[真人真事][校園][純愛]《婚宴上的重遇》: 第三十七章

之後我地就去左許留山食糖水
若凝話唔知點解今日好想食芒果
咁我話冇所謂啦,
反正食乜野都唔係重點
叫完野食之後,
坐喺度望住佢個表情
佢好似已經開心返
女人真係好奇怪
尤其是係啲情緒起伏,
一時就好開心




一時就愁眉苦臉
至於點解佢頭先會無啦啦唔開心,
我就冇問佢點解喇
因為唔知會唔會再挑起佢鋪癮
雖然我好想知,
但最後都冇問
就好似我喺佢面書見到佢前男朋友一樣,
我好想知點解佢最後會分手
究竟佢男朋友係咪傻
咁靚嘅女仔都可以選擇唔要




知唔知有幾多人好想做個女仔身邊嗰個嘅人
有幾多人好羨慕佢
我好明顯就係其中一個,
不過若凝冇講開就由佢啦
我依然覺得,
當佢想講嗰陣就會講
無謂迫佢啦,
你知啦,
有時好奇心真係會對其他人造成不便
我唔知啲女仔無啦啦被人問起啲情史會唔會淚流滿面




你知我啦,
由細到大同女仔唔係好多接觸
完全唔了解佢地嘅內心世界
同埋成日會凝住佢地一講起初戀,
啲眼淚就即刻收唔到掣
雖然我唔知呢個男仔係咪若凝嘅初戀,
但係睇面書,
佢淨係post過呢個男仔出嚟
咁我估應該係啦
所以去到最後我都係決定收埋我嘅好奇心.

之後食食下,
我地就傾計啦
呢個係我同佢嘅規則
就係兩個人食野唔可以各自做自己野




之前我都講過啦,
如果兩個人食野嗰陣係各自做自己野,
咁不如分開食
所以我地每次兩個人食野嗰陣,
都一定會傾計
最出奇嘅係,
每一次都唔會冷場
你知啦,
有時邊有咁多話題啫,
講得多自然會悶
但係好好彩嘅係,
我同若凝每次食飯嗰陣,
總係有講不完嘅話題
特別我唔係一個好擅長同其他人傾計嘅人
即係對住自己班朋友嗰陣就多野講




喺啲多人嘅環境就冇乜野講咁樣
所以喺嗰日食食下我都講左呢樣野出嚟
我:「喂,講樣野俾你聽 」
若凝:「做咩呀 」
我:「唔知點解同你咁多野講,
成日都講唔厭 」
若凝:「係咩 」
我:「老實講丫,
如果同你唔係傾得埋
我地應該唔會frd到 」
若凝:「點解呀 」
我:「本身我唔係一個好鍾意同其他人傾計嘅人
其他人個意思即係唔熟嗰啲啦
同埋我好驚兩個人一齊冇野講
如果我同你係咁嘅話,




我諗我同你應該冇乜交集 」
其實呢句都係講笑啫,
由我第一眼見到佢開始,
我就已經知道自己中左箭
如果我發現我同佢係冇乜野講的話,
我諗我都會繼續盡量去接觸佢
不過到時可能會用多左時間啫
同埋應該會冇大家啱傾咁開心,
我咁講只係唔想佢以為我係想溝佢
我總係覺得俾自己鍾意嘅人睇穿左你係鍾意佢係好冇安全感
又或者,
我知道我同佢從來都唔會去到拍拖嘅地步
佢唔會鍾意我,
所以我先咁講
若凝:「都係呀




一直以嚟,
其實我知道身邊都有好多人想乘乘機機痴埋嚟
淨係我地依家呢班都唔少啦
但唔知點解我覺得你唔係
所以就同你特別啱傾
緣分嘅野有時真係好奇妙 」
我:「吹到緣分咁誇 」
若凝:「係架,
如果會考嗰陣你唔係成日嚟麥當勞,
開學嗰日我就唔會揀坐你隔離
咁我同你就應該唔會好似依家咁樣 」
原來當日,
我係做左一樣啱嘅野,
所以話,
因果關係真係唔可以睇少
我同佢由半年前已經種左一個「因」,
但係呢個「因」要到半年之後,
先至結出今日呢個「果」.