[真人真事][校園][純愛]《婚宴上的重遇》: 第二十六章

去到禮拜六當日,
我仲好記得嗰朝我好早醒
冇計啦,
約到若凝真係好開心
吹到瞓唔著就誇張啲
但真係比平時出街做多左野
例如我竟然會去衣櫃揀衫著
雖然全部都係t shirt牛仔褲
但係平時嘅我係求其揀
隻手攞到邊件就著邊件,




毒男就係咁樣架啦
對衣著唔係好有要求,
除非真係啲顏色奇奇怪怪咁樣
否則就真係冇所謂
但係我嗰日竟然早左成一個鐘準備,
就係睇下究竟乜衫配乜褲好
平時我係臨出門三個字之前先去換衫,洗面
用盡一分一秒啱啱好
唔會提早預備
可能我太緊張喇,




又或者我真係太重視
始終唔想第一次就衰左個頭,
講開又講,
2008年嘅十月,
冇依家嘅十月咁鬼熱
依家真係去到十一月十二月先開始涼
嗰陣真係似返個秋天
我本身都唔算多汗,
咁就冇噴止汗劑喇
當我搞掂晒啲野,




咁啱若凝就打俾我
若凝:「話說我好似未同你講邊度等 」
我:「又係喎好似
好彩你醒目打嚟 」
睇嚟我已經期待到傻左
連最基本嘅喺邊度等都唔知,
若凝:「街口嗰個巴士站丫
搭過去好快 」
我:「咁q懶
行都唔行 」
若凝:「唔想行想懶多陣呀 」
我:「好啦 」
若凝:「一點半呀.」
我:「知喇 」
其實我就唔係好鍾意同人搭巴士




除非真係好friend好friend,
如果唔係嘅話多數都想自己一個搭
因為我覺得咁樣可以寧靜下
即使去到依家都係,
咁樣喺嗰陣,
我地出街基本上都唔可以上網,
就算係喺咁悶嘅環境之下,
我都鍾意自己搭多啲
即使望下風景都好,
不過既然若凝講就算啦
咁都值嘅我覺得,
雖然冇左私人時間,
但係換返嚟嘅係同若凝相處多啲嘅時間,
私人時間日日都有架啦
反而同若凝一齊就唔係喎,




雖然我係一個有原則嘅人,
但係未至於咁死板
一成不變,
其實講到尾
我都係雙重標準啫
我絕對唔否認.

咁我嗰日就早少少出左去等
大約一點四就到左,
冇所謂啦早啲去
其實我嗰陣都預左若凝會遲
你知啲女仔架啦,
大把野要整
點知若凝竟然喺一點廿七分就到左
點解咁記得時間




因為我離遠見到佢嗰陣,
我即刻望住個手錶
心諗佢竟然冇遲到
真係出乎意料之外,
若凝:「好早喎 」
我:「你好早就真
以為你會搞呢樣搞嗰樣之後有排先到 」
若凝:「約出嚟溫書咋嘛點會咁多野搞
就算我嗰日要搞呢樣搞嗰樣都會提早準備啦 」
我:「係咪真係呀
馬後炮講乜都得.」
若凝:「似你咩成日講大話 」
我:「又潤我
有車嚟喇上去啦 」
當我地上左巴士之後,




若凝:「上去上層丫 」
我:「幾個站都上去 」
若凝:「上啦,
唔該你丫 」
佢講「唔該你丫」呢個樣,呢把聲線,
根本就冇可能拒絕
上到去坐,
我:「點解一定要上去呢 」
若凝:「細細個坐慣左 」
我:「又上又落好攰喎 」
若凝:「行下啦咁鬼懶 」
我:「唔知邊個寧願搭巴士都唔行路,
話想懶多陣 」
若凝:「你條友記呢啲野就咁叻
都唔知話你係咪記性好 」
咁同若凝搭車就好嘅
大家有傾有講,
唔會好尷尬,
你知啦,
兩個人一齊但係冇野講會好尷尬架嘛
好彩我同若凝唔係
講起上嚟,
佢今日上身著一件白t,
下身一條深色牛仔褲,
平底出街鞋,
孭住個書包
雖然呢個裝束係好普通
你平日行街都見唔少
不過我覺得仍然係好吸引,
出到嚟先發現,
其實你心目中嘅女神點樣著衫係唔重要
反正只要嗰個係你嘅女神,
點樣著都話靚架啦
講其他野都係多餘.