到十二碼階段,
其實咁樣係唔合理大家都知啦
不過人喺負面情緒下,
諗嘅野自然會跳脫啲
我又諗緊,
如果我嗰陣自己帶個波帶耐啲,
去到龍門口先至橫傳,
反正冇人mark我個隊友,
咁樣應該係最大機會入波
當然依家我都知
我咁樣處理係冇問題,
但係人就係咁,
每次失敗之後就會覺得,
自己冇用嗰個方法先至係最好




時間從來都係好殘酷,
永遠都唔會返轉頭,
中學生涯最後一場比賽,
真係完左喇,
最後一個拎金牌希望,
就咁樣冇左
最緊要嘅係,
我之前曾經應承過若凝,
我話我一定可以拎冠軍
雖然我知道其實佢嗰陣都係講笑
不過有邊個會唔想對住自己鍾意嘅女仔
兌現承諾架?
因為當你真係兌現到嘅時候,
嗰一刻真係好有英雄感
知唔知道喺自己鍾意嘅女仔面前,
其實係好難拎到英雄感
因為平時嘅話,
你一定會覺得自己做得唔夠好
佢唔會認同你,
係只有兌現到承諾嗰陣,
你先至會感受到有幾開心
就係因為難得,
所以先至罕有
不過今天我做唔到,
連啲咁簡單嘅承諾
都係做唔到,
最慘嘅係,
我真係已經盡晒力
你話如果冇盡力的話,
仲可以大聲講我仲未出力
但依家真係講唔出口
我真係好俾心機咁樣踢波,
但都仲係做唔到,
嗰一刻我望住個天,
老實講真係有少少眼濕濕,
當然我係極力忍住啲眼淚
本身我唔係一啲鍾意喺人哋面前示弱嘅人,
即係所謂嘅大男人
不過嗰一刻真係就嚟忍唔住,
正當我喺度發呆咁樣望住個天嗰陣,
突然之間有把聲出現左
若凝:「做咩呀 」
若凝終於同我講返野
但係我嗰陣冇心機去理會佢同我講返野呢件事,
淨係識同佢普通咁樣對答
我:「自己想坐喺度靜下.」
之後佢坐左落嚟,
若凝:「你呢個人
平時成日都嘻皮笑臉,
做乜都唔認真咁樣,
但係頭先終於見到你認真嗰面 」
我:「認真有咩用
最後都係輸左.」
若凝:「雖然你係輸左,
我亦都唔會明白你嘅感受,
因為你先係落場踢嗰個,
但係我想講,
唔需要再自責
都已經完左,
起碼我覺得你踢得好好
頭先我最尾望住你射嗰球,
其實我覺得真係好大機會入,
係真架 」
原來佢覺得我踢得好,
雖然唔知佢係咪安慰我,
不過我已經唔理,
你要知道,
讚賞大唔大威力,
其實係取決於邊個講
若凝:「其實我未見過你呢個樣
一時之間好唔慣,
有句說話雖然我都知好廢
但都好想同你講,
唔好唔開心啦 」
我:「你唔嬲我喇 」
若凝:「嬲架
邊個話唔嬲呀 」
講起呢樣野我即刻諗返起第二啲野
我:「你坐喺度唔好走住
我拿拿臨入去換衫拎啲野俾你睇,
真係好快
等埋我先走.」