[真人真事][校園][純愛]《婚宴上的重遇》: 第二十八章

若凝:「原來已經七點
去食野咯 」
我:「你唔使溫多陣咩 」
若凝:「今日溫左五個幾鐘,
乜都夠啦
如果喺屋企一定唔可以溫咁耐 」
我:「你未溫夠可以再溫多陣喎
費事你到時考嗰陣唔識就喺度賴我 」
若凝:「你估我係你咩
成日喺度賴三賴四


我溫夠喇 」
我:「咁講真都係嘅,
我地溫左五個幾鐘好難會唔夠 」
其實我講笑啫
呢五個幾鐘,
我真係溫書嘅時間都唔知有冇半個鐘
我大多數嘅時間都係望住坐喺隔離嘅佢,
有時係咁架喇
我都唔知為乜,
但係若凝總係可以吸引我嘅視線


令到我將焦點放喺佢身上
就好似平時上堂咁樣,
或者你地會問我,
唓
平時返學都望夠啦
乜仲未厭咩
咁我可以答你,
真係未厭
或者我好奇怪,
鍾意一樣野


就好想長期接觸佢,
就算只係偷望佢,
一件咁少嘅事都好
我都好想做
我知有啲人會話,
幾鍾意都好,
都會有厭倦嘅一日
但係我係少數唔會嘅人
你見我對脆辣雞腿包就知啦,
食左咁多年都係食佢
甚至乎車仔麵都係
食左咁多年都係食蟹柳,芝士腸,
我係嗰種一鍾意就唔會厭嘅人
當我覺得厭倦,
即係其實我唔係好鍾意嗰樣野


我只係覺得有新鮮感啫,
所以點解出到嚟,
我都係會因為可以望住若凝而感到開心
因為從來都唔覺得厭
由我半年前第一眼見到佢嗰陣,
我就已經知道呢個答案.

我地出左圖書館之後
若凝:「食咩呀 」
我:「我冇所謂,
你話事 」
講真我對食真係好求其
除非真係好難食,
如果唔係真係食乜都冇問題
已經唔同細細個喇


細細個嗰陣,
成日話食呢樣食嗰樣,
估唔到大個左之後,
自己竟然會對食咁求其
真係好搞笑
食乜都得,
只要唔使我諗就可以
若凝:「搞錯呀叫我諗
我都唔知呀 」
我:「你想食乜就食乜啦
真係冇所謂 」
若凝:「咁呀
我諗到喇 」
我:「諗到咩 」
若凝:「俾你估下丫,


呢樣野你一定會鍾意食 」
我:「大佬點估呀
有冇多啲貼士 」
若凝:「你成日食架 」
我:「車仔麵 」
若凝:「咁遠
唔啱再估過 」
我:「真係唔知呀,
我最渣就係估野 」
若凝:「咁蠢架
唉我帶你去喇 」
點知原來佢帶我去麥當勞
我:「頂你原來係呢度 」
若凝:「話左你成日食架
同埋一定鍾意,


啲貼士冇錯喎 」
我:「我服輸,
你係得嘅 」
今次我地去嗰間麥當勞係近圖書館嘅,
呢間麥當勞同半年前我第一次見到佢嗰間唔同
係另外一間嚟,
若凝應該都仲係唔想返去嗰間麥當勞食
話說佢不辭而別丫嘛
我:「食咩呀幫你買埋 」
若凝:「咁好死 」
我:「不嬲都好人係你唔知
雞翼餐全翼雪碧小冰
若凝:「你又記得嘅 」
我:「我呢啲食腦架嘛
似你戇居居咩 」
若凝:「咁串咀
鬼唔望你食脆辣雞腿包啃啞你 」
我:「咁你都知我食脆辣雞腿包
食新包唔得嘅 」
若凝:「你會唔食脆辣雞腿包
真係搵鬼信呀,
賭乜都得 」
我:「超
我就唔食 」
咁當然啦,
我唔係一個好有骨氣嘅人,
當我買嗰陣,
我都係食返脆辣雞腿包
我都知我冇q用架喇