[真人真事][校園][純愛]《婚宴上的重遇》: 第五十六章

我見佢咁嘅樣
咁就梗係即刻行埋去
喺嗰陣我已經冇理到我表妹
我連「唔好行開」都冇同佢講,
就已經去左若凝嗰度
佢亦都好識做
冇跟埋過嚟
點知我一行近,
若凝就已經想調轉頭走
咁我梗係加快腳步




去追上佢嘅步伐,
依家呢個情況,
就好似我同佢個關係咁樣
我愈想追佢,
就要愈行得快
如果唔係嘅話,
大家就會愈嚟愈遠
雖然可能有啲人會認為,
若凝已經同我好親近
我班朋友,同學就已經係咁樣諗,




但有啲野,
可能係當局者迷啦
我真係唔覺我同佢已經好近
又或者咁講,
每個男仔喺自己女神面前,
總係會變得冇乜自信
特別係毒男,
我已經唔止一次咁樣講
咁我追到上去,
我:「做咩呀 」




我嗰陣已經估到佢應該知我係講大話
如果唔係唔會咁嬲
嗰陣我真係有啲驚
同埋心虛
因為我真係有咁樣做,
如果對住第二個人,
我諗我可以完全扮冇野
但係唔知點解嗰一刻,
我做唔到咁樣
明明平時成日都係咁樣做
已經訓練有素啦,
但係原來對住若凝,
以往訓練出嚟嘅反應係完全冇用
平時又唔見我咁坦白
你話死唔死




去返對話先
若凝:「唔好意思,
原來阻住你溝女,
下次你坦白丫嘛
唔得閒陪我去整蛋糕咪算囉
唔使講大話.」
我:「唔係呀嗰個係我表妹
不嬲都係咁樣玩 」
若凝:「係咩都唔關我事啦
你知唔知其實我好唔鍾意人地呃我.」
我:「對唔住呀 」
我嗰陣真係冇野講
淨係識講對唔住,
因為我覺得我解釋,
只會令到自己更加無地自容




若凝:「唔使講對唔住
反正你都慣左講大話架啦.」
之後佢就走左
頭先同佢對話嗰陣望住佢,
睇得出真係好嬲
同埋好失望,
佢以前講過,
佢同佢初戀男朋友分手,
其中一個原因就係因為佢男朋友呃佢
所以佢好唔鍾意人地講大話呃佢
我記得嗰陣我仲話唔會呃佢,
但原來我都係空口講白話.

咁樣之後我就同返我表妹返屋企
喺途中,




我表妹問我,
表妹:「你鍾意頭先個女仔呀 」
我:「唔係呀做咩 」
表妹:「唔使扮喇
你頭先去左嗰面之後,
返到嚟成個人唔出聲
做咩呀係咪激嬲左人 」
我:「喂你知唔知點樣氹返人 」
表妹:「即係我冇估錯啦 」
我:「係喇至叻就係你 」
表妹:「唔知喎個個都唔同架啵 」
我:「咁又係喎 」
表妹:「但係最緊要都係一樣野,
就係誠意 」
我:「頂你個肺




又幾有大道理喎
我夠知啦頂 」
表妹:「咪嘈住先啦
你有冇誠意,
女仔一定會睇得出 」
我:「乜係咩 」
表妹:「係呀,
至於要點樣做就睇你自己喇
又唔係我激嬲人 」
返到屋企,
食埋晚飯,
等我表妹走左之後,
我就問我呀媽
有冇我細個同我表妹啲相
點解我要咁樣做
依家佢以為我表妹係我女朋友,
但根本就唔係
所以我想拎返我同我表妹細個嗰啲相,
嚟證明我同佢真係由細玩到大嘅親戚
始終要拎證據架
咁亦都好彩,
好易就搵到
跟住就擺埋落書包,
其實返到嚟我一路諗
我好唔好喺面書同佢講呢
我撳入去我同佢嘅對話視窗,
有幾次我真係打左啲野,
不外乎都係道歉嘅說話
但始終都真係冇勇氣send過去
始終唔知佢仲嬲完未
而我就覺得未嘅
不過喺嗰陣我先至發現自己有幾冇用
簡簡單單一句sorry,
都唔敢send出去
同埋其實成件事我可以處理得好好多
但就係慣左手勢講大話,
令成件事去到呢個田地,
衰啲講句真係自己攞嚟
咁我之後自己諗,
聽日都要踢決賽,
都係早啲瞓啦
但上到床一瞇埋眼,
自己就喺度亂諗野,
我好擔心我同若凝以後就會咁樣
可能去唔返之前咁frd,
一諗到呢度我就好驚
或者真係我多疑,
但係可能只係因為我緊張,
先至喺度亂諗野.