[真人真事][校園][純愛]《婚宴上的重遇》: 第三十六章

咁我一入到去班房
梗係即刻望住若凝個位
但係第一下吸引左我視線嘅,
其實係若凝個書包
事關佢個書包係非常搶眼
鮮粉紅色
好易就認得出
咁我見到佢個書包仲喺度
即係代表佢未走啦
望完佢個書包就望返佢個位




就見到佢托住個頭咁坐左喺度
衰啲講句,
個樣好似苦瓜咁樣
賭錢嗰日見到佢就輸梗都得喇
我平時未見過佢呢個樣
咁樣應該九成九有野
跟住我就梗係二話不說行過去啦,
之後佢就見到我
若凝:「以為你唔記得添.」
我:「痴線點會唔記得




啱啱俾人遲放咋 」
若凝:「係咩.」
我:「係咪去食甜品呀 」
若凝:「冇所謂呀
你想去咪去,
唔想去咪唔去 」
我:「咁去啦 」
之後,
我同佢一齊由六樓落返去地下離開學校,
一路行就一路諗,




究竟若凝點解無啦啦會咁樣
明明之前仲傾緊好地地
愈諗就愈唔明,
頭先我已經用左成堂去諗,
依家我行樓梯嗰陣仲喺度諗緊
都仲係諗唔明
點解一下子會個情緒變到咁樣嘅呢
嚟m該唔會丫
識左佢個幾兩個月,
嚟m嗰排都唔會發脾氣
仲要今次明明我地傾得好開心,
係無啦啦突然間一下子情緒就顛覆
斷估唔會係因為經期掛
係經期嘅話,
應該一開始就唔好老脾啦,




等我依家重組劇情先
係喇我知喇,
一定係個狗公撩我地講野
但係佢點解會因為咁樣而發脾氣呢
明明個狗公都冇跟嚟食
我已經叫佢唔好啦
同埋若凝未至於咁港女,
唔會因為啲咁少嘅事發脾氣
咪住先,
唔通其實佢係想同狗公食
但係我就叫佢唔好嚟
所以咁就嬲左我
但係我見若凝平時同個狗公都冇聯絡,
唔會係因為咁掛
定係其實佢地有私底下聯絡




好亂呀大佬
究竟係咩事
不過可以肯定嘅係,
若凝佢依家擺明就係唔開心
算啦,
都係等我行出去學校門口就問佢,
還掂係咁諗都諗唔到架啦.

一出去學校門口,
我就即刻問佢
我:「邊個激親若凝姐你呀 」
若凝:「冇喎,
邊有嬲 」
我:「仲話冇
你成個樣寫晒出嚟喇 」




若凝:「係咩 」
我:「我見你一支箭咁樣走,
都知唔對路啦 」
若凝:「懶醒
今日嗰堂急丫嘛 」
我:「咪扮野啦
你成日話你嗰堂嗰個老師好鬼死悠閒
又會咁啱今堂先嚟趕
我就唔信喇 」
若凝:「唔信就算啦
不過你點解成頭濕晒嘅 」
我:「仲好講
老師叫我搬簿,
但係我又驚你唔知會唔會走左人喎,
所以我先由四樓先落去二樓,




再上返去六樓搵你
又要唔可以慢
驚你無啦啦會走左去.」
若凝:「乜係咩 」
講完呢句之後,
若凝即刻擰返轉前面,
但其實我睇得出,
佢擰轉面嗰下,
面上嘅愁容,
已經轉化成笑容
雖然呢個笑容,
同平時有少少唔同,
平時嘅笑容
若凝會好大方咁樣展示出嚟
今次佢選擇左吝嗇,
偷偷地拎返轉前面先笑
又咁啱俾我捕捉到
可能佢唔想俾我知道佢已經冇嬲
又或者只係假笑
不過呢個笑容好特別,
我:「終於笑返喇咩 」
若凝:「邊有笑 」
我:「俾我見到仲唔認 」
若凝:「痴線變態佬
喺度偷睇人 」
我:「終於認喇咩 」
若凝:「有變態佬呀 」
我:「唔好咁大聲,
費事人地以為我真係 」
若凝:「咁你的確係 」
我:「仲咁串
我真係郁你你就死
唔好睇少我雄壯嘅身體 」
若凝:「你雄壯
唔係掛 」
我:「好似唔信咁喎 」
若凝:「好難相信喎 」
我:「你隻眼盲啫 」
若凝:「可能真係啦哈哈 」
我:「可咩能,
直頭係啦 」
若凝:「不過我知你唔會嘅 」
我:「咩唔會 」
若凝:「總之你就唔會啦.」
我:「九唔搭八
都唔知你嗡乜 」
若凝之後笑左一笑,
今次佢冇偷笑,
喺正我面前毫無保留咁樣微笑
咁我嘅任務已經達到
老實講,
可能係我毒,
但我真係唔想自己鍾意嘅女仔愁眉苦臉
喺嗰一刻,
唔知點解你會覺得自己好冇用,
又唔知想點,
想分擔又分擔唔到
結果每一個男仔都會有一個目標,
就係想將佢個愁容變成笑容,
好好彩,
今次嘅我僥倖成功左
咁就已經足夠,
雄唔雄壯又有乜所謂?