[真人真事][校園][純愛]《婚宴上的重遇》: 第二十七章

咁我地去到圖書館
就梗係溫書啦
若凝真係冇講錯,
呢間圖書館唔算好多人
同埋有啲人似真係嚟溫書
唔似係嚟溝女
即使我地有時講野都唔緊要,
大家都好包容
咁我地當然都尊重返個規矩啦
冇乜必要嗰陣都唔出聲,


就算講野都係細細聲講
人地識做嗰陣你自己都要識做啦
若凝:「好,
溫書先 」
我:「嗯 」
其實我好想好似啲戲咁樣,
寫啲字喺張細紙仔入面叫佢加油
之後再整好多個硬膠表情符號
但大家都應該知,
我係唔會咁有吉屎架啦


同埋我覺得咁樣會阻住若凝溫書
因為睇個樣若凝都真係想溫,
而唔係嚟扮晒野
咁我就俾一個合理藉口自己
都係唔好阻住佢溫書啦
至於我,
我今日嚟嘅最大目的,
其實都係諗過度過
講真,
我都唔止講左一次


我係鍾意一個人喺屋企溫書多啲
我今日會出嚟,
其實最大目的就梗係唔係溫書啦
呢方面我必需承認
咁最大目標係咩呢
唔使問呀貴都知,
就梗係為左見若凝啦
但係如果我光明正大咁樣喺側邊望佢,
唔好話我覺得怪丫,
佢都覺得有問題啦
點解淨係望住佢,
而唔係望住本書
況且其實佢唔蠢,
女仔可能對呢啲野比男仔更加敏感
而且嗰陣嘅我係唔想俾佢知我鍾意佢,


由細到大都係咁樣
我唔可以光明正大咁樣喺側邊望佢啫,
唔代表我唔可以偷望丫嘛
所以我都係扮溫書
擺一本自己最熟嘅教科notes喺枱面,
打開入面最熟嘅chapter
扮喺度專心望住,
但其實就間唔中望住右邊嘅若凝
咁樣一嚟佢陣間問我溫左啲乜野,
我都可以即時答佢丫
起碼似返個有溫書嘅人
而若凝佢真係溫得好專心,
我每次偷望過去嗰陣,
佢都係不期然抄緊note
同埋做緊老師俾佢嗰啲嘅筆記,


有時諗唔到就用支筆輕輕敲下個頭
眉頭深鎖,
個樣極度苦惱
呢個樣又係不得了.

當我地溫到去四點幾嗰陣,
我唔知佢會唔會肚餓
所以就問佢食唔食野
我:「肚唔肚餓
使唔使去食啲野 」
若凝:「唔肚餓呀
同埋一出左去,
返嚟就冇心機溫書
你餓呀 」
我:「唔餓呀


驚你肚餓啫 」
若凝:「咁直接食夜晚啦
如果你餓就同我講 」
我:「好 」
我見佢溫緊自己嘅選修科,
咁我都幫佢唔到架啦
一個文科一個理科
我話幫到佢就奇怪啦
同埋我覺得有時有啲人係唔鍾意俾人幫
如果你太熱心,
反而係俾到佢麻煩
又唔好意思推搪你
但係問心又唔想俾你幫,
到時真係好心做壞事
我唔知若凝係咪咁嘅人啦,


不過最好都係唔出聲算
佢有佢埋頭苦幹,
我有我偷望佢
講開又講,
諗返起半年前,
我日日去麥當勞嗰度偷望佢,
嗰陣嘅我估唔到
半年之後我可以同佢一齊溫書
雖然依家同半年前一樣,
我都係偷望佢,
完全冇變過
但係距離上就拉近左好多,
半年前,
我坐喺麥當勞入面,
佢就係收銀機前面
半年之後,
我同佢係拍住坐
或者,
呢個就係我同佢最接近嘅距離,
大家拍住一齊
但係從來都唔會越界.