[真人真事][校園][純愛]《婚宴上的重遇》: 第四十三章

食飽之後我地去左朗豪坊
其實嗰陣我地好無聊
兩條友一下子上到最高嗰層,
之後逐層落返嚟
順便當傾下計好
所謂嘅感受節日氣氛都好
咁嗰陣嘅話題,
其實都係圍繞住佢多
我都係到嗰日先知道多啲關於佢嘅野
原來佢係獨生女




平時同一般女仔冇分別,
鍾意煲劇聽歌
睇就睇日劇
原來佢最鍾意求婚大作戰
佢話覺得男主角不斷返去想補救
但係到最後都唔成功,
結果就選擇喺婚禮當日,
一次過講出對女主角十幾年嘅感情
咁樣好感動
而歌就聽香港




但冇話特別鍾意聽邊個,
佢覺得邊首好聽就聽邊首
又或者邊首個意思自己有共鳴就聽嗰首,
除左咁樣之外,
當然都會出街買野啦
屋企嗰啲食糧,飮品多數係佢入
反而其實佢唔鍾意食薯片
但就好鍾意食朱古力
平又好貴又好乜朱古力都食
同埋其實佢有一個好姊妹,




玩開嗰班就有三個女仔比較frd
但係如果你話講到好姊妹的話,
就只有一個
嗰個好姊妹初中已經識
兩個人真係好好朋友,
基本上乜都講得
甚至當若凝失戀嗰陣,
都係靠呢個好姊妹去扶持
有時就調返轉,
若凝去幫呢個好姊妹,
如無意外兩個人一世都打唔甩
若凝仲講笑話,
佢地兩個已經約定左,
第時結婚一定要做大家嘅伴娘
佢講到呢度我就諗




係喎,
究竟到我大個,
真係要出嚟社會嗰陣,
我同我依家呢個朋友,
會保持聯絡, keep到關係丫
定係會愈嚟愈疏遠
一年都見唔到一次呢
因為今年已經中六,
好快就中七跟住A-level
A-level之後好彩嘅話就可以一齊讀
唔好彩嘅,
大家分開左,
各自有各自嘅生活圈子,
咁到時就會變
一諗到呢度我就唔想畢業




希望我班豬朋狗友唔會咁啦
當然唔少得講到佢同佢前男朋友係點樣識
佢話係佢前男朋友追佢
本身佢前男朋友係籃球隊,
大家同級,
中四之後就開始同班
佢前男朋友算幾受歡迎嘅
淨係籃球隊正選隊員呢個身份已經夠煞食
身材高大,
樣又唔差(出自若凝口中)
咁若凝又講到佢打波嗰陣就真係幾型
同埋因為大家係同班,
所以就好快熟落左,
佢亦都唔係一般狗公咁樣
喺度死纏爛打




若凝最怕就係死纏爛打
而之後佢地關係升溫,
去到上年平安夜,
佢前男朋友就同佢喺尖咀海旁嗰度表白
跟住就一齊
但半年之後佢前男朋友就識左第二個
又咁啱分手之後係等緊會考放榜,
大家冇乜機會見面,
淨係放榜嗰日先見到
期間佢前男朋友有試過搵佢,
但係若凝全部都冇理到
sms,面書一句都冇覆過
聽完之後我有呢個感覺,
我:「咁你都幾絕喎 」
若凝:「係架 」




之後我地就搭巴士返屋企.

上到去巴士上層
又咁啱唔算好多人
可能啲人平安夜應該冇咁快返屋企,
仲有大把時間玩
又咁啱得我地咁蠢唔鍾意玩耐啲
所以架巴士就唔算多人,
若凝:「同你講完舒服晒 」
我:「你講頭先嗰啲野 」
若凝:「係呀,
唔好意思呀
要你聽左啲你唔知嘅野 」
我:「你突然之間咁客氣我唔知會點 」
若凝:「你條友丫
好聲好氣對你係唔得嘅
犯賤 」
我諗若凝講得冇錯,
我的確係幾犯賤
明明鍾意佢,
但又唔敢講,
大家雖然坐喺大家隔離,
但係中間有一棟無形之牆隔住我地
令到我唔可以去接近佢,
又或者其實呢個所謂嘅無形之牆,
只係我自己俾自己
我:「又唔好咁講 」
若凝:「咁你講晒啦,
不過唔知點解頭先會同你講呢啲野
我好少會同其他人講啲咁嘅野,
你唔好同人講呀 」
我:「挑
我要同人講你都唔知啦 」
若凝:「不過我知你唔會嘅 」
我:「做乜笑到咁奸 」
若凝:「你自己諗啦 」
我:「講真我真係唔明 」
若凝:「傻仔你真係冇得救
不過
多謝你呀
我講完之後好似舒服晒 」
我:「嗯,
得喇,
不過唔係我吹水,
我覺得我做聽眾都唔錯 」
若凝:「係嘅
有啲人好鍾意係咁講自己啲意見
不過你又冇喎 」
我:「嗰啲人有時真係好煩
係又講唔係有講 」
若凝:「識你咁耐最啱聽呢次
喂,
回禮呀 」
我:「無啦啦回乜春 」
若凝:「我講左我咁多野俾你聽,
到你喇 」
我:「咩叫到我 」
若凝:「到你講你啲野囉.」
我:「好似係你自己同我講
我冇逼過你 」
當然事實上我係好想聽啦
不過我冇同佢講呢句,
若凝:「你好似埋怨緊我喎 」
我:「邊度有
你太敏感
事實上亦真係冇乜野講 」
若凝:「點都有少少掛,
有冇鍾意邊個呀 」
估唔到佢會問呢個問題,
不過我相信每個中學生,
都會傾到呢個話題
但我之前真係完全冇諗過,
咁究竟我會點答呢
下回再分解.