[真人真事][校園][純愛]《婚宴上的重遇》: 第三十八章

跟住落嚟都冇乜野特別事發生
咁就不如直落去講聖誕
原本就有個聖誕聯歡會嘅
點知臨時就話呢個唔得嗰個去唔到
又呢樣又嗰樣
之後全班就話既然咁多人去唔到,
不如下年中七先搞
順便當做一個farewell party
因為之後我地就準備要考a-level,
咁我地全班都同意




於是就決定中七先搞聖誕聯歡會,
咁本身我唔係好期待呢啲乜鬼野聯歡會,
所以我就冇特別感覺
若凝都好似同我一樣
感覺唔大
之後有一日,
我冇記錯的話應該係放聖誕假之前最後嗰日
若凝放學前就問我放學之後去唔去附近商場行下,
咁我就話冇所謂
同埋其實呢幾日我有個諗法




就係唔知佢聖誕有冇人約,
老實講唔係我妄自菲薄
我覺得佢應該有人約
唔好唔記得佢本身仲有原本嗰間學校嘅朋友,
不過有啲野唔試又點會知
但係就一路都搵唔到機會問佢
喺面書雖然成日都傾計,
但係我有個硬膠諗法
就係聖誕呢啲咁大嘅節日,
面對面問佢會比較好




喺面書問好似有啲奇怪
但係好死唔死,
面對面又問唔出口
我喺十二月中已經有呢個諗法
但係去到今日二十號
都仲未問
你就知我幾冇用啦
平時講就識講,
驚條春咩
一係去一係唔去,
好簡單
拿拿臨問完就算
但係原來發生喺自己身上嗰陣,
就變得綁手綁腳
每每想問嗰陣,




去到最後都係縮沙
結果搞下搞下,
得返2008年最後一日嘅上課日
希望一陣問到佢啦
已經冇時間俾我再淆底.

放學嘅鐘聲響起
跟住我地就去左附近嘅商場行
一路行就已經有個諗定陣間入到去商場一定要問若凝,
希望真係約到啦
大佬依家講緊同女神共渡聖誕
對一個小毒毒而言係一件好重要嘅事
人從來都係咁樣
嗰件事愈重要,
你就會愈保守




同埋我又要諗要點樣問先至唔刻意
因為我唔想俾一個擺明約佢嘅感覺若凝
盡量都係想自然啲,
依家諗返起,
都唔明白當初點解要咁樣做
想約埋約囉,
又唔想俾人知自己係想約人
嗰陣嘅自己真係好多餘
或者就係自己呢啲咁嘅性格,
先會引致日後嘅事情發生,
好,
講返跟住發生啲乜野先
之後我真係的起心肝問若凝
因為時間再唔容許我繼續拖落去,
但當然唔係直接咁問啦,




我:「正,
聽日放聖誕假 」
若凝:「你好唔想返學咩 」
我:「咁又唔係
不過放假開心啲 」
若凝:「死懶鬼
返學唔好咩 」
我:「唔係唔好嘅
但係學生哥有邊個唔想放假 」
當然我都係後來先知,
其實有得返學,
應該要感到慶幸
若凝:「不過聖誕假都好,
就係可以瞓耐啲
你知啦,




咁凍仲要咁早起身
有時真係頂唔順 」
我:「係 」
若凝:「成個假期你諗住點用 」
我:「喺屋企囉
仲可以點 」
若凝:「唔去旅行 」
我:「你都傻嘅邊有錢
同埋本身唔鍾意
你諗住去 」
佢唔係諗住去旅行下話
不過都正常嘅,
聖誕節去北海道睇雪
有邊個女仔唔鍾意啫
若凝:「唔係呀,
喺香港過 」
好彩啫,
幾驚佢要去旅行
係的話咁我嘅部署咪冇晒
我:「睇死你一定唔會一條友過
約你本身嗰班姊妹 」
若凝:「咁你就錯喇
我班姊妹有異性冇人性
個個都陪男朋友 」
我:「係咪真呀 」
若凝:「真呀,
佢地話除夕先一齊出嚟 」
即係我除夕唔可以同佢過啦,
不過唔緊要
聖誕得就可以,
我:「聖誕我都冇乜野做
同呀成班屎忽鬼一齊打機算 」
若凝:「你講笑咋話 」
我:「年年都係咁過
成班男仔係做呢啲野架啦 」
若凝:「我同你出嚟囉 」
若凝竟然主動約我
係咪發緊夢
跟住我自己搣自己大脾,
嘩好乸痛
唔係發夢呀,
但我又唔想俾佢知我好爽喎
所以獨自暗爽
我:「咪玩啦若凝姐,
聖誕會冇人約
乘乘機機搵我笨 」
若凝:「咁你咪當我搵你笨囉 」
我:「慘得過我又受 」
若凝:「到時再講時間地點啦 」
我:「好 」
雖然我表面上扮得好似好唔在乎咁樣,
但其實真係好開心
我記得嗰日成日都喺度笑,
人逢喜事精神爽
我都係第一次體驗,
即使返到屋企,
個情緒都仲係好高漲,
因為終於約到若凝啦
呀唔係,
嚴格嚟講其實係佢約我,
我始終都係講唔出口.