[真人真事][校園][純愛]《婚宴上的重遇》: 第四十二章

若凝:「其實
上年今日係我第一次拍拖嘅日子 」
佢終於講呢樣野
由我拎到佢面書之後
好有興趣知嘅事
今日終於知道,
究竟點解會分手
同埋佢依家嘅心情係點
統統都可以知道
不過我決定扮第一次知咁樣




你知啦,
我呢啲咁鬼冇用嘅性格
唔知點解硬係唔想俾佢知道,
其實我係一早知
我:「依家分左手 」
若凝:「係呀 」
我:「點解嘅 」
若凝:「我仲好記得,
上年今日,
佢講嘅說話好好聽




又話點樣長久
總之會講好多,
係女仔都會鍾意聽到嘅野
但原來只係大話.」
我:「咁最後點解會分手 」
若凝:「好記得喺七八個月前左右,
有一日我有個好朋友見到佢
同第二個女仔一齊行街,
嗰陣我都有少少驚
因為呢個好朋友好少呃我




基本上係冇添
佢講得出嚟一定有野
但係唔知點解,
嗰陣我又對我個ex好有信心
好矛盾呀可
明明兩個只有一個啱
但我就決定信晒
之後我生日(五月嗰陣),
佢約左我出街
我諗住俾驚喜佢
一早去佢屋企樓下等,
因為我地以往出街,
大家會約實一個地點
然後喺嗰度等
但係嗰日我就喺佢屋企樓下等,




點知俾我見到佢同個女仔一齊行出嚟
原來係佢俾驚喜我
咁之後就分手 」
我:「有冇挽留你 」
若凝:「有呀,
老實講,
嗰陣我係好鍾意佢
始終都係初戀,
如果有啲野唔係親眼見到,
我會選擇唔信
但係冇辦法
今次我係望住佢地,
唔到我唔信 」
我:「原來你就係因為咁樣而轉校 」
若凝:「係呀,




嗰陣我覺得要忘記佢嘅方法,
首先就一定要見唔到佢先得
如果繼續同一間學校,
我真係驚我自己會再一次沉船
所以就轉左校嚟呢到 」
原來當初發生左啲咁嘅事,
聽完之後我明白一樣野
如果唔係佢男朋友,
其實我係冇機會同若凝有更多嘅接觸
至少今日我唔會有機會同佢一齊出嚟先
但係另一方面,
佢又搞到若凝咁唔開心,
咁究竟我應該要多謝佢,
定係問候佢呢





我:「咁你同佢依家點 」
若凝:「同佢好耐冇見喇
不過聽講佢仲喺原本嗰個學校讀,
我咪盡量唔行嗰邊
其實佢可能一早當冇野,
只係我仲覺得一見到佢就會有野啫 」
我:「仲係鍾意佢 」
若凝:「咁我又覺得唔係
因為近期已經好少會諗到佢,
唔怕同你講埋,
啱啱分手嗰陣我真係好掛住佢
特別係夜晚嗰陣
佢唔會再同你傾電話,
唔會再有一個人喺你隔離
唔會再有人陪你食飯,




你知我啦
有時屋企會冇煮飯架嘛
不過呢啲都係習慣啫
慣左就冇事,
與其話仲係鍾意佢,
不如話只係我唔知點樣面對佢 」
我:「即係你依家已經唔鍾意佢 」
呢條問題其實係我自己有私心想問
若凝:「應該係喇
當然如果見得返嗰陣仲有心如鹿撞嘅感覺,
咁就應該仲鍾意
但我唔會去試喇,
俾佢傷過一次仲唔夠咩 」
我:「原來你有呢啲經歷
我都奇怪,
咁靚女點會冇拍拖 」
若凝:「想讚我嚟安慰我
唔使啦,
已經過左最痛嗰期 」
我:「又唔好講到咁樣
我不嬲都話你個樣靚
係個格衰
成日想拖我落水
明明成班狗公可以陪你做野 」
若凝:「班狗公好煩
咪搞我 」
我:「即係我好過啲狗公
咁樣算唔算係讚美 」
若凝:「算架嘻嘻 」
果然真係,
若凝同得我玩,
只係因為我冇殺傷力
當然啦,
呢個係當時我一廂情願嘅諗法,
不過雖不中亦不遠矣,
好彩自己一路都知自己咩事
咁先至冇咁hurt.