[真人真事][校園][純愛]《婚宴上的重遇》: 第二十三章

話說去到十月尾,
我地學校有考試
會考到去十一月頭,
我地學校一年有四個考試
第二個同第四個係大考,
第一個同第三個係普通考試
話就話普通其實都係差唔多
考嘅野只係少啲啲
我嗰陣喺度諗,
究竟好唔好同若凝佢一齊溫書呢


講真我都想同佢拉近距離嘅
你話完全冇就呃你
但係又唔知點樣開口
同埋之前講過啦,
其實我係鍾意自己一個溫多啲
我覺得咁樣個效用大啲
對我自己而言,
不過中學雞鍾意人就係咁樣
會為左自己鍾意嘅人,
特登去改變自己嘅一啲習慣,


即使嗰樣野你係唔鍾意都好,
你都仲係會咁樣做
我相信各位巴打絲打應該有共鳴
依家諗返起,
嗰陣嘅自己好戇居
但係亦都好懷念,
因為已經唔會再咁樣做,
時間嘅野,
真係一去冇回頭,
其實人都係


返返正題先,
若凝讀書咁叻
唔知佢係點樣溫書嘅呢
等我可以參考下,
其實講到尾,
自己都係想俾藉口自己啫
嗱,
我唔係想同若凝溫呀,
我只想參考佢嘅溫書方法
其實自己又點會唔知自己丫
所謂嘅合理化就係咁樣解
但係我真係好鬼冇用
真係唔可以自己開聲叫佢溫書
又或者唔係唔可以,
而係自己唔夠膽,


諗諗下,
都唔知點樣開口好
算啦,
都係唔好光明正大咁樣問,
借啲意問佢啦
咁樣好似唔會太狗公,
佢又唔會覺得我係主動約佢
唔錯唔錯,
冇計啦
嗰陣嘅我就係咁毒,
唔係好想俾人知自己個心究竟係想點,
可能係安全感不足啦,
又或者其實真係自己毒.

我嗰日特登同佢一齊食晏


因為都有幾個禮拜冇食過車仔麵,
車仔麵好食兼平,
更加係我同若凝第一次食飯嘅地點
呢個地方意義都好重大,
當然啦,
我估呢啲咁無聊嘅野都係得我記得嘅啫
若凝應該一早拋諸腦後,
我仲好記得我問佢今日一唔一齊食晏嗰陣都淆到瀨尿
平時都冇咁淆,
可能今日我有私心啦
我:「一陣一唔一齊食晏 」
若凝:「做咩呀想約姐姐呀 」
我:「話說你好似細過我 」
若凝:「又好似係喎,
你個樣蠱蠱惑惑


肯定唔慌係好野 」
我心諗若凝又咁醒嘅
咁快就俾佢識穿
但呢個時候我一定要保持冷靜,
如果唔係就真係俾佢知
相處左個幾月,
發覺佢啲觀察力都幾細微
我:「冇,
今日我好想食車仔麵
唔想食飯 」
若凝:「乜你晏晝成日食飯咩 」
我:「嗰班契弟日日都係食同一間野
本來我都冇乜所謂,
不過唔知點解今日想食啲濕口野 」
若凝:「好彩你同我講得早


一陣我小息去同呀邊個邊個(班上面其中一個女仔)講,
話我今日唔同佢地食 」
好野,
計劃成功
小息之後,
若凝:「同佢地講左喇 」
呢個時候我靈機一觸,
話說我頭先同我嗰班豬朋狗友講,
話我今日唔可以出去食
要同班會嗰班人喺學校傾野
叫佢地今日唔好預我食飯,
聰明嘅讀者就梗係知咩事啦
如果我一陣大搖大擺同若凝一齊行出去,
咁就全世界都知咩事啦
或者可能佢地唔會留意到嘅
始終唔係啲乜野大件事,
不過有得避免都係盡量避免啦
我:「一陣我地不如分開去 」
若凝:「點解呀 」
我:「我班豬朋狗友唔知我同你食,
費事啦 」
若凝:「我發覺你真係好鍾意講大話
成日都講
對住我又係,自己媽咪又係,
甚至自己朋友都係.」
我:「幾時呃過你 」
若凝:「開學呀,
唔好恰我唔記得 」
事實證明真係唔好呃女人
我:「我知你肯應承嘅 」
若凝:「好啦,
一陣我地喺車仔麵舖等.」
我:「多謝若凝姐.」
若凝:「唉.」